Filiipë 2 - N’KANGULU WUMOONË

Kukulukë i bunenë bu Kliistu

¹ Bundiku bwiinu yimunë Kliistu buke mu kuluvaanë lunkanvi? Luzolo lwaandi luke mu kuluvangisi kuciinde? Beeno luke cintwaali yimunë Ciluunzi ci Saantu? Beeno luke yi luzolo i buutu mu benuveekë yi benuveekë?

² Oboobo, m'putulilaanu liyaanji lifwenikini mu nyuwuswiinu, zolësënaanu bo bumweekë mu lubundunu lu n'timë i simbalulu.

³ Luvaanjaanu cin'velë ko mu ciluunzi ci bumpalë kaambofo mu cideenzë ci bumpumu bunyungulë, kasi yimunë kukulukë, monaanu bayiinu dedë mweekë biinji bunaangë yi benuveekë.

⁴ Muutu ve wufwenikini kutoombë n'ciinzaandi, kasi kadë muutu mu beeno kutebukë moonyi mu n'ciinzë bayaandi.

⁵ Lyatilaanu beeno booso dedë mweekë banë bazaabë Yeesu Kliistu:

⁶ Faanë yi faanë, naandi wabë mpilë mweekë yi Nzaambi, kasi naandi wusye zolë ko kuba dedë wumweekë Nzaambi.

⁷ Tiilyoko, mu naveekë wumaangë kubakë byakë byooso byabë yaandi i wusë zingilë dedë mweekë ciseelu. Naandi wusë ba muutu fë meeyi baatu, bisë n'zaabë dedë mweekë muutu.

⁸ Naandi wuzolë kuzingilë mu kukulukë i wuleesi buleenvo tee ku lufwa, fë yilu kuluusu.

⁹ Mu bwaawu Nzaambi wan'zanjikë fë bunaangë buvyokilili i wan'vaanë lizinë livyokilili lyosuku lizinë.

¹⁰ Nzaambi wutiisi ti, mu kuzanjikë lizinë li Yeesu, bwiinji baatu bakë booso ku mëyilu fë n'toto i kusi n'toto, bën'fukuminë,

¹¹ i bakë booso bëtendulë bumpumu bu Nzaambi Taatë : « Mati Yeesu Kliistu na Fumu! » .

Lesikaanu dedë mweekë miindë mu buloongo

¹² Bwaawu, a bayaami, beeno mu ntaangu syooso lulë kun'denvukilaangë bunë yiyabë fë meeyiinu. Boobo, buyifanwabu vaangaanooso lyaawu abu yikambusu yiinu. Lwe natyaanu buboti luvukulu lwiinu mu bubonzulu yi mu luciinzu,

¹³ cibilë Nzaambi wulë mu kusalë mu beeno, naandi wulë mu kuluvaanë mëkanë mu kuvitikilë i mu kuvangilë mo mëfwanëkenë mu n'vwiilwaandi.

¹⁴ Vaangaanu makë mooso, lwaambu ve i kuvungëtë ve,

¹⁵ bwiinji lubaanu liseembu ve i lulyoomë, baanë be Nzaambi bëkaambu mëseembu fë meeyi bimpilë-mpiipi i bivadë-mbi bi buloongo be buubu. Beeno lufwenikini kumanikë fë meeyaawu bukë simbotë ku yilu,

¹⁶ mu ke bëleesyaangë saangu luziingu. Mu lyaawu, miinu yim'ba yi bipali mu beeno mu cilumbu ci lwisulu lu Kliistu, cibilë cisalu cyaami i simpasi syaami bisë m'ba binyungulë ko.

¹⁷ Bunë yim'balë meengë maami më m'podi kwicikë, dedë mweekë likabu lyabweelu fë civakuli cinë ciminu cin'leesi fë nduunzi Nzaambi. Ningë ti boobo lim'beelë, miinu yike mu nyeenzi i beeno lum'bundënë benubooso mu nyeenzyaami.

¹⁸ Dedë mweekë, benuviinu lufwenikini kuba mu nyeenzi i kum'bundë mu liyaanji liinu.

Timotee i Epafolëdiitë

¹⁹ Yimunë lufyaatu mu Fumu Yeesu, miinu yike mu kufwiikë mu kulengë kulufilë Timotee, bwiinji yiyangelëlë mu bikuumbu byo bin'fuminë ke beeno.

²⁰ Naandi vwiili wulë mu kukabënë miciinzaami i kuba lusweenu lu cyelikë mu beeno.

²¹ Bëmesë babë mu lusweenu mu miciinzaawu i yaaku ti mu cibilë ci Yeesu Kliistu.

²² Benuveekë luzabisi bunë Timotee kuvaanë cimbaanji ci lusulumunu lwaandi : dedë mweekë mwaanë yimunë tataandi, naandi wuyivandikë yimunë miinu mu cisalu ci Mpolu Mboti.

²³ Naandyaawu na yin'tiisi kulufilë bunë yim'monë cyeseesë mu manë më kun'talë.

²⁴ Miinu yike civuufu, cikangiminë mu Fumu, ti minuveekë yin'lengë kwiisë mu kulumonë.

²⁵ Miinu yin'tiisi mu kulufilë mwaanë nguli Epafolëdiitë, ndikwaami cisalu i yi livitë, wo beeno lukun'filë mu kun'zudi mu cideenzë cyaami.

²⁶ Naandi ke beenë n'ciinzë mu kube lumonë benubooso i naandi ke libaasë cibilë beeno luyuwu saangu kubeelë kwaandi.

²⁷ Cyelikë naandi wabë kubeelë i wubelëmë yi lufwa. Kasi Nzaambi wun'fwiilë cyaali i yaaku ti mu naandi vwiili, kasi yivaandi mu miinu, mu kumaangë kuba mu cyuundë cinenë.

²⁸ Bwaawu yalengë n'filë ke beeno, bwiinji luyangelëlë mu kube m'monë i cinyoonji cyaami cimanë.

²⁹ Oboobo, n'yacyaanu mu liyaanji lyooso, dedë mweekë mwaanë nguli mu Fumu. Beeno lufwenikini kuba yi buutu mu baatu bo buke naandi,

³⁰ cibilë wabë wubelëmë kufwa mu cisalu ci Kliistu: naandi wubiindu lufwa mu kun'zudi, lunë lusye podi ko kun'natinë benuveekë.