Filiipë 1 - N’KANGULU WUMOONË

Sibweekë

¹ Poolë i Timotee, biseelu bi Yeesu Kliistu. Ke bakë booso, bëke ku Filiipë, banë bëkeeli mboongu Nzaambi mu Yeesu Kliistu, ke bëkuluutu bë Cingangë i biseelu:

² Biikë Nzaambi Tatiitu i Fumu Yeesu Kliistu bëluvaanë muulë i n'sikë.

N'saambu wu Poolë ke bitamaanë bike ku Filiipë

³ Miinu yin'toondë Nzaambyaami kadë vyaasi yin'tebukaangë moonyi mu beeno.

⁴ Sivyaasi syakë syooso yin'sambilaangë mu benubooso, mu nyeenzi yilivangilaangë,

⁵ mu cibilë ci luzudi lwiinu lunë beeno lukun'natinë mu lutendulu lu Mpolu Mboti, kutoonë cilumbu cin'tetë tee yi zwaalu.

⁶ Miinu yacikunë aliili : Nzaambi, wunë wutoonë cisalu ciboti be ciici fë meeyiinu, wum'bweelë kucisalë tee fë siitu mu cilumbu ci lwisulu lu Yeesu Kliistu.

⁷ Liboti beenë ti miinu yike yi simbalulu simboti mu beeno booso. Cyelikë, beeno luke ku n'timaami, cibilë benubooso luke likabu lyo Nzaambi wukum'paanë, yivaandi buyifanwabu bo yikeeli mu buloko tee yi bunë miinu yitelu mu kunwaninë cikaangë mu Mpolu Mboti.

⁸ Nzaambi wulë mbaanjyaami : miinu yiluzolisi benubooso, yimunë luzolo lunenë mu Kliistu Yeesu.

⁹ Talaanu linë yin'loombë ke Nzaambi mu n'sambwaami: ti luzolo lwiinu lubweelë kulutilë, lwaawu luwaalë mu luzaabu lu cyelikë i mu nyuwulu yifwenikini,

¹⁰ bwiinji beeno lubakë mëkanë mu kuzimuninë linë like liboti. Bwaawu, beeno lum'ba bëlyoomë i kuseembu ve cilumbu ci lwisulu lu Kliistu.

¹¹ Beeno lum'ba bisinë bi mësalulu mësulëmë mën'fuminë mu beeno mu Yeesu Kliistu, mu bumpumu i ludumu lu Nzaambi.

Luziingu, mati Kliistu

¹² Baanë bë nguli, miinu yizolisi ti beeno lulizaabë: manë më kun'yisilë mu kuvangisi cyelikë Mpolu Mboti kunyambë.

¹³ Mu bwaawu ti bakë booso, mu n'zo n'tinu kaambofo kun'ka, bëzaabë ti miinu yike mu buloko mu cibilë ci cisalu ci Kliistu.

¹⁴ Mu kum'monë mu buloko, mpaapë baanë bë nguli bisë bakë civuufu mu Fumu, bwiinji ti, mu kadë vyaasi baawu bëtendulë yi boomë ve libuungu li Nzaambi.

¹⁵ Licyelikë bëmesë mu baawu bën'tendulaangë Kliistu mu n'soci, yimunë simbalulu sikaambu kufwaanë mu miinu. Kasi bëmesë bëlë mu ke tendulaangë yimunë simbalulu simboti.

¹⁶ Baawu aba bën'salilaangë mu luzolo, cibilë baawu bëzabisi ti cisalu cyaami afa cikeeli mu kunwaninë cikaangë mu Mpolu Mboti.

¹⁷ Bën'ka bëlë mu kutendulë Kliistu mu ciluunzi ci bumpalë, mëvaangë maawu mëbi, baawu bëm'balë kubweelë simpasi syaami mu buloko.

¹⁸ Bosuku bubeeli! Ti simbalulu syaawu si lupuutu kaambofo si cibeeni, bakë booso bëlë mu kutendulë Kliistu i miinu yin'kwangelëlë. Yim'bweelooso kwangelëlë,

¹⁹ cibilë yizabisi ti makë mooso omo mën'vangëninë mu luvukulu lwaami, cibilë ci misaambwiinu i luzudi lunë lu kun'twalilë Ciluunzi ci Yeesu Kliistu.

²⁰ Mu bwaawu, linë yilë mu kuviingë i yasiilë civuufu cinenë, miinu yisë m'monë sonyi ko. Tiilyoko, buyifanwabu dedë mweekë sintaangu syakë syooso yimunë lufyaatu looso miinu yin'leesi bunenë bu Kliistu mu nyitwaami yooso, keti yilë ziingë keti yilë fwa.

²¹ Cibilë mu miinu, luziingu mati Kliistu, i lufwa m'bakë.

²² Kasi ningë kubweelë kuziingë yikum'panooso likanë mu kusalë cisalu ci njiinji, oboobo, miinu yisye zaabë ko li kusoolë.

²³ Bideenzë byooli bivyakënë bilë mu kun'kwamisi: miinu yizolisi kubikë luziingu be luulu, mu kuba yimunë Kliistu, lyalyooli lyaawu livyokilili buboti.

²⁴ Kasi like beenë n'ciinzë, mu cibilë ciinu, ti miinu yim'bweelë kube ziingë.

²⁵ Abu yizabisi lyaliili, yizabisi ti miinu yin'kalilë yimunë beeno mu kuluzudi bwiinji lweendë ku ntwaalë i luba mu nyeenzi mu ciminu.

²⁶ Mu lyaawu, bunë miinu yim'ba ke beeno, beeno lum'bakë mu cibilë cyaami lunyemu mu lubundunu yimunë Yeesu Kliistu.

²⁷ Mu bwaawu, lyatilaanu bunë bufwenikini mu Mpolu Mboti yi Kliistu. Oboobo, keti yilë kwiisë mu kulumonë kaambofo yilë kaambu, miinu yin'kuwu ti beeno lukangiminë mu lubundunu mu ciluunzi cimweekë i beeno lun'nwaninë fë cimweekë mu n'timë wumweekë mu ciminu cisikëmë mu Mpolu Mboti.

²⁸ Lumonyaanu boomë mu cin'velë ko mu simbeenyi siinu: mu baawu mu mba ciliimbu ci kwendilë ku lunyambukunu i beeno lukeeli mu nzilë luvukulu. Lyaawu lin'fuminë ke Nzaambi.

²⁹ Cibilë Nzaambi waluvaanë likabu li kusalilë Kliistu, yaaku tokë mu kuta lyaanë mu naandi, kasi mu kumonooso simpasi mu naandi.

³⁰ Buyifanwabu, beeno lulë mu kunwaanë n'ziingu wo wumweekë wunë lumonë miinu kunwaanë ntaangu ntamë i yicini n'nwaanë, bunë beeno lulizabisi.