Liikë 17 - N’KANGULU WUMOONË

Lisumu i n'leenvo

¹ Yeesu wukaambë bilaanzi byaandi : « Kusë yin'tubë ko maambu mënatë baatu mu kusumukë. Kasi lusifu olo ke wunë wun'vaangë lyalyooli!

² Mëyoolë mu naandi bën'kaangë mu cimenu limanyi linenë i kun'lakë mu m'bu, yikuvangisi kubwa mu lisumu wumweekë mu bibabanë.

³ Keelaanu! » « Ningë mwanaaku nguli be kuvaangë libi, n'vaanë ndoonji yifwenikini. Ningë naandi wube nyotëkënë livaangë lyaandi, n'lenvukilë.

⁴ Ningë naandi wube kusafulë saambwali li vyaasi mu cilumbu i kadë vyaasi naandi wun'kwisë mu kukukaambë : “Miinu yanyotëkënë”, njeeyi kun'lenvukilë. »

Ciminu

⁵ Mimbunzi bëkaambë Fumu : « Tukusi ciminu. »

⁶ Fumu wusë cikunë : « Ningë beeno luke yi ciminu cicyeeci dedë mweekë lungeenzë lu mutalëdë, beeno kupodi kutubë ke n'ti owo, “Tumukë i we simimi mu m'bu” i wuluvitikilë. »

Cisalu ci ciseelu

⁷ « Lwe biilaano lyaliili : nani mu beeno ke ciseelu cin'vatë, kaambofo ci luungë bibulu. Bunë kum'monë ciseelu cin'fuminë ku sisolë, naandi sya wun'kaambë : “Lengë kwiisë kukalë fë meesë?”

⁸ Moniko, tiilyoko, naandi wukun'kaambë : “Mbelikilë biliiwu byaami, i viinji binkuutu bwiinji wukun'salilë ntaangu yo miinu yin'liilë i yin'nwiinë. Vandi ofo, njeeyi kupodi kwaaku kulya i kunwa mu yaaku ntaangu.”

⁹ Naandi wusye toondë ko ciseelu cyaandi abu kwavaangë mo kun'tuumisi, bwaawu kwe?

¹⁰ Bo bumweekë, beeno yiviinu, mooti beeno lun'vangisi mo bëlutumisi, tubaanu : “Beeso yiviitu biseelu bi buunë. Beeso twavaangë mo tufwenikini kuvaangë.” »

Yeesu wabukë kuumi li baatu babë yi bwaasi

¹¹ Bunë Yeesu, wulëkwendë ku Yelusaleemë, naandi wusë vyokilë fë mëkabë-ndilu më Samali i më Ngalilee.

¹² Naandi wukotë ku bwaalë bun'viipë, likuumi li bangë bwaasi bisë kwiisë mu ludyengunu lwaandi. Baawu bisë telëmë cinaanu,

¹³ i bisë kulosukë : « A Yeesu, a Fumu, tufwiili cyaali! »

¹⁴ Yeesu we bëmoni i kubëkaambë : « Ye yileesyaanu ke singangë-Nzaambi. » Ntaangu bëlëkwendilë, baawu bisë sundilë kubuku.

¹⁵ Wumweekë mu baawu, abu kwamoni ti naandi wabuku, wusë lengë vutukënë mu ke dumisyaangë Nzaambi mu mbeembu nkamu.

¹⁶ Naandi wusë yilakë mu maalu më Yeesu, mbuuzu fë n'toto i wusë n'toondë. Muutu be woowo wabë musë Samali.

¹⁷ Yeesu wusë kube tubë : « Likuumi lyakë lyooso libe buku, bwaawu kwe? Kuni kukeeli livwa limesi?

