Liikë 11 - N’KANGULU WUMOONË

Yeesu i n'saambu

¹ Cilumbu cimweekë Yeesu wulë sambilaangë fë mwa mbiinji. Bunë kwamani, wumweekë mu bilaanzi byaandi wusë n'kaambë : « A Fumu, tuleesi buni bukusambilë bo Za kusinë bilaanzi byaandi. »

² Yeesu wusë bëkaambë : « Mooti lwake n'sambilë, kutubaangë : “Ata! Lizinë lyaaku lye ba saantu. Lwaangu lwaaku lwiisë,

³ Tuvaanë buyifanwabu limpa liitu li cyosuku cilumbu!

⁴ Tulenvukilë mësumu miitu, cibilë tun'lenvukilaangë banë bëtuvaangaangë simbi tulekuli ko mu lusengulu.” »

⁵ Yeesu wusë be bëkaambë : « Mooti lyaliili: nani mu nkoongiinu, wuke yi ndiku wuken'zakënë ku bwaalë bwaandi fë katyaasi ku bwiilu yikun'kaambë : “A mwa, ndefisi mëmpa më tatu.

⁶ Cibilë ndikwaami mweekë wafuminë mu mweendo wakusundilë ke miinu i yikeeli ko yi cyosuku ciimë cikun'vaanë.”

⁷ Mooti ndiku be yooyi wukun'vutulilë ku kati ku n'zo: “Mbiici n'sikë! Twayikangilë livitu mu sabi, Miinu i baanë baami tweekë fë ciikë. Miinu yisë be podi ko kube telëmë mu kukuvaanë mëmpa.”

⁸ Cyelikë, yilusisiminë, mooti naandi kusë n'telëmë ko mu bundiku bwiinji wun'vaanë, naandi wun'telëmë kwaandi mu kun'vaanë byosuku kun'vwa n'ciinzë cibilë wayaandi ke mu kutatëminë kukaambu sonyi.

⁹ Miinu yilukaambë : loombaanu i lun'tambulë. Toombaanu i lum'bakë. Dodumunaanu i bëluzibulilë.

¹⁰ Cibilë, wosuku wun'loombë, wun'tambulë. Wunë wun'toombë wum'bakë i bën'zimbulilë livitu ke awu wun'dodumunë.

¹¹ Taatë mbici mu nkoongiinu, wum'podi kuvaanë mwanaandi nyokë wunë wukun'loombë mbisi?

¹² Kaambofo, mooti wun'loombisi lyaci, naandi kun'tambikë cineengë?

¹³ Oboobo, mooti beeno ludiifë n'timë luzabisi kuvaanë baanë biinu biimë biboti. Kwisilë buni, Tatiinu wuke ku yilu wun'kaambu kuvaanë Ciluunzi ci Saantu ke banë bëkun'loombë! »

Yeesu wavutulilë mbeembu mu lyaambu bën'fwitikilë

¹⁴ Cilumbu cimweekë, Yeesu wulë kumbisi ciluunzi cibi cilë vangisyaangë libakëlë lin'viipë kuba bubabë. Bunë ciluunzi cibi cyabasikë, libakëlë lisë ba mu kutubë. Munë nkoongë, baatu bisë kubwa libobo.

¹⁵ Kasi, bën'viipë bisë tubë : « Mati mu lutumu lu Belëzebuulë, n'kuluutu biluunzi bibi, mwaawu kulë mu kukulilë biluunzi bibi. »

¹⁶ Bën'ka, mu kun'sokë libuungu, baawu bisë n'loombë ciliimbu ci kwaatë-yekë cin'leesi ti naandi wufuminë ke Nzaambi.

¹⁷ Kasi Yeesu wulëzaabaangë simbalulu syaawu. Naandi wusë bëkaambë : « Losuku Lwaangu lunë lukabësënë yi lwaveekë lun'cyamukë, sinzo sim'bulumukë sin'ka fë yilu sinzo simesë.

¹⁸ Mooti Satënë wulë mu kuyinwanisi naveekë yi naveekë, lwaangu lwaandi kuzingilë bunye? Abu lun'tubë ti, miinu yin'kulilë biluunzi bibi mu lutumu lo lulë mu kum'paanë Belëzebuulë.

¹⁹ Ningë ti miinu yibëkulilaangë mu nteku be yiiyi, nani wun'vaanë ke baatu biinu lutumu lukubëkulile? Baatu biinu baveekë bën'leesyaangë ti beeno luziimbu.

