Efeesë 6 - N’KANGULU WUMOONË

Baanë i mëtaatë

¹ Baanë, lwe baanu buleenvo ke taatë i mamë mu Fumu, cyelikë lyaawu lisulëmë.

² « Cinzikë taatë i mamë », lyaawu lutumu lun'tetë lulandëkënë yi lukanyu :

³ « Bwiinji wuba mu nyeenzi i wubakë luziingu lukulë fë moongo butoto. »

⁴ Beeno, mëtaatë, keelaanu lulëvaangë baanë sinkasë mu mpangulwiinu. Kasi bëyonzilyaanu mu kubëvaanaangë ndoonji i luciinzu bin'fuminë ke Fumu.

Bëndongo i sifumu

⁵ Bëndongo, baanu buleenvo ke sifumu siinu i bubonzulu fë moongo butoto, yimunë luciinzu, n'timë wucyelikë, dedë mweekë beeno lun'salilë Kliistu.

⁶ Nulivangilyaanu tokë ko bunë bëlë mu kulusungilë, mu kubëtoonzi. Kasi vaangaanu n'vwiilu Nzaambi yi n'timiinu wooso, buke bëndongo bë Kliistu.

⁷ Bësalilaanu yi n'vwiilu wumboti dedë mweekë ti beeno lulë mu kusalilë naveekë Fumu i yaaku ti baatu lumoonyi.

⁸ Tebukaanu moonyi ti wosuku mu beeno, kulë ba n'dongo kaambofo wusyalulu, wum'bakë ndobwaandi ke Fumu, mu mëboti kwavaangë.

⁹ Beeno, sifumu, zingilaanu bo bufwenikini fë ntwaalë bëndongo biinu. Dikëminaanu mu bubaalu. Tebukaanu moonyi ti beeno i bëndongo biinu benubooso luke Fumwiinu yimweekë ku mëyilu, naandi wum'monaangë baatu bakë booso mpilë mweekë.

Binwanunu bin'vaanë Nzaambi

¹⁰ Boobo, lwe vweetaanu n