¹⁸ Muutu ve wusë ba cisëmaanzë mu kuvutukë mu kutoondë Nzaambi, kanuku wo mweeni awu? »

¹⁹ Tee Yeesu wusë n'kaambë : « Manë n'telë, i we yeendi. Ciminu cyaaku cyakuvuuci. »

Lwisulu lu Lwaangu lu Nzaambi

²⁰ Sifalisyaanu bisë kufulë Yeesu ntaangu mbici yin'kwisilë Lwaangu lu Nzaambi. Naandi wusë bëvutulilë : « Lwaangu lu Nzaambi lusë n'kwisilë kuve buke ciimë cim'monikë mu meeso.

²¹ Bisë n'tubë ko: “Monaanwe, naandyaawu afa!” Kaambofo : “Naandi wuke afa!” Cibilë, lwe zaabyaanu lyaawu, Lwaangu lu Nzaambi luke fë meeyiinu. »

²² Tee naandi wusë kaambë bilaanzi : « Ntaangu yin'kwisë yinë beeno lun'toombë kumonë Mwaanë muutu keti fë cilumbu cimweekë, kasi beeno lusë kum'monë ko.

²³ Bëlukaambë : “Monaanu lyaawu!” Kaambofo : “Monaanu afaafa!” Kasi, leembwaanu kweendë, nudumyaanu ntiinu ko.

²⁴ Dedë mweekë lusyeemu lun'kalukë ku yilu i lun'lesikë sosu mweekë yi sosu mesi, bwaawu bum'beelë Mwaanë Muutu mu cilumbu kun'kwisilë.

²⁵ Kasi bufwenikini ntetë naandi kumonë mpaapë simpasi i bëkum'bumë ke baatu bë bubwayi aci.

²⁶ Manë mëvangënë mu ntaangu Nowee, mën'vangënë bo bumweekë mu bilumbu bin'kwisilë Mwaanë Muutu.

²⁷ Baatu bëlëlyangaangë i bëlënwangaangë, bëlëkwelësënaangë i bëlëkweesyaangë baanë baawu, tee yi cilumbu cinë Nowee kukotilë mu likuumbi. Ngami yiyituukë i yivangisi bakë booso kufwa.

²⁸ Bum'beelë bo bumweekë yivaandi mo mëvangënë mu ntaangu Lootë : baatu bëlëlyangaangë i bëlënwangaangë, bëlësuumbaangë i bëlësumbisyaangë, bëlëkunaangë i bëlëtulikaangë.

²⁹ Kasi, cilumbu cyo Lootë kubotukë ku Sodoomë, Nzaambi wusë nokisi n'vulë mbaasu, yivangisi kuvoondë bakë babooso.

³⁰ Bum'beelë bo bumweekë cilumbu cyo Mwaanë Muutu kun'kwisilë. »

³¹ « Munë cilumbu be ciinë, wunë wum'ba fë yilu beedi yi n'zwaandi i wum'ba yi biimë byaandi mu kati, sye fwaanë ko kutuukë mu kubiboongë. Mpilë mweekë, wunë wum'ba mu sisolë sye fwaanë ko kuvutukë mu n'zwaandi.

³² Lwe tebukaanu moonyi mu n'kasi Lootë.

³³ Wunë wun'toombë kukeelë luziingu lwaandi, wulunyambëkini, kasi wunë wulunyambikini, wulusweekë.

³⁴ Miinu yilukaambë, munë bwiilu beenë, baatu bwaali bëm'ba fë ciikë cimweekë : wumweekë bëm'boongë i wumesë wun'syaalë.

³⁵ Bëcyeetu bwaali bën'nikë lungeenzë fë cimweekë : Wumweekë bëm'boongë i wumesë wun'syaalë.

³⁶ Bëbakëlë bwaali bëm'ba mu solë, wumweekë bëm'boongë i wumesë wun'syaalë. »

³⁷ Bilaanzi bisë n'yufulë : « Fa mbi lyaawu lin'vyokilë, a Fumu? » Naandi wusë vutulë : « Fanë fëm'ba vuumbi, faawu yivaandi fë ndukuninë tusuci. »