Liikë 18 - N’KANGULU WUMOONË

Sasafë yi n'fwiili i nzoonzi

¹ Yeesu wusë bëtelooso sasafë ayi mu kubëleesi ti baawu bëfwenikini kukalilë kadi ntaangu mu kusambilë, yi bitu kuvolë ve:

² « Nzoonzi mweekë yabë fë livulë lin'viipë wukaambu kubakaangë Nzaambi sisu i luciinzu ve mu wosuku muutu.

³ Fanë livulë beenë fabë yivaandi n'fwiili wulëkwisaangë kadi ntaangu mu kun'kaambë : “Ntabuli simpakë yimunë mbeenyaami”.

⁴ Mpaapë vyaasi, nzoonzi wulëmaangaangë, kasi wusë tubë : “Cyelikë miinu sisu ve mu Nzaambi i yisë n'cinzikë wosuku muutu ko,

⁵ kasi bo n'fwiili awu wulë mu kum'paangë mpokoongu, miinu yakun'zabikini siduunji syaandi, mu kumaangë naandi, mu kweendë i kwiisë wukum'pangisi n'tu kutaatë.” »

⁶ Fumu wusë be tubë : « Yuwaano manë mën'tubë nzoonzi yike yi mëvaangë mëbi.

⁷ Cibeeni, Nzaambi wusë n'vaanë nduunji ko ke banë kusoolë bëke losukaangë bwiilu ku bwiilu, muunyi ku muunyi? Wun'volë bitu mu kubëvatule?

⁸ Miinu beeno yikaambë: naandi wulengë kubëvangilë nduunji. Kasi, bunë Mwaanë muutu wun'kwisë, wukuzakini ciminu fë moongu butotwe? »

Sasafë yi Falisyaanu i cinoongë mpaku

⁹ Yeesu wusë tubë yivaandi sasafë ayi, mu cibilë ci banë bëlëbalaangë ti baveekë bësulëmë fë nduunzi Nzaambi, i bëlëmonaangë bën'ka baatu kwaandi vwiili :

¹⁰ « Baatu bwaali bisë kweendë ku n'zo-Nzaambi mu kusambilë. Wumweekë wabë Falisyaanu i wun'ka cinoongë mpaku.

¹¹ Falisyaanu kutelëmë i bo kulësambilë mu cibeenzë cyaandi ci n'timë : “A Nzaambi yaami! Miinu yakutoondë mu cibilë, yikeeli ko bo buke baatu bën'ka bëkeeli biifi, baatu bëbi i banë bën'valaangë. Miinu yakutoondë cibilë yikeeli ko buke cinoongë mpaku ocyo.

¹² Miinu yin'kaangaangë n'sweelë bilumbu byooli mu lumiingu i yivaanaangë cikuuku cimweekë ci kuumi mu byaami byooso.”

¹³ Cinoongë mpaku wusë telëminë cinaanu, i wusye podi ko kuvumbulë ntalu ku yilu. Kasi naandi wulëbulaangë fë n'timë i wulëtubaangë : “A Nzaambi, n'fwiili cyaali, cibilë yilë n'sumuci!”

¹⁴ Miinu yilukaambë, bëtubë Yeesu, cyelikë, muutu owo wabë wusulëmë yimunë Nzaambi bunë kwavutukë ku bwaalë bwaandi, kasi yaku ti Falisyaanu. Licyelikë, wosuku wuyizanjikë wun'kulukë kasi wunë wun'kulukë wun'zanjiku. »

Yeesu wasëmë bibabanë

¹⁵ Baatu bëlëtwaalaangë bibabanë kuke Yeesu bwiinji kubëtendikë myooko. Bamoni katyoobo, bilaanzi bisë bëseembë.

¹⁶ Kasi Yeesu wusë belëmë ke bibabanë i wusë tubë : « Biikaanu bibabanë bisë ke miinu! Bëfuunjaanu ko, cibilë Lwaangu lu Nzaambi luke dedë mweekë bo buke baawu.

¹⁷ Licyelikë, yilukaambë : wosuku wun'kaambu kwaakë Lwaangu lu Nzaambi dedë buke cimwamwanë, naandyoowo, cyelikë, kusë n'kotë kwaawu ko. »

Muutu wu cisinë

¹⁸ Fumu mweekë yi Sizwiifë wusë kufulë Yeesu : « A N'loonji wumboti, mbici yifwenikini kuvaangë mu kubakë luziingu lu sakë yi sakë? »

¹⁹ Yeesu wusë n'kaambë : « Cibilë-mbici wukun'teelë muutu wumboti? Muutu ve wumboti, kanuku wo naveekë Nzaambi vwiili.

