Koloosë 1 - N’KANGULU WUMOONË

Sibweekë

¹ Miinu Poolë, m'bunzi Kliistu Yeesu mu n'vwiilu Nzaambi i Timotee, mwaniitu nguli.

² Ke baanë biitu bë nguli sisaantu i bësulëmë mu Kliistu, bëke ku livulë li Koloosë, Nzaambi Tatiitu wulëvaanë muulë i n'sikë.

N'saambu yi mputululu mëtoondo

³ Ntaangu syooso, beeso tun'toondaangë Nzaambi, Taatë Fumwiitu Yeesu Kliistu, bunë tun'sambililaangë mu beeno.

⁴ Bwaawu, tuyuwu baatu bëtubilë mu ciminu ciinu mu Kliistu Yeesu i mu luzolo lukeeli yiinu mu bitamaanë byooso.

⁵ Bunë saangu yi cyelikë, Mpolu Mboti, yiyisë vyaasi ntetë kuke beeno, luzabisi manë Nzaambi wulë sweekilaanu ku mëyilu : ciminu ciinu i luzolë lwiinu bikalilë mu civuufu aci.

⁶ Mpolu Mboti yinyambë i yaawu yin'vaanë mëkuundi mu buloongo n'viipë, mpilë mweekë yivaandi yaawu yivaangë fë meeyiinu kutoninë cilumbu cinë vyaasi yin'tetë, beeno luyuwu bunë bëtubilë mu muulë Nzaambi i lusë bakulë bunë lyaawu likelili cyelikë.

⁷ Mati Epafëlaasë, ndikwiitu mu cisalu, naandi waluvaanë ndongulu be yooyo. Naandi wulë mu kusalë mu cibilë ciinu beeno dedë mweekë cisasi cisulëmë ci Kliistu.

⁸ Naandi watuzabikini mu luzolo lu Ciluunzi ci Saantu kuluvaanë.

⁹ Mu bwaawu, tusë n'leembu ko mu kusambililë mu beeno, kutoonë cilumbu cinë tuyuwu mo kutubilë mu beeno. Beeso tun'loombë ke Nzaambi mu kuluzabikini n'vwiilwaandi, cibilë bungelë booso i mu mëlyeelë mën'veewu ke Ciluunzi cyaandi.

¹⁰ Bwa boobo, beeno lufwenikini kulyaatë yi bunketë booso fë meeso më Fumu, ke vaangaangë ntaangu syooso manë naandi kuzolisi. Beeno lun'vaangë mpilë yi mpilë yaandi mëvaangë mëboti i lun'kulilë mu luzaabu lu Nzaambi.

¹¹ Beeso tukun'loombë mu kuluciinzi biitu mu makë mooso mu luleendo lwaandi lu bumpumu, bwiinji luciimbë moonyi mu simpekaadu syooso.

¹² Toondaanu Taatë Nzaambi yimunë liyaanji: naandi waluvaanë mëkanë, mu kubakë cikuuku mu lifwa kuswekilë ku lwaangu lu cyeseesë, ke banë kubakisi.

¹³ Cyelikë naandi watubotulë ku luleendo lu citoombi i watuvyoosi ku lwaangu lu Mwanaandi mëdilë.

¹⁴ Mati mu naandi, mwaawu twabakilë luvukulu mu libi i mësumu miitu makobukë.

Kliistu i cisalu cyaandi

¹⁵ Kliistu na cifwaani cim'monikë ci Nzaambi, wun'kaambu kumonikaangë. Naandi, na Mwaanë wubutu ntetë, wuzangëmë mu byakë byooso bivangunu.

¹⁶ Kasi mu naandi mwa Nzaambi wuvaangë byakë byooso bike ku mëyilu i fë moongo butoto, binë bim'monikë i bin'kaambu mëmweeno, cinë cim'monikë i cin'kaambu kumonikë, tuleendo tu cimpeefë, tubyalulu, tutumu i bufumu. Nzaambi wuvaangë makë mooso mu naandi i mu cibilë cyaandi.

¹⁷ Naandi wuluziingaangë ntetë yi byakë byooso i mu naandi byakë byooso bisikëmë fanë bikeeli.

¹⁸ Naandi na n'tu nyitu, wuke Cingangë. Mati mu naandi, mwaawu mu n'toninë luziingu lumoonë, naandi na Mwaanë wubutu ntetë, wun'tetë wuvulumukë mu nkoongë bëfwa, bwiinji kubakë mu makë mooso n'taandë wun'tetë.

¹⁹ Cibilë Nzaambi watiisi mu kumonikë nawooso mu luviimbu lu Mwanaandi,

²⁰ i mu naandi, watiisi kuvutulë N'kangulu wu buloongo n'viipë yimunë naveekë. Mu lufwa lu Mwanaandi fë kuluusu, mwaawu naandi kwavutulilë n'sikë mu bakë booso fë moongo butoto, kaambofo ku mëyilu.

²¹ Benuviinu, lwabë ntaangu ntamë cinaanu yi Nzaambi, beeno lwabë simbeenyi syaandi mu cibilë ci makë mooso mëbi bëlëbalaangë i bëlëvangaangë.

²² Kasi buyifanwabu, mu lufwa lo Mwanaandi kutambulë mu nyitwaandi, Nzaambi walubuundë mu n'kangulu yimunë naandi, bwiinji lumonikë fë ntwaalaandi sisaantu, bifu ve bibi i mëseembu ve.

²³ Mu bwa boobo, lufwenikini kukalilë mu ciminu cisikëmë i ciciindë. Kwakënë ve yi civuufu cinë cike yiinu, kutatikilë fanë beeno luyuwu Mpolu Mboti. Mpolu Mboti be yooyo yitendulu mu buloongo n'viipë i mu lyaawu, miinu Poolë, yeekë ciseelu.

Cisalu ci Poolë mu cibilë ci Cingangë

²⁴ Buyifanwabu, miinu yike mu nyeenzi mu simpasi sinë yilë mu kumonë mu beeno. Cibilë yilë mu kubweelë manë mën'kaambooso mu simpasi si kliistu, mu nyitwaandi, yinë yike Cingangë.

²⁵ Miinu yeekë ciseelu ci Cingangë, bo bun'kwendilë cisalu cinë Nzaambi wakum'paanë mu beeno : naandi wakun'filë bwiinji yitendulë bunë bwaawu saangwaandi,

²⁶ dedë mweekë liviindë beenë lyabë liswsaamë mu sintaangu syooso mu mboongu yooso, kasi naandi walizabikini buyifanwabu ke bitamaanë.

²⁷ Cibilë Nzaambi wuzolë kubëzabikini liviindë be lyooli liswaamë, li businë i liboti beenë, livangëninë mu mboongu yooso. Monaanu liviindë beenë: Kliistu ke yiinu i naandi wuluvaanë civuufu ti beeno lum'bakë cikuuku mu bumpumu bu Nzaambi.

²⁸ Bwa boobo, beeso tulë mu kutendulë Kliistu ke wosuku muutu. Beeso tulë mu kulubikini i kulubulë kadë muutu yimunë bungelë booso, bwiinji kadë muutu mu beeno wuba wakweelë mu lubundunu yi Kliistu.

²⁹ Mu lyalyooli, miinu yilë mu kusalë i yilë mu kuvaangë mëngolo mu n'viingu wu Kliistu wunë wuke mu kusalë mu miinu yi luleendo looso.