Filiipë 4 - N’KANGULU WUMOONË

¹ A baanë bë nguli, miinu yike tesu mu kube lumonë! Beeno liyaanji lyaami i ntaatë nduunji! Bwaawu a bayaami, talaanu bunë beeno lufwenikini kukalilë luciindë mu luziingu lwiinu yimunë Fumu.

Mëkomini

² Evodi i Sintisë, miinu yilë mu kuluciinzi, zingilaanu mu nyuwusunu mu lubundunu yimunë Fumu.

³ I njevaaku, ndikwaami, miinu yikuloombë wubëzudi. Licyelikë, baawu bënwaanë yaami cikaangë mu kutendulë Mpolu Mboti, yimunë yivaandi Kelëmë i sindiku syaami syooso banë mëzinë mëke mu libuuku li luziingu.

⁴ Lwe baanu ntaangu syooso mu nyeenzi mu lubundunu lwiinu mu Fumu. Miinu yilisisiminë: Baanu mu Nyeenzi!

⁵ Biikë liboti liinu lizabëkënë fë meeso më bakë booso. Fumu mëlookë wiisë.

⁶ Nwe baanu lusweenu mu cin'velë ko, kasi mu lyosuku lyaambu loombaanu ke Nzaambi mu lusaambulu mu mo mëke yiinu n'ciinzë i vangilaanu lyaawu yimunë n'timë luzaabu.

⁷ I n'sikë wu Nzaambi, wuvyokililë makë mooso bëm'podi kubalë, wun'luundë mitimiinu i simbalulu siinu mu cintwaali yimunë Kliistu Yeesu.

⁸ Oboobo, baanë bë nguli, talaanu linë lifwenikini kutiisi binë biboti i bifwenikini kudumu: mu makë mooso mëcyelikë, mëcinzëmë, mësulëmë, mëlyoomë, mënyeefë i mëzangëmë.

⁹ Salilaanu manë lusinu i manë lutambulë ke miinu, manë luyuwu yitubë i lumonë kuvaangë. I Nzaambi wunë wun'vaanaangë n'sikë wun'kalilë yimunë beeno.

Poolë watoondë basë Filiipë

¹⁰ Miinu yakwangelëlë beenë mu luziingu lwaami yimunë Fumu: beeno lwaleesi cideenzë ciinu mu miinu. N'ciinzë be woowo wuke yiinu, cyelikë, kasi lusye bakë luvoto ko mu kun'deesi lyaawu.

¹¹ I miinu yisë n'tubilë katiboobo ko cibilë yike mu n'ciinzë. Licyelikë, miinu yakuukë kwangelëlë mu lubaku luke yaami.

¹² Miinu yizabisi kuzingilë mu buyeembi kaambofo mu businë. Miinu yakuukë kukalilë mu liyaanji yosuku ntaangu, keti yilë bakë cikulya kaambofo yilë kalë nzalë, keti yilë ba mu lukulë kaambofo mu n'ciinzë.

¹³ Miinu yim'podi kucikë yosuku mpilë mpasi cibilë ti Kliistu wukum'paanë n'viingu.

¹⁴ Mu lyaawu, liboti beeno luvangisi mu kukabësënë simpasi syaami.

¹⁵ Benuveekë lulizabisi buboti, basë Filiipë: bunë yabotukë ku Masedwaanë, mu ntaangu yitatikilë lutendulu lu Mpolu Mboti, beeno lwabë tokë Cingangë cyo ci kun'zudi, bo beeno too lumonë sinyeenzi syaami i tunyambukunu.

¹⁶ Bunë miinu yabë ku Tesaloniikë, beeno lukun'filë mpaapë vyaasi binë yabë n'ciinzë.

¹⁷ Yaaku ti miinu yitoombë kutambulë mëkabu, kasi yin'tiisi ti lukulë lubweelu mu mbakiinu.

¹⁸ Miinu yisisiminë ti yitambulë byo lukun'filë, mati bifweeni. Buyifanwabu, Epafolëdiitë wakunatinë mëkabu miinu, yabakë byakë byooso binë bike n'ciinzë. Mëkabu be moomo meekë dedë mweekë likabu li nfiimbu yimboti, likabu linë Nzaambi kun'vitikë i likun'toonzi.

¹⁹ Nzaambyaami wulubalilë mu makë mooso mëke yiinu n'ciinzë, bunë buke bukaalu bu businë bwaandi, mu Kliistu Yeesu.

²⁰ Mpumu ke Nzaambi Tatiitu sakë yi sakë. Ameenë!

Sibweekë si siitu

²¹ Bilaanu mu lizinë li Fumu Yeesu Kliistu kadë muutu wu libuundu liinu. Baanë bë nguli bëke yaami balufilë sibweekë.

²² Bitamaanë byooso bikeeli aku i kulu-kulu yiveko bo bëke mu cisalu ci n'tinu Sesaalë, balufilë sibweekë.

²³ Biikë muulë wu Fumu Yeesu Kliistu wuba yimunë beeno booso.