²⁰ Njeeyi wuzabisi mikaakë: “Keelë wulëvaalë, keelë wulëvoondë muutu, keelë wulëkwiibë, keelë wulëvaangë cimbaanji ci lupuutu mu wosuku muutu, cinzikë tataaku i mamaaku.” »

²¹ Libakëlë beenë lisë vutulë : « Miinu yicinzikë mikaakë yooso oyo kutatikilë fanë bubwabwanë bwaami. »

²² Bunë kwayuwu katyoobo, Yeesu wusë n'zabikini: « Cimweekë cin'kaambooso yaaku: sumbisi byakë byooso wubakisi i kabë simboongo ke biyeembi, oboobo njeeyi wum'bakë businë kunë mëyilu. Yisë wukun'daandë. »

²³ Kasi bunë libakëlë beenë kwayuwu katyoobo, naandi wusë ba mu cyuundë cibilë naandi wabë cisinë cinenë.

²⁴ Yeesu wusë kumonë ti naandi wabë mu cyaali i wusë tubë : « Butudë beenë ke bisinë mu kukotë ku Lwaangu lu Nzaambi!

²⁵ Butudë beenë mu cibulu bën'teelë samu mu kuvyokilë fë livulu li ntuumbu, kasi mwiinji kutudë ke cisinë mu kukotë ku Lwaangu lu Nzaambi. »

²⁶ Banë bëlëkuwaangë Yeesu, bisë tubë : « Mu lyaawu nani wum'podi kuvuukë? »

²⁷ Yeesu wusë kuvutulë : « Lyaawu olyo mëvangulu mpa ke baatu, kasi ke Nzaambi, litudë likeeli ko. »

²⁸ Mu lyalyooli, Pyeelë wusë tubë : « Yuwo, beeso twavubikë byakë byooso binë tubakë, mu kukulaandë. »

²⁹ Yeesu wusë bëkaambë : « Licyelikë, ningë muutu wun'vubikë n'zwaandi, kaambofo n'kasyaandi, baanë baandi bë nguli, libaambë lyaandi i baanë baandi mu Lwaangu lu Nzaambi,

³⁰ naandi wum'bakë mpaapë mu ntaangu be yiiyi i mu buloongo bu ntwaalë yikwisë naandi wun'tambulë luziingu lu sakë yi sakë. »

Yeesu mu vyaasi yin'tatu wazabikini lufwa i luvulumuku lwaandi

³¹ Yeesu wusë natë likuumi bë bwaali li bilaanzi byaandi i wusë bëkaambë : « Yuwaano, beeso twan'kweendë ku livulë li Yelusaleemë, kunë kun'vangininë makë mooso manë mibici bësonikë mu cibilë ci Mwaanë muutu.

³² Bëkun'lekulë ke bo bëkaambu kuzaabë Nzaambi, bo bëkun'dyeengë, bëkun'fiingë i bëkun'taminë matë.

³³ Baawu bëkum'bulë sikoti si nzibulë-mbumë i bëkun'voondë. I fë cilumbu cin'tatu naandi wun'vulumukë. »

³⁴ Kasi bilaanzi bësye zikulë ko maambu be moomo. Suundu yi maambu be moomo yabë yiswaamë i baawu bësye zaabë ko manë mëlëtubë Yeesu.

Yeesu wabelusi mpofo

³⁵ Yeesu kwabelëmë ku Yeliko, kosuku mpofo mweekë wabë wukalë mu ndaambu nzilë i wulëloombaangë simboongo.

³⁶ Abu kwayuwu nkoongë baatu yilëvyookë, naandi wusë kufulë mbici obyo.

³⁷ Bisë kun'vutulilë ti, Yeesu li Nazaleetë wulë mu kuvyookë.

³⁸ Oboobo, naandi wusë losukë : « A Yeesu, li Mwaanë Daviidë, n'fwiili cyaali! »

³⁹ Bo bëlëlyaatë fë ntwaalë bisë kun'tundilë bwiinji kukoolë biyoko, kasi naandi wusë bweelë kulosukë yi mëngolo mooso : « A Mwaanë Daviidë, n'fwiili cyaali! »

⁴⁰ Yeesu wusë sikëmë, i kutumisi bën'twaalë. Bunë mpofo wusë belëmë yaandi, Yeesu wusë n'kufulë :

⁴¹ « Njeeyi mbici wun'toombë yivaangë mu njeeyi? » Naandi wusë n'vutulilë : « A Fumu, mpaangisi kube monooso. »

⁴² Yeesu wusë n'kaambë : « ngete, ciminu cyaaku cyakuvuuci. »

⁴³ Kususukulabu, naandi wusë be monë i wusë laandë Yeesu mu ke dumisyaangë Nzaambi. Mboongu yooso yamoni lyalyooli i yisë ba yivaandi mu kudumisi Nzaambi.