Koloosë 2 - N’KANGULU WUMOONË

¹ Miinu yin'vwa n'ciinzë ti, beeno luzaabë buboti buni yilë mu kulunwaninë cikaangë, mu banë bëke ku Lawodisee i mu banë yivaandi bëkaambusu kun'zaabë buboti.

² Miinu yin'vwa n'ciinzë ti mitimaawu yiba yiciindë, bëba muutu mweekë mu luzolë i bëwaalë mu lufyaatu lun'vaanë mëlubu mëcyelikë. Boobo, baawu bën'zaabë liviindë li Nzaambi, mati naveekë Kliistu :

³ mu naandi, mwa mëswaaminë businë bwakë booso yi bungelë i yi luzaabu lu cimpeefë.

⁴ Miinu yilukaambilë kati obo bwiinji wosuku ve wulupuutë mu sintubulu sikaambu nteendu.

⁵ Keti miinu yilëkwakënë yiinu mu nyitu, miinu yike fë kumë liinu mu ciluunzi i yike mu nyeenzi mu kulumonë luciindë mu ciminu ciinu mu Kliistu.

Luziingu twatambulë mu Kliistu

⁶ Mu bwaawu, abu lwavitikë Yeesu Kliistu, dedë mweekë Fumu, lwe ziingilaanu mu lubundunu mu naandi.

⁷ Sikiminaanu mu naandi i tuungaanu luziingu lwiinu looso mu naandi. Lwe kangiminaanu kadë ntaangu mu ciminu, bunë bun'sulikilë mëloonji manë beeno lwataambulë i lwe baanu yi luzaabu.

⁸ Zungululaanu mu kumaangë wosuku muutu, kulusokë mu maambu më lupuutu i mëkaambu bungelë bu cimuutu: maawu mësikiminë mu civi-cikulu ci baatu, mu minaku yi buloongo i yaaku ti mu Kliistu.

⁹ Cibilë makë mooso mëke mu Nzaambi mabakë nyitu mu Kliistu i mamooso makalilë mu naandi.

¹⁰ Mu naandi, lwataambulë makë mooso lunduu, naandi wun'tumi tutumu twakë tooso i bufumu bwakë booso bu cimpeefë.

¹¹ Mu lubundunu yimunë naandi, beeno bëlëbukë bubakëlë, yaaku ti lubuku luvangininë mu myooko baatu mu kulubotulë mu nyitu yi n'sunyi, mu lubuku lu Kliistu.

¹² Mu lyaawu, bunë bëlubatizyaalë, beeno lutuulu mu libuumbë yimunë Kliistu i benuviinu luvulumukë yimunë naandi, cibilë beeno luta maanë mu luleendo lu Nzaambi wunë wuvulumunë Kliistu mu nkoongë bëfwa.

¹³ Ntaangu ntamë, beeno lwabë lufwa mu cimpeefë mu cibilë ci mësumu miinu i cibilë beeno lwabë baatu bëkaambu kubuku bubakëlë, bisumuci lwabë. Kasi buyifanwabu, Nzaambi waluvangisi kuziingë yimunë Kliistu. Naandi watuvaanë lobukulu lu mësumu miitu mooso.

¹⁴ Naandi wabotulë n'kaakë wo wulë tufundaangë i wunë wabë wuvyakënë mu mëkomini maandi. Naandi wabotulë maawu mu kumëkomë fë kuluusu.

¹⁵ Mati bwaawu Nzaambi wusë botulë tutumu i bufumu bu cimpeefë. Naandi wubëfwiisi sisonyi fë ciyalëlë i wubënatë dedë mweekë bëdoongo mu n'saangu wu nduunji yi Mwanaandi.

¹⁶ Mu bwaawu, lubiici muutu ko kulufundisi mu manë mën'talë kulya i kunwa, n'saangu, ngoondi yimoonë, kaambofo cilumbu ci saba.

¹⁷ Makë mooso omo mën'leesi ciliimbu ci mo mën'kwisë ku ntwaalë, kasi cyelikë, mati nyitu Kliistu.

¹⁸ Luyilekulyaanu ko ke baatu bën'salilë mu bideenzë byaawu binsunyi i bën'kuundë siyaanzi, bën'tuulaangë lufyaatu lwaawu mu byeendë-meeso. Baatu bë mpilë oyo bëwaalë lunaangu mu nteku simbalulu syaawu si cimuutu.

¹⁹ Baawu bësye kangëmë ko mu Kliistu, naandi na n'tu. Kanuku mu naandi Kliistu mwaawu n'nyitu yooso yilë mu kulikilë i mu yaawu yi bundënënë binamë i yaawu yin'kulë bunë Nzaambi kun'tiisi.

Kufwa i kuzingilë yimunë Yeesu

²⁰ Beeno lwafwa yimunë Kliistu i bëluvuuci mu minaku yi buloongo. Mu bwaawu, cibilë-mbici beeno lulë mu kuzingilë dedë mweekë baatu bë buloongo be buubu, mu kuvitikë bëlukacikë minaku yi mpilë oyo :

²¹ « Keelë wulëboongë aciici » , « Keelë wulëtootë cyaawu » , « Keelë wulësiimbë aci? »

²² Yaawu yin'talilë biimë bin'zimbilë, mooti lube yisalilë. Yaawu minaku i mëloonji më baatu.

²³ Cyelikë, minaku ayi yifwanëkënë yi bungelë, cibilë yaawu yin'tubilë cinguuku cyaawu baveekë, bubonzulu i lukaciku mu kukeelë nyitwaandi. Kasi yaawu yin'toombë tokë mu kukeelë bideenzë bi nyitu.