²⁰ Licyelikë yilukaambë, kanuku mu luleendo lu Nzaambi mwaawu miinu yin'kulilaangë biluunzi bibi, bwaawu Lwaangu lu Nzaambi lwakutuukë tee ke beeno. »

²¹ « Mooti muutu wuwaalë n'viingu wun'luundë n'zwaandi, businë bwaandi booso buke mu luswamunu lumboti.

²² Kasi mooti muutu wukun'vyokilili mëngolo wakun'yisilë i kun'lungilë mpakë, naandi wukun'vokënë binwanunu kube siilaangë lufyaatu, i naandi wun'kabulë byakë byooso binë kwaboongë. »

²³ « Wunë wukeeli yi miinu ko mbeenyaami. Wunë wun'kaambu kun'zudi mu lubundunu wun'nyambëkënë. »

Luvutukunu lu ciluunzi cibi

²⁴ « Mooti ciluunzi cibi cyabasikë mu muutu, cyaawu kutaabë bwendi simbiinji siyumë, kutoombë faamë kufwenikini kuvundilë. Abu kun'kaambu kubakë fanë fë kukalilë, naandi yekë kutubë : “Miinu yake n'vutukënë mu n'zwaami yo yibiikë.”

²⁵ Naandi wun'vutukënë i kuyizakënë ba yikombulë i bayilulikë.

²⁶ Mu lyalyooli naandi wun'kwendë ke boongë saambwali lyooso lin'ka li biluunzi bivyokilili naandi bubaalu. Baawu kuvutukënë mu n'zo i kukalë mwaawu. Fa foofë, simpasi si muutu be woowo kulutilooso yi sinë syabë yaandi ntetë. »

Nyeenzi yi cyelikë

²⁷ Fo Yeesu kulëtubilë katyoobo, n'cyeetu mweekë mu nkoongë wusë bulë mbeembu i kutubë : « Nyeenzyaandi oyo, n'cyeetu wukunatë mu cibutulu cyaandi i wukuyemikë! »

²⁸ Kasi Yeesu wusë kuvutulë : « Nyeenzi yiveko ke aba bën'kuwu libuungu li Nzaambi i bëlisalilë! »

Lulombulu lu ciliimbu ci kwaatë-yekë

²⁹ Bunë mboongo baatu yiyikukumë fëke Yeesu, naandi wusë tubë : « Baatu bë bubwayi aci, baatu bëbi. Baawu bën'toombë ciliimbu ci kwaatë-yekë, kasi ciliimbu ve cibëveewu kanuku cyo ci Zonaasë.

³⁰ Cibilë, bo bumweekë Zonaasë wabë ciliimbu mu basë Niniivë, bo bwaawu Mwaanë Muutu wum'beelë yivaandi ciliimbu mu mboongo yi bubwayi.

³¹ Mu cilumbu ci Lufundusu, N'kamë-lwaangu wu Waandë wun'telëmë fë ntwaalë baatu bu bubwayi, i wubëfundisi, cibilë naandi wufuminë ku mëbweeti më cinaanu më n'toto mu kuwu, mëbuungu mëwaalë bungelë bu Salomoonë. Afaafa, wukeeli muutu wuvyokilë Salomoonë ko.

³² Mu cilumbu ci Lufundusu, basë Niniivë bën'telëmë fë ntwaalë baatu bë bubwayi i bëbëfuundë, cibilë basë Niniivë bëm'balulë mëvaangë maawu bunë bayuwu ndongulu Zonaasë. Kasi, afa fëke muutu wuvyokili Zonaasë! »

Cyeseesë ci nyitu

³³ « Muutu ve wun'tatikë mwiindë mu kuwusweekë kaambofo mu kuwutuulë kusi cipaanë, tilyooko kuwutuulë fë yilu cicyetukulu bwiinji banë bën'kotë bëmonë cyeseesë.

³⁴ Meeso maaku mëke mwiindë wu nyitwaaku: ningë ti meeso maaku mëke mëboti, nyitwaaku yooso yike mu cyeseesë. Kasi ningë ti meeso maaku mëfwa, oboobo nyitwaaku yike mu citoombi.

³⁵ Bwaawu, keelë cyeseesë cike mu njeeyi cileembu kuba citoombi.

³⁶ Mooti nyitwaaku yooso yike mu cyeseesë, cinamë ve cim'ba mu citoombi, yakë yooso yim'ba yin'waalë cyeseesë, dedë mweekë mwiindë wuvaanë n'nyani mu cyeseesë cyaandi. »

Yeesu wakë n'fuundë Sifalisyaanu i miloonji n'kaakë

³⁷ Bunë Yeesu kwamani kutubë, Falisyaanu mweekë wusë n'telë mu kwambulë ku bwaalë bwaandi. Yeesu wusë kotë i wusë sungëmë fë meesë.

³⁸ Falisyaanu wusë tulumukë bunë kwamoni ti Yeesu wusye sukulë ntetë myooko ko mu kwambulë.

³⁹ Fumu wusë, n'kaambë : « Tala buni beeno lukelili, beeno Sifalisyaanu : beeno lun'cyeesyaangë Li ngaandë li mbuungu i li lubuci, kasi likati, beeno luwaalë bideenzë bi bwiifi i mpaapë bubaalu.

⁴⁰ Beeno biyimbu lukeeli! Nzaambi wuvaangë Li ngaandë, naandi sye vaangë yivaandi likati kwe?

⁴¹ Vaanaanu obyo bike mu simbuungu i tubuci ke biyeembi, i makë mooso mëm'ba mëlyoomë mu beeno. »

⁴² « Lusifu lwiinu olo, beeno Sifalisyaanu! Cibilë lun'vanaangë cikuuku cimweekë ci kuumi mu bikunë biinu, dedë mweekë mëvuvumbë i lantëna, yimunë yivaandi simpilë syakë syooso si mimpoku, kasi lusë n'lengilë moonyi ko nduunji i luzolo mu Nzaambi. Nkanë maambu be moomo maawu lufwenikini kusalilë i kuzimbëkënë ve mën'ka. »

⁴³ « Lusifu lwiinu olo, beeno Sifalisyaanu! Cibilë beeno kuzolë biikë bi ntwaalë mu bizutununu i beeno kuzolë ke bilwaangë sibweekë si luciinzu fë ciyalëlë.

⁴⁴ Lusifu mu beeno! Cibilë beeno luke dedë mweekë mëbuumbë bën'kaambu kumonë i fo baatu bën'lyatilaangë i kuzaabë ve. »

⁴⁵ N'loonji n'kaakë wumweekë wusë n'kaambë : « A Fumu, njeeyi bo wuke mu kutubilë kati obo, mati beeso wulë mu kufiingë! »

⁴⁶ Yeesu wusë n'vutulilë : « Lusifu lwiinu yivaandi miloonji n'kaakë! Beeno lun'tukisyaangë baatu mifunë yike beenë simpasi mu kunatë, i beeno lusë n'nikunaangë kuve keti luzalë mu kubëzudi mu kunatë bifunaawu.

⁴⁷ Lusifu mu beeno! Beeno lun'tuungaangë mëbuumbë mëboti më mibici, mibici yo sinkaakë siinu bëvoondë!

⁴⁸ Bwaawu, beeno lun'leesi ti lwavitikë mëvaangë më sinkaakë siinu, cibilë baawu bëvoondë mibici, i beeno, lulë mu kutuungë mëbuumbë maawu.

⁴⁹ Mu lyaawu Nzaambi, mu bungelë bwaandi wusë tubë : “Miinu mba yibëfilë mibici yimunë mimbunzi. Baawu bën'voondë bën'viipë fë meeyi yaawu i bën'nyokulë bën'ka.” »

⁵⁰ Mu lyalyooli, baatu bë bubwayi, bën'cikunë mëseembu mu mibici bëvoondë kutoonë fanë fëvangininë buloongo.

⁵¹ Kutatikilë fë lufwa lu Abeelë tee lu Zakaali, awu bëvoondë fë meeyi civakululu i n'zo-Nzaambi. Cyelikë miinu yilusisiminë, baatu bë bubwayi bën'cikunë mëseembu më tufwa be tooto!

⁵² « Lusifu mu beeno, miloonji n'kaakë! Beeno lwam'boongë sabi yiluvaanë likanë li kuzibulë livitu yi luzaabu: benuveekë lusë n'kotë ko i beeno lun'kakini kukotë bo bëke yi n'ciinzë mu kukotë. »

⁵³ Bunë Yeesu kwabasikë munë n'zo beenë, miloonji n'kaakë i Sifalisyaanu bisë ba mu likaanzi linenë i bisë n'kufulë mpaapë byuufu bi mpilë ku mpilë yaandi.

⁵⁴ Baawu bëlën'sokaangë mu byuufu mu kum'bakë sintoondo sikun'fwikilë maambu mëbi mu mëbuungu maandi.