Filëmu 1 - N’KANGULU WUMOONË

Sibweekë

¹ Miinu Poolë, yike mu buloko mu cibilë ci Kliistu Yeesu i ndikwaami Timotee, yafilë n'kaandë awu ke njeeyi Filëmu, ndikwiitu mu cisalu

² i ke Apya, mwaniitu n'cyeetu i Alësiipë wunë wunwaanë yiitu cikaangë, i ke banë bë Cingangë bëke mu n'zwaaku :

³ Biikë Nzaambi Tatiitu i Fumwiitu Yeesu Kliistu, bëluvaanë muulë i n'sikë.

Luzolo i ciminu ci Filëmu

⁴ Miinu, yisë m'biikaangë kuve kutoondë Nzaambi mu kutangunaangë lizinë lyaaku ntaangu yo yin'sambilaangë,

⁵ cibilë baatu bëlë mu kutubaangë mu luzolë lwaaku mu bitamaanë byooso i ciminu cyaaku mu Fumu Yeesu.

⁶ Miinu yin'loombë ke Nzaambi ti ciminu cike cintwaali yimunë beeso ciba ciciindë mu njeeyi mu kuzabikini mëboti makë mooso mu luziingu lwiitu yimunë Kliistu.

⁷ A ndikwaami! Luzolo lo luke yaaku lwakum'paanë beenë sinyeenzi, i lwakun'ciinzi, cibilë waciinzi n'timë sisaantu.

Poolë wanwaninë cikaangë mu Oneziimë

⁸ Mu lyaawu, cindiku ciitu yi Kliistu miinu yike n'swa mu kukutumë maambu mo wufwenikini kusalë,

⁹ miinu Poolë, likundaalë yikeeli, mungë buloko yivaandi mu cibilë ci Kliistu Yeesu, yilë mu kukuloombë cikumë cimweekë mu cibilë ci luzolo lwiitu,

¹⁰ miinu, njeeyi yim'bondililë mu Oneziimë, mwanaami wo yabakilë mu buloko.

¹¹ Bunë bwabë, Oneziimë wusye ba n'ciinzë ko mu njeeyi. Akasi bubwayi, naandi weekë n'ciinzë mu njeeyi i miinu.

¹² Yakun'vutulë ke njeeyi, naandi weekë mwanaami wu n'timë.

¹³ Miinu yin'tiisi kun'luundë yaami fo yicili mu buloko mu cibilë ci Mpolu Mboti, bwiinji naandi wukum'paanë myooko fë ciikë cyaaku.

¹⁴ Kasi mu lukaambu lu n'swaaku, yisye zolë kuvaangë lin'viipë ko, mu kumaangë njeeyi kuvaangë liboti mu n'kacikë, kasi wulivangilë mu n'timë wu m'boti.

¹⁵ Lim'podi kuba, Oneziimë wuyakënë yaaku fë mwa ntaangu, bwiinji wum'monooso mu sintaangu syakë syooso.

¹⁶ Tiilyoko, naandi wusyeeli n'dongo ko. Kasi naandi wube vyokililë bunenë yi n'dongo, naandi weekë ndikwaami wu n'timë. Miinu yin'zolisi beenë. Njeeyi yivaaku wufwenikini kun'zolë yaaku ti buke n'dongo, kasi naandi weekë ndikwaaku mu n'sunyi i mu Fumu.

¹⁷ Ningë miinu yilë ndikwaaku, n'tambuli dedë mweekë njeeyi wun'kwaakë miinu.

¹⁸ Ningë naandi wukuvaangë mëbi, kaambofo wukudefë ciimë, tuulë cyaawu mu nkumbwaami.

¹⁹ Miveekë Poolë yisonikë n'kaandë be wuuwu, mba yin'futë waawu. Yikusë kutebulë moonyi ko, ti njeeyi wukun'defë, cinë wukun'defë, moonyaaku.

²⁰ A ndikwaami, mu luzolo lu Fumu, ciinzi n'timaami mu cintwaali ciitu mu Kliistu.

²¹ Mu buleenvo bwaaku bwaawu yakusonikinë, yizabisi ti njeeyi wun'vangooso mo mëvyokilili.

²² Mo mu ntaangu mweekë, n'dulikilë faamë fë kulembikilë, cibilë mu tusaambu twiinu, miinu yike civuufu ti yim'ba yiinu cintwaali.

Sibweekë si siitu

²³ Epafëlaasë wukeeli yaamë mu buloko mu cibilë ci Kliistu Yeesu, wakufilë sibweekë,

²⁴ yimunë yivaandi bayaami bë cisalu: Malëkë, Alisëtaakë, Demaasë i Liikë.

²⁵ Biikë muulë wu Fumu Yeesu Kliistu we ba yiinu.