Filiipë 3 - N’KANGULU WUMOONË

Nteku yi cyelikë yikubeelë wusulëmë fë meeso më Nzaambi.

¹ Buyifanwabu, baanë bë nguli, baanu mu nyeenzi mu lubundunu yi Fumu. Bukeeli kwaandi mpasi ko mu kulusisiminë linë yilusonikënë i lyalyooli mu beeno n'ciinzë.

² Kebaanu mu banë bën'vaangaangë libi, simbwa osyo, banë bën'salilaangë lubukulu lu bëbakëlë lu lupuutu!

³ Cibeeni, mati beeso tukeeli yi lubukulu lu cyelikë, cibilë beeso tuke mu kusalilë Nzaambi mu Ciluunzi, beeso tuke yi binyemu bo tukeeli mu Yeesu Kliistu. Beeso tusë n'siilë lufyaatu lwiitu ko mu lubaku lu n'sunyi.

⁴ Mu kumonë, miinu yivaamë nkanë kupodi kutoombë kubakë tubaku be tooto. Miinu yike beenë nduunji mu kulivaangë keti kuvyokililë bën'ka.

⁵ Miinu yibuku bubakëlë fë cilumbu ci naanë fë mbusë lubutukulu lwaami. Miinu musë Islayeelë mu lubutulu lwaami, mu cifuumbë ci Bezamë, Ebelee mu n'suundë Siyebelee. Miinu yilësalilaangë n'kaakë Sizwiifë mu bu Falisyaanu bufwenikini,

⁶ i miinu yabë buvavambë mu kutyamunë Cingangë. Mu manë mën'talë n'sulumunu luziingu lusonëmë mu n'kaakë, miinu yisye ba yiliseembu ko.

⁷ Kasi mësalulu mo yilumonaangë buke mbakë, miinu yakë mëmonaangë mësyeeli n'ciinzë ko mu cibilë ci Kliistu.

⁸ Miinu yilë mu kumonë maambu vwiili mu kudedikini mboti yizangëmë: mu kuzaabë Yeesu Kliistu Fumwaami, mu naandi, mwa yabandilë mbusë mo yin'vwiilë n'ciinzë. Miinu yimonë makë mooso omo meekë buke biimë kwaandi vwiili, bwiinji yikalilë mu Kliistu

⁹ i mu kukalilë buboti mu kubundënë yi naandi. Yaaku ti mu n'sulumunu yibakisi mu miveekë mu kusalilë n'kaakë, kasi yimunë n'sulumunu yin'fuminë mu ciminu mu Kliistu, yinë Nzaambi kun'vaanë ke bo bën'ta maanë.

¹⁰ Makë mooso yin'vwa n'ciinzë, mati mu kuzaabë Kliistu i luleendo lu luvukulu lwaandi, mu kubakë cikuuku mu simpasi syaandi i mu kuba cifwaani cyaandi mu n'fwiilwaandi,

¹¹ yimunë civuufu ti miinu yivaamë yin'vulumukë mu lutaangu lu banë bëfwa.

Kudumë ntiinu mu kutuukë fë siitu

¹² Miinu yisë yin'tubë ko ti yatuukë fë siitu, kaambofo yekë yisulëmë. Kasi yicilë n'laandë n'kukë mu kubakë ntaatë, cibilë miveekë yikangëmë mu Yeesu Kliistu.

¹³ Moniko, a baanë bë nguli, yisë m'balë ko ti yatambulë futë. Kasi miinu yilë mu kuvaangë lin'viipë: yabandilë mbusë mësalulu më ntamë i yilë mu kunwaanë mu kubakë binë bike fë ntwaalaami.

¹⁴ Bwaawu, yilë mu kuduminë ntiinu mu kutuukë fë siitu bwiinji yibakë futë ke Nzaambi, mu Yeesu Kliistu, wulë mu kututelë mu kuyitambulë ku yilu.

¹⁵ Besubooso twakundukë mu cimpeefë, twe kalilë mu n'ciinzë be woowo. Mu bwaawu, ningë luke mbalulu yin'ka, Nzaambi sya wululubulë mu lyalyooli.

¹⁶ Bosuku bubeeli, tutatëminaanu mu kulaandë nzilë yo beeso tulë mu kulaandë tee yi buyifanwabu.

¹⁷ A baanë bë nguli, yukulilaanu miinu benubooso. Beeso twaluleesi cifwaani. Oboobo, sitikaanu ntalwiinu ke banë bëke mu kulyatilë bunë bukelili cifwaani be cyooci.

¹⁸ Mpaapë vyaasi miinu yilukaambë i yilë mu kulusisiminë buyifanwabu yilë mu kulilë: mpaapë baatu bëlë mu kulyatilë mu bu mbeeni yi Kuluusu yi Kliistu.

¹⁹ Baawu bëlë mu kuvekumukë mu lunyambukunu lwaawu, cibilë nzaambyaawu mati civumu cyaawu, baawu bën'vangilë binyemu mu mo mëbe vangisi sisonyi i manë mëke yaawu mu ciluunzi mo më buloongo be buubu.

²⁰ Kasi beeso, bënaangë bë mëyilu tukeeli, boobo tulë mu kuciingë yi lufyaatu lwisulu lu N'vuuciitu, Fumu Yeesu Kliistu.

²¹ Naandi wun'citulë nyitwiitu yidekë mu lufwa mu kuyidedëkini mu nyitwaandi yi bumpumu, mu cibilë ci lutumu cin'vangisi biimë byakë byooso kuba fë lutumu lwaandi.