Liikë 1 - N’KANGULU WUMOONË

Nsunjikulu

¹ Ndikwaami Tofiilë, Mpaapë baatu bëyelikë kusonikë n'zisi mu maambu mëvangënë fë meeyiitu,

² bo bumweekë bëtukambilë maawu ke simbaanji fë ntonunu, bëmonë i bëbakë cisalu ci kutendulë Libuungu li Nzaambi,

³ bunë yim'balë, bwa yatombilë yivaamë kuzaabë buboti-buboti maambu makë mooso mëvangënë kutatikilë fë ntonunu, mu kumësonikë ke njeeyi, ndikwaami Tofiilë,

⁴ bwiinji njeeyi wubakulë cyelikë ci maambu manë wutambulë.

Yaanzi yatendulë lubutulu lu Za-Batiisë

⁵ Ntaangu Eloodë wabë n'tinu wu Zudee, kwabë ngangë-Nzaambi bëlëteelaangë Zakaali, naandi wabë wun'viipë mu cinguuku ci singangë-Nzaambi si Abya. N'kasyaandi wabë musë likaandë li Aloonë n'kuluutu ngangë-Nzaambi, bëteelaangë Lizabeetë.

⁶ Babë baatu bwaali bësulëmë fë meeso më Nzaambi, i baawu bëlëcinzikaangë deku-dekoo mikaakë yooso i tutumu tooso tu Fumu.

⁷ Kasi baawu bësye ba yi mwaanë ko, cibilë Lizabeetë wabë cisitë i babë bwaali babë banunë.

⁸ Cilumbu cin'viipë, Zakaali wulësalaangë cisalu cyaandi ci bungangë-Nzaambi mu n'zo-Nzaambi, cibilë cyabë cilumbu ci cinguuku cyaawu mu kusalë.

⁹ Bunë bwabë ciipë cyaawu ci singangë-Nzaambi, baawu bëbulë njekë i bësoolë Zakaali bwiinji kukotë ku civingë ci saantu ci Fumu mu kookë n'liinji.

¹⁰ Nkoongë yooso yi bitamaanë yilësambilaangë fë ngaandë fë zoolë yo bëlëkokilaangë n'liinji.

¹¹ Kuzimbukulabu, yaanzi yimweekë yi Fumu yisë monikinë Zakaali. Yaanzi beenë yabë yitelëmë ku lweeku lu mëbakëlë lu civakululu bën'kokilaangë n'liinji.

¹² Bunë Zakaali kwam'moni, naandi wusë tulumukë i wusë ba mu boomë.

¹³ Kasi yaanzi wun'kaambë : « Keelë wulë ba yi boomë, Zakaali, cibilë Nzaambi wacikunë n'saambwaaku. N'kasyaaku Lizabeetë, wum'butë mwaanë wu libakëlë wunë njeeyi wun'vaanë nkuumbu Za.

¹⁴ Njeeyi wum'ba mu liyaanji linenë, i mpaapë baatu bën'sangililë mu lubutulu lwaandi.

¹⁵ Cibilë, naandi wum'ba muutu wunenë fë nduunzi Fumu. Naandi wusë n'nwa viinyi ko, kaambofo mëlafu mëngolo. Naandi wun'waalë yi Ciluunzi ci Saantu, kutoonë munë civumu ci mamaandi.

¹⁶ Naandi wun'vutulë mpaapë baatu bë Islayeelë ke Fumu Nzaambyaawu.

¹⁷ Naandi wun'kwisë buke cipayi ci Nzaambi yimunë ciluunzi i luleendo lu m'bici Eli, mu kuvutulë bundiku bu mëtaatë yimunë baanë baawu i kuvutulë banë bëkaambu kulenvukë mu bungelë bu bësulëmë. Naandi wun'vaangë likaandë libëliminë mu Fumu. »

¹⁸ Kasi, Zakaali wuyufulë yaanzi : « Buni, miinu yin'zabilë ti, maambu be moomo mën'vangënë? Licyelikë, miinu yanunë i n'kasyaami, wakwiibë n'vu. »

¹⁹ Yaanzi kun'vutulilë : « Miinu mi Ngabilyeelë yin'telëmaangë fë nduunzi Nzaambi mu kun'salilë. Naandi na wakun'filë ke njeeyi, mu kukukaambë mpolu be yiiyi yimboti.

²⁰ Kasi njeeyi wusye ta maanë ko mu mëbuungu maami, mo mën'vangënë mu ntaangu yin'dedëkënë, mu bwaawu njeeyi wum'ba libabë, wusë be tubë ko, tee cilumbu cinë maambu ama mëvangënë. »

²¹ Mu ntaangu be yiinë, baatu bëlëciingaangë Zakaali i bisë tulumukë cibilë ti naandi wuvyoosi mpaapë ntaangu ku kati ku civingë ci saantu.

²² Kasi ntaangu yo kubasikilë, naandi wusye bëtubënë yaawu ko, i baatu bisë zaabë ti, naandi cyeendë-meeso kwamonë ku kati ku civingë ci saantu. Naandi wusë bëkambilë maambu mu bivudë bi myooko i wusë ba libabë.

²³ Bunë Zakaali kwamani bilumbu byaandi bi kusalë ku n'zo-Nzaambi, naandi wusë vutukënë ku n'zwaandi.

²⁴ Fë mbusë mwa bilumbu, n'kasyaandi Lizabeetë, wusë ba mu bweembë, i wusë swaamë fë ngoondi taanu, kumonikë ve ke baatu. Naandi wulëtubaangë :

²⁵ « Tala manë Fumu kwavaangë mu miinu : buyifanwabu naandi watoombë kun'kobulë mu linë libe kun'fwiisyaangë sonyi fë ntwaalë bakë booso. »

Yaanzi yatendulë lubutulu lu Yeesu

²⁶ Mu ngoondë yin'samunu, Nzaambi wusë filë yaanzi Ngabilyeelë ku livulë li Ngalilee, li Nazaleetë,

²⁷ kuke cilesi ci cyeetu wucini yi mpeembë, bëbilë kukweelë ke libakëlë bën'telaangë Zozeefë. Naandyaawu wabë ndaandu wu n'tinu Daviidë. Lizinë li cilesi ci cyeetu lyabë Maali.

²⁸ Yaanzi wusë kotë ku n'zwaandi, i wusë n'kaambë : « Ba mu liyaanji! Fumu wakuvaanë muulë wunenë, naandi ke yaaku. »

²⁹ Maali wusë kubaabë n'timë mu maambu mo yaanzi wun'kaambë. Naandi wusë yiyufulë buni bun'kwendilë mbilulu be yooyo.

³⁰ Yaanzi wusë n'kaambë : « Keelë wulë ba yi boomë a Maali, cibilë njeeyi watambulë muulë ke Nzaambi.

³¹ Njeeyi wum'ba mu bweembë, wum'butë mwaanë wu bakëlë wunë wun'vaanë lizinë Yeesu.

³² Naandi wum'ba n'nenë i bëkun'teelë Mwaanë Nzaambi-Mpuungu. Fumu Nzaambi wukum'byaasi n'tinu bunë bubeelë nkaakaandi Daviidë,

³³ i naandi wun'tumi tee yi tee mboongu Islayeelë. Lwaangu lwaandi mësitukulu ve. »

³⁴ Maali wusë kufulë yaanzi : « Buni lyalyooli lim'podi kuvangininë, cibilë ti miinu yicili yi mpeembë? »

³⁵ Yaanzi wusë n'vutulilë : « Ciluunzi ci Saantu cin'kulumukë mu njeeyi, i luleendo lu Nzaambi-Mpuungu lukufukë buke n'vefu. Mu bwaawu, wo wum'butu saantu i bëkun'teelë Mwaanë Nzaambi.

³⁶ Lizabeetë wubutënë yaaku, wulë mu kuciingë yivaandi mwaanë wu bakëlë, keti mu bununu bwaandi. Naandi wo bëlëteelaangë cisitë, weekë mu bweembë bu ngoondi samunu,

³⁷ cibilë ti Nzaambi wusë n'lekaangë lyaambu ko. »

³⁸ Maali wusë tubë : « Miinu ciseelu ci Fumu. Biikë ti maambu mooso mëvangënë bunë wakun'kambilë. » Fë mbusë, yaanzi wusë m'biikë.

Maali wuye monë Lizabeetë

³⁹ Fë bilumbu bilandëkënë, Maali wusë ke yendaangë mëlengë-lengë ku livulë lin'viipë li libweeti limoongo Zudee.

⁴⁰ Naandi wukotë ku n'zo yi Zakaali i wusë bilë Lizabeetë.

⁴¹ Ntaangu yo Lizabeetë wuyuwu bweekë Maali, mwaanë wusë nikukë mu civumu cyaandi. Lizabeetë wusë waalë yi Ciluunzi ci Saantu,

⁴² i wusë losukë mu mbeembu nkamu : « Nzaambi wakusakumunë, kuvyokililë bëcyeetu booso, i lusakumunu lwaandi luke mu mwaanë wo njeeyi wum'butë!

⁴³ Nani yikeeli bwiinji mamë Fumwaami wiisë ke miinwee?

⁴⁴ Talaanu, licyelikë bunë miinu yakuwu bwekaaku, mwaanë wanikukë yi liyaanji mu civumu cyaami.

⁴⁵ Nyeenzyaaku oyo : cibilë njeeyi wata lyaanë mu maambu mo Fumu wukuzabikini, i fanë maawu mën'vangënë. »

Luumbu lu Maali

⁴⁶ Maali wusë tubë ti : « Ciluunzi cyaami cidumisi Fumu,

⁴⁷ i ciluunzi cyaami cyawaalë yi liyaanji mu cibilë ci Nzaambi, N'vuucyaami.

⁴⁸ Cibilë, naandi wasitikë ntalwaandi yi bubonzulu mu miinu n'dongwaandi. Mu lyaawu kutatikilë fë bubwaafa, mu sintaangu syooso, baatu bëkun'teelë n'cyeetu liyaanji,

⁴⁹ cibilë ti Nzaambi-Mpuungu wavaangë mu miinu maambu mënenë : lizinë lyaandi Saantu.

⁵⁰ Naandi wum'monaangë cyaali mu sintaangu syakë syooso ke banë bëkum'bakaangë sisu.

⁵¹ Naandi waleesi n'viingwaandi wooso mu mëngolo maandi, i naandi watyamunë bangë mitimë lunaangu.

⁵² Naandi wabotulë mitinu fë ntaanzyaawu, i wazanjikë bibonzulu.

⁵³ Naandi wavaanë ndiiwu ke bifwa-nzalë, i wavutulë bisinë myooko mpafëlë.

⁵⁴ Naandi wakwisilë mu kuzudi mboongo Islayeelë, biseelu byaandi, i wusë n'zimbëkënë ko kubëfwiilë cyaali,

⁵⁵ bo bumweekë kuvangilë ci mëkulu ke Abalaamë bo naandi kubikini ci mëkulu sinkaakë siitu. »

⁵⁶ Maali wusë vyoosi kwaasu ku ngoondi tatu ke Lizabeetë. Fë mbusë, wusë vutukë ku livulë lyaandi.

Lubutulu lu Za-Batiisë

⁵⁷ Bunë ntaangu yafwaani Lizabeetë wusë butë mwaanë wu bakëlë.

⁵⁸ Banë bëlukalaangë yaandi bwaalë i libaambë lyaandi bisë zaabë ti Fumu waleesi buboti bwaandi. Mu lyaawu, baawu bisë ba mu liyaanji yimunë Lizabeetë.

⁵⁹ Bunë naanë li bilumbu lyafwaani, baawu bisë kweendë mu kubukë mwaanë bubakëlë. Baatu booso bëzolë kun'vaanë lizinë li tataandi, Zakaali.

⁶⁰ Kasi mamaandi wusë tubë : « Monikoo, bëkun'teelë Za. »

⁶¹ Baawu bisë n'kaambë : « Muutu ve fë likaandë lyaaku wuke lizinë be lyooli! »

⁶² Mu lyaawu, baawu bisë kuvaangë mwa bivudë, mu kufulë Zakaali nkuumbu mbici naandi kun'zolë kuvaanë mwanaandi.

⁶³ Zakaali wusë loombë mwa libayi mu kusonikë, i wusë sonikë : « Lizinë lyaandi Za. » Mu lyaawu, baatu booso kutulumukë.

⁶⁴ Mo mu ntaangu beenë, Zakaali kutoonë kube tubë. Naandi wusë dumisi Nzaambi yi mëngolo mooso.

⁶⁵ Mu lyalyooli, bayaawu booso bëlëziingaangë yaawu belë-belë bisë ba yi boomë i mu libweeti lyooso li limoongo li Zudee, baatu bisë ke bulilaangë sinkuungu mu maambu be moomo.

⁶⁶ Bakë booso bëlëkuwaangë maambu be moomo, bisë ke yufusënaangë kusi n'timë : « Mwaanë be woowo, nani kum'ba? » Licyelikë, luleendo lu Fumu lum'ba mu naandi.

Luumbu lu lubiku lu Zakaali

⁶⁷ Zakaali, taatë mwaanë wusë waalë yi Ciluunzi ci Saantu. Naandi wusë kubikë mu ntubulu ayi :

⁶⁸ « We dumu Fumu, Nzaambi yi mboongu Islayeelë, cibilë ti naandi wakwisë mu kuzudi mboongwaandi i mu kuyivuuci.

⁶⁹ Naandi wavaanë beeso N'vuuci wuke mëngolo mu sindaandu si n'tinu Daviidë, ciseelu cyaandi.

⁷⁰ Mati maawu yabë kutendulë faanë yi faanë, mu munu mibicyaandi yi saantu :

⁷¹ naandi wukanyi mu kutuvuuci mu myooko simbeenyi i mu lutumu lu bo bëtutiisi libi.

⁷² Naandi wusë leesi buboti bwaandi ke sinkaakë siitu, i naandi wusye zimbëkënë ko n'kangulwaandi wu saantu.

⁷³ Licyelikë, Nzaambi wulefë mpesë ke Abalaamë, nkaakiitu,

⁷⁴ mu kutuvuuci mu lutumu lu simbeenyi, bwiinji wutuvaanë likanë li kun'salilë kukaambu boomë,

⁷⁵ bwiinji tuba baatu bë saantu bësulëmë fë nduunzyaandi bilumbu byakë byooso bi luziingu lwiitu.

⁷⁶ Njeeyi mwanaami, njeeyi wum'ba m'bici wu Nzaambi-Mpuungu, cibilë ti njeeyi wun'lyaatë fë nduunzi Fumu bwiinji mu kululikë nzilaandi

⁷⁷ i mu kuzabikini mboongwaandi ti naandi wun'kwisë mu kun'vuuci mu kobulë mësumu miinu.

⁷⁸ Nzaambiitu ke beenë luzolë i mëboti. Naandi wun'vangisi kulesikë mu beeso cyeseesë ci yilu, cifwanëkënë yi muunyi cin'selukë,

⁷⁹ mu kuvaanë cyeseesë mu banë bëke ku bwiilu i ku ciduundu ci lufwa, i mu kunatë bitaambi biitu mu nzilë n'sikë. »

⁸⁰ Mwaanë wulë ke kulaangë i wulë ke bakaangë mëngolo më ciluunzi. Naandi wulëzingilaangë ku si ciyumi tee mu cilumbu cinë naandi wuyimonikë fë ntwaalë mboongu Islayeelë.