Koloosë 4 - N’KANGULU WUMOONË

¹ Sifumu, zudyaanu bëndongo biinu bunë bëfwenikini mu ludedëmunu i mu n'sulumunu. Tebukaanu moonyi ti benuviinu, luke yi Fumu ku yilu.

Mëkomini

² Saambililaanu mu cyelikë, zungululaanu mu n'saambu i toondaanu Nzaambi.

³ Mo mu ntaangu mweekë, sambilaanu yivaandi mu beeso, bwiinji Nzaambi wutuvaanë luvoto luboti mu kuloongë libuungu lyaandi, mu kutendulë liviindë li Kliistu. Mu cibilë be cyooci, miinu yike mu buloko.

⁴ Sambililaanu bwiinji miinu yilubangulilaanu liviindë beenë i yiluzabikini lyaawu buboti bo bufwenikini.

⁵ Lyatilaanu yimunë luzaabu fanë fëke bo bëkaambu kuta maanë i kusalilë losuku luvoto lum'monikë mu beeno.

⁶ Mëbuungu miinu mëba kadë vyaasi mëboti i mën'ciinzë. Zaabaanu kuvutulilë wosuku bunë bufwenikini.

Sibweekë si siitu

⁷ Tisiikë, ndikwiitu, mwaniitu nguli wunë wusulëmë mu cisalu ci Fumu, naandi wuluvandikë simpolu syakë syooso mu manë më kun'talë.

⁸ Miinu yakun'filë yiveko ke beeno mu kulukaambë buni tukeeli i mu kuluciinzi bitu.

⁹ Naandi wun'kwisë yimunë Oneziimë, mwaanë nguli wusulëmë, wunë wuke yiinu. Baawu bëluzabikini makë mooso manë mëlë mu kuvangënë afaafë.

¹⁰ Alisëtaakë, wunë wuke mu buloko yimunë miinu, walubilë, yivaandi Malëkë, mwaanë nguli n'kasi wu Balënabaasë. Beeno lwabë lwataambulë ndoonji mu naandi : ningë ti naandi bëkwiisë ke beeno, n'taambulaanu buboti.

¹¹ Yeesu, bëlukë Yusëtuusë, walubilë yivaandi. Baatu bë tatu aba, bo baawu tokë bitamaanë bëbutu Sizwiifë bën'salaangë yimunë miinu mu Lwaangu lu Nzaambi. Baawu bëm'paanë n'viingu.

¹² Epafëlaasë, wunë wuke yivaandi wumweekë mu beeno, walubilë. Ciseelu aci ci Yeesu Kliistu kusë n'leembu ko kusambililë mu beeno, bwiinji lubaanu mu lutatumunu, lukulaanu mu cimpeefë i lwe boongaanu lukanyu mu kuvaangë n'vwiilu Nzaambi.

¹³ Miinu yim'podi kun'tubilë cimbaanji aci : naandi wuke mu kuyivangisi beenë simpasi mu beeno, mu banë bëke ku livulë li Lawodisee i bo bëke ku Lilapolisë.

¹⁴ Liikë, ndikwiitu n'filëmë i Demaasë balubilë.

¹⁵ Bilaanu banë bë nguli bëke ku Lawodisee, yivaandi Nimëfa i Cingangë fanë baanë bë nguli booso bën'dukuninaangë ku n'zwaandi.

¹⁶ Bunë lun'taangë n'kaandë awu, vaangaanu buumë mu kuwutaangë yivaandi mu Cingangë ci Lawodisee. Taangaanu benuviinu manë mafuminë ke baawu.

¹⁷ Kaambaanu Alësiipë : « Wuba munë kuba mu kusalë buboti cisalu cinë bëkuveeni mu cisalu ci Fumu. »

¹⁸ Mu kookwaami yalusonikinë maambu ama: Sibweekë si Poolë. – Luziimbyaanu ko ti miinu mu buloko yikeeli. – Muulë wu Nzaambi we ba yiinu!