Liikë 15 - N’KANGULU WUMOONË

Sasafë yi limemë lizimbilë

¹ Binoongë mpaku byooso i bisumuci bëbelëmë fëke Yeesu mu kun'kuwu.

² Sifalisyaanu i miloonji n'kaakë bëlësungaangë Yeesu. Baawu bëlëtubaangë : « Muutu owo, wun'tambulë bisumuci i wun'kwambulë yimunë baawu. »

³ Mu lyaawu, Yeesu wusë bëteelë sasafë ayi :

⁴ « Ningë n'viipë mu nkoongiinu, wuke yi nkamë li mëmemë i naandi wun'zimbisi limweekë mu maawu, naandi wusë biikë ko livwa li mëkumë-vwa mën'ka mu civakë mu kwe toombaangë linë lyazimbilë tee yi fanë naandi wukulimonë?

⁵ Bunë naandi kulimonë, wum'ba mu liyaanji: naandi kutuulë limemë fë yilu mëvangëti maandi,

⁶ i bunë kwavutukënë ku n'zwaandi, naandi wusë kucikë sindiku syaandi i bayaandi, i wusë bëkaambë : “Lwe yangëlëlyaanu yimunë miinu, cibilë miinu yamonë limemë lyaami linë lyabë lizimbilë.”

⁷ Bo bumweekë, yilukaambë, bum'ba liyaanji livyokilili ku yilu mu cibilë ci n'sumuci wumweekë wun'toonë luziingu lumoonë yi mu livwa li mëkumë-vwa li baatu bësulëmë bën'kaambu n'ciinzë mu kuvilukë. »

Sasafë yi likutë li mboongo limonikë

⁸ « Kaambofo, n'cyeetu mbici, mooti naandi ke yi likuumi li mëkutë li mboongo i naandi bunë kun'zimbisi limweekë, wun'kaambu kutatikë mwiindë, wun'kaambu kukombulë n'zo, i wusë n'toombë ko yi bungelë tee fanë kulimweene?

⁹ Mooti naandi walimonë, wun'telë bayaandi i sindiku syaandi i wubëkaambë : “Sangilaanu yimunë miinu, cibilë yamonë likutë li mboongo lyo yizimbisi!”

¹⁰ Bo bumweekë, miinu yilukaambë, fëke liyaanji fë meeyi siyaanzi si Nzaambi mu n'sumuci wumweekë wun'vilukë. »

Sasafë yi mwaanë wuzimbilë i wumonikë

¹¹ Yeesu wutubooso : « Muutu mweekë wabë yi baanë bwaali bëbakëlë.

¹² Cilesi wusë kaambë taatë : “Ata, mpaani cikuuku ci lifwa liitu cifwenikini mu miinu.” Fa foofo, taatë wusë kabë lifwa lyaandi mu baanë baandi bë bwaali.

¹³ Mwa bilumbu byavyooci, mwaanë cilesi wusë sumbisi cyaandi cikuuku ci biimë i ke yendaangë yimunë simboongo syaandi ku si cinaanu. Fa foofo, naandi wusë zingilë mu n'vuusu, i wusë nyambikini boobo byakë byooso byabë yaandi.

¹⁴ Bunë naandi kwamani kupudi byakë byooso, cibuyi cinenë cisë kwiisë mu si, i wusë toonë kukaambu binë bifwenikini.

¹⁵ Naandi wusë ke yendaangë mu ke yituuli mu cisalu ke muutu mweekë musë si, wusë n'filë mu sisolë syaandi mu kuluungë singulu.

¹⁶ Naandi wabë yin'zalë kulya mëkuundi mëlë lyangaangë singulu, kasi muutu ve wukun'vaanë maawu.

¹⁷ Fa foofë, naandi wusë balë zingulwaandi i wusë tubë : “Bisasi byooso bi tataami bike yimpaapë ndiiwu yibëfwenikini. Kosuku miinu aku yikeeli yilë mu kufwa nzalë.

¹⁸ Miinu yake n'vutukënë ke tataami i miinu yikun'kaambë : Ata, miinu yasumukë fë nduunzi Nzaambi i fë ntwaalaaku.

¹⁹ Miinu yisye be fwaanë ko ti njeeyi wukun'teelë mwanaaku, cin'tuli kwaaku bo buke wumweekë mu bisasi byaaku.” »

²⁰ Bo kwamanë n'telë, wusë vutukë ke tataandi. « Bunë kwabë cinaanu yi n'zo, tataandi wusë n'talilë i wusë ba mu cyuundë. Naandi wudumë-ntiinu mu ke n'dyengënë, kum'buumbë i kun'fifë.

²¹ Mu lyalyooli, mwaanë wusë tubooso : “Ata, miinu yasumukë fë nduunzi Nzaambi i fë ntwaalaaku, yisye be fwaanë ko ti njeeyi wukun'teelë mwanaaku…”

²² Kasi taatë wusë kaambë biseelu byaandi : “Lengë twalaanu lizweeli li noofi i n'vwiicyaanu lyaawu. N'tuulaanu neelë mu luzalë i mëpaapë mu maalu.

²³ Twaalaanu ngoombi yivoongë i voondaanu yaawu. Twe vaanjyaanu n'saangu i twe saanjyaanu,

²⁴ cibilë ti mwanaami lumonaanu awu wabë wufwa i naandi wavutukënë mu luziingu, wabë wuzimbilë i yabe m'monë.” » Bisë toonë n'saangu.

²⁵ « Munë ntaangu beenë, mwaanë wu n'kuluutu wu libakëlë be woowo wabë ku sisolë. Fë luvutukulu lwaandi, bunë kwabelëmë yi n'zo, wusë kuwu biyoko bi bisikulu i mëcinu.

²⁶ Naandi wusë telë wumweekë mu biseelu i wusë n'yufulë manë mëlëvangënë.

²⁷ Ciseelu wusë n'vutulilë : “Nkombaaku wavutukënë i tataaku wavangisi kuvoondë ngoombi yivoongë, cibilë ti naandi wamonë mwanaandi wavutukënë yi buvinyi.”

²⁸ Mu lyalyooli, mwaanë wu n'kuluutu wusë booso mu fiti i wumaangë kukotë ku n'zo. Tataandi wusë basikë mu kubondililë mu kukotë.

²⁹ Kasi mwaanë wuvutulilë tataandi : “Yuwo, yeekë mpaapë mivu yinë miinu yikusalilaangë, i miinu sye kumanginë vyaasi ko mu wumweekë mu tutumu twaaku. Mu kumonë kwaandi njeeyi wusye kum'paanë vyaasi ko keti ngoombi yimweekë bwiinji yivaangë n'saangu yimunë sindiku syaami.

³⁰ Kasi bunë mwanaaku awu wavutukë, naandi wo wapudi businë bwaaku booso yimunë bëcyeetu bë nduumbë, mu naandi, wavoondë ngoombi yivoongë!”

³¹ Taatë wusë n'kaambë : “A mwanaami, njeeyi wukalë-wukalë yaami i byakë byooso bike yaami, byaaku yivaandi.

³² Kasi beeso tufwenikini kuvaangë n'saangu i kusangilë cibilë ti nkombaaku awu wabë wufwa i naandi wavutukënë mu luziingu, wabë wuzimbilë, i wamonikë!” »