Koloosë 3 - N’KANGULU WUMOONË

¹ Beeno lwabë luvulumukë yimunë Kliistu. Oboobo, toombaanu biimë bike ku mëyilu, fanë Kliistu wuvwandilë ku mëbakëlë më Nzaambi.

² Lengilaanu moonyi mu manë mëke ku yilu i yaaku ti manë mëke fë n'toto.

³ Cibilë, beeno lwafwa i luziingu lwiinu luswaminë yimunë Kliistu mu Nzaambi.

⁴ Luziingu lwiinu lu cyelikë, mati Kliistu i bunë naandi wum'monikë, foofo beeno yiviinu lum'monikë yimunë naandi mu bumpumu bwaandi.

Luziingu lukulu i lumoonë

⁵ Lwe bicyaanu biimë byakë byooso bin'talë n'toto: busafu, kukaambu kulyoomë, bimvweemvu, bideenzë bibi i bwiimi, (cibilë bwiimi mati kukuundë bintumbë).

⁶ Sinsalulu simpilë osyo syaawu sin'vangisyaangë Nzaambi kuba mu fiti mu banë bëm'maangë kun'yuwulu.

⁷ Tala bunë beeno lulëlyatilaangë ntaangu ntamë bunë luziingu lwiinu lwabë fë civikë ci mësumu.

⁸ Kasi buyifanwabu, biikaanu makë mooso omo : fiti, likaanzi i bubaalu. Keelë lulëfiigë kaambofo lubaasi ko maambu më busafu mu minwiinu.

⁹ Luputësënaanu ko benuveekë yi benuveekë, cibilë lwabiikë cimuutu ciinu cikulu yimunë sinsalulu syaandi,

¹⁰ i beeno lwavwaatë luziingu lumoonë : beeno lweekë baatu bëmonë banë Nzaambi, N'vaanjiitu, wun'fikulaangë ntaangu syakë syooso mu cifwiifu cyaandi, bwiinji lun'zaabë buboti.

¹¹ Fëkeeli n'samu ko mu kukaambu kuba Zwiifë kaambofo kuba Zwiifë, kubukë bubakëlë kaambofo kukaambu kubukë bubakëlë, beeni bisyeeli ko kaambofo banë bukaambu kulubukë, n'dongo kaambofo muutu wusyalulu. Li njiinji mati Kliistu wuke makë mooso i mu byakë byooso.

¹² Beeno lweekë mboongu Nzaambi. Nzaambi walusoolë i naandi waluzolë. Mati mu lyaawu beeno lufwenikini kuba yi n'timë wumboti, bwalëkisi, kukulukë, bubonzulu i mpungë-moonyi.

¹³ Ciimbaanu moonyi benuveekë yi benuveekë. Mooti wun'viipë mu beeno wun'luungë mu kuseembë wayaandi, loombësënaanu mënaanë benuveekë yi benuveekë, dedë mweekë Fumu walulenvukilë.

¹⁴ Fë yilu mu makë mooso omo, baanu luzolo, bwiinji lubaanu cyelikë muutu mweekë.

¹⁵ N'sikë wu Kliistu wuba mu mitimiinu. Mu lyalyooli, mu n'sikë be woowo, mwaawu Nzaambi wulutelilë dedë mweekë binamë bi nyitu mweekë. Bwa boobo, baanu yi luzaabu mu Nzaambi.

¹⁶ Biikë Libuungu li Kliistu, yimunë businë bwaandi booso, bikalilë mu beeno. Lubësënaanu i lukumësinaanu benuveekë yi benuveekë yimunë bungelë bwakë booso. Yolilaanu Nzaambi mu n'timiinu wooso i luzaabu, twiimbu i sinyuumbu syo sin'vaanë Ciluunzi.

¹⁷ Makë mooso lun'vaangë mu mëbuungu kaambofo mu mëvaangë, vangilaanu maawu mu lizinë li Fumu Yeesu, mu kutoondë Taatë Nzaambi.

Bundiku bu baatu mu luziingu lumoonë

¹⁸ Bëcyeetu, cinzikaanu bënuni biinu, dedë mweekë bunë bëfwenikini kusiilë fë ntwaalë Fumu.

¹⁹ Bënuni, zolaanu bëkasi biinu i kebaanu kuba yi bubaalu mu baawu.

²⁰ Baanë, len'vukaanu mu makë mooso taatë i mamë, bwaawu Fumu kun'zolilaangë.

²¹ Beeno taatë i mamë, keelaanu kuvangisi baanë kuba mu fiti, mu kumaangë baawu kuvolë bitu.

²² Beeno bëndongo, cikuninaanu mu makë mooso ke sifumu siinu fë moongo butoto. Leembwaanu kulivaangë tokë ningë baawu bëke mu kulukëtë, bwiinji bëba mu liyaanji. Kasi cikuninaanu mu n'timë wooso, mu cibilë ci luciinzu lunë beeno lukeeli mu Fumu.

²³ Bosuku bubeeli cisalu ciinu, salilaanu cyaawu mu n'timiinu wooso, dedë mweekë ti beeno lun'salilë Fumu i yaaku ti mu cibilë ci baatu.

²⁴ Tebukaanu moonyi ti Fumu mba wulë vaanë n'seendo: beeno lun'taambulë byo naandi kulundilë mu baandi. Cibilë Fumu wu cyelikë lulë mu kusalilë, mati Kliistu.

²⁵ Kasi wunë n'vaangë libi wun'tambulë ndobwaandi, cibilë Nzaambi wusë n'singinyaangë muutu ko.