Liikë 16 - N’KANGULU WUMOONË

Cisasi cike buvavambë

¹ Yeesu wusë kaambë bilaanzi byaandi : « Libakëlë lin'viipë li cisinë lyabë yi cisasi i bisë kun'kaambë : cisasi ocyo wum'pudyaangë businë bwaaku.

² Fumu wusë n'telë i wusë n'kaambë : “Maambu mbi yilë mu kuwu mu njeeyi? Leesyo miinu bisalu byaaku, cibilë njeeyi wusë be podi ko kuba cisasi cyaami.”

³ Cisasi wusë kutubilë mu naveekë : “Fumwaami sya kum'pokunë cisalu. Buni bukusilë? Miinu yikeeli ko mpaapë mëngolo mu kusalilë mu n'toto i yim'ba mu sonyi mu ke loombaangë.”

⁴ Oboobo! Miinu yizabisi linë yake n'vaangë mooti bëkum'botulë fë cike cyaami, baatu mbasi bëkun'kwaakë mu sinzo syaawu!

⁵ Mu lyaawu naandi wusë kutelë wumweekë-wumweekë mu banë bëlëdefë cyosuku ke fumwaandi. Naandi wusë kaambë ke wun'tetë : “Bya bikwa njeeyi wun'defë fumwaami?”

⁶ Naandyaawu wusë n'vutulilë : “nkamë li mikendëmë li mëfutë më oliivë”, Cisasi cisë n'kaambë : “Cipengëlë cyaaku cyawaalë, Lengë kalë fësi i sonikë mëkuumë më taanu.”

⁷ Naandi wusë kaambë wumesë: “Njeeyi bya bikwa wun'defë?” Naandyaawu wusë cikunë : “Nkamë li saaku li faliinë.” Cisasi wusë n'kaambë : “Tala cipengëlë cyaaku i sonikë naanë li mëkuumi.”

⁸ Fumu wusë dumisi cisasi ci lupuutu, cibilë naandi wusalilë yimunë buvavambë. Mu lyaawu, bo bëke mu buloongo abu, bwiinji buvavambë fë ntwaalë bayaawu i bo buke mu cyeseesë. »

⁹ Yeesu wusë bëtubë : « Miinu yilukaambë : vaangaanu bundiku yi bayiinu mu simboongo si lupuutu lu buloongo be buubu, bwiinji ntaangu simboongo beenë simaninë mu beeno bëlutambulë mu sinzo sin'kalilë.

¹⁰ Wunë wuke wusulëmë mu mwa biimë bicyeeci, wuke yivaandi wusulëmë mu biimë binenë. Wunë wuke yi lupuutu mu mwa biimë bicyeeci, wuke yivaandi lupuutu mu biimë binenë.

¹¹ Mooti beeno lukeeli ko lusulëmë mu ntekwiinu yikusalilë businë bu nyeengulu bu buloongo be buubu, nani wum'podi kuluvaanë businë bucyelikë?

¹² Mooti beeno lukeeli ko lusulëmë mu businë bu baatu bën'ka, nani wuluvaanë liboti liinu bëlulundile? »

¹³ « Cisasi ve cim'podi kusalilë fumu wali : kaambofo, naandi wun'leendë wun'tetë i wun'zolë wumwaali, kaambofo wun'fyaatë ke wun'tetë i wum'baayi wumwaali. Beeno lusë m'podi ko kusalilë Nzaambi i luboongo. »

N'kaakë i lwaangu lu Nzaambi

¹⁴ Sifalisyaanu, bulëkuwaangë mëbuungu makë mooso omo i bisë ndyeengë Yeesu, cibilë baawu bëlëzolaangë simboongo.

¹⁵ Yeesu wusë bëkaambë : « Beeno, baatu bën'leesi ti lusulëmë fë meeso më baatu, kasi Nzaambi wuzabisi mitimiinu. Cibilë linë baatu bëm'monë ti like beenë bunenë fë meeso më Nzaambi ciimë kwaandi vwiili. »

¹⁶ « Ntaangu yi n'kaakë Moyiizë i mëbuuku më mibici yiziingë tee mu ntaangu Za-Batiisë. Kutoonë ntaangu beenë, Mpolu Mboti yi Lwaangu lu Nzaambi yilë mu kutendukë, i wosuku muutu wulë mu kuvaangë mëngolo mu kukotë kwaawu.

¹⁷ Kasi li yilu i n'toto bin'zimbilë boobo kwaandi yi mwa cisonë cicyeeci cimweekë ci n'kaakë cim'bwa. »

¹⁸ « Lyosuku libakëlë wum'botulë n'kasyaandi fë likweelë, i wun'kweelë n'cyeetu wun'ka, wun'vaalë. Wunë wun'kweelë n'cyeetu bëbotulë fë likweelë, wun'vaangë bunduumbë. »

Sasafë yi libakëlë li cisinë i Lazaalë

¹⁹ « Yabë libakëlë lin'viipë li cisinë wulëvwaataangë binkutu bi noofi bi bukaalu i wulëvaangaangë kadë cilumbu misaangu yinenë.

²⁰ Ciyeembi cimweekë, lizinë Lazaalë wulë beelë simbeenzi, wabë wunonukë fë ntwaalë livitu li n'zo li cisinë.

²¹ Naandi wulëzolaangë kulya biselëkëtë bilëbwangaangë kusi meesë më cisinë. Kasi yivaandi simbwa silëkwisaangë mu kuveendë sibeenzë syaandi.

²² Ciyeembi wusë fwa i siyaanzi bisë natë kuke Abalaamë. Cisinë yivaandi wusë fwa i bisë n'ziikë.

²³ Naandi wumonë mpaapë simpasi ku buloongo bu baatu bëfwa. Naandi wusë vum'bulë ntalu, i wusë talilë Abalaamë i Lazaalë wabë fë likumë lyaandi.

²⁴ Mu lyaawu, naandi wusë losukë : “A Tataami Abalaamë, nfwiilë cyaali i filë Lazaalë mu kubondikë lunzalë lwaandi mu masi bwiinji yibondikë ndakaami cibilë miinu yilë mu kumonë mpaapë simpasi mu kati ku mbaasu ayi.”

²⁵ Kasi Abalaamë wusë tubë : “A mwanaami, tebukë moonyi ti njeeyi wubakë mpaapë businë mu luziingu lwaaku, vandi kasi Lazaalë wumonë mpaapë simpasi. Abuubu, wakun'tambulë afaafa lubondulu lwaandi, kasi njeeyi weekë mu mënyonyi.

²⁶ Vandyooso, fëke n'vwiilë wunenë fëke beeno yi beeso. Bwaawu, banë bën'toombë kuvyokilë afa mu kweendë ke beeno, bë kusë m'podi ko i bë kusë m'podi ko yivaandi kutuukë kuke beeso yi fo njeeyi wukeeli.”

²⁷ Cisinë wusë tubë : “Mënaanë maaku ata! Filë vwiili Lazaalë ku n'zo Tataami,

²⁸ kunë kuke baanë baami bë nguli bëtaanu. Naandi weendë mu ke bëbikinyi bwiinji bëleembu kwiisë aku kuke mënyonyi.”

²⁹ Abalaamë wusë vutulë : “Baanë yaaku bë nguli bëke yi Moyiizë i Mibici mu kubëbikini. Bwiinji baawu be bëyuwulu.”

³⁰ Cisinë wusë tubë : “Moniko, Lyaawu lisye fwanëkënë ko a Tataami Abalaamë. Kasi ningë muutu wun'fuminë kuke bo bëfwa, i kweendë ke bëzakënë, fa foofo, baawu bëm'balulë mëvaangë maawu.”

³¹ Kasi Abalaamë wusë n'kaambë : “Ningë baawu bësë n'zolë kuve kuwulu Moyiizë i mibici, baawu bën'kusë n'vitikë kuve, keti muutu mweekë wulëvulumukë mu bo bëfwa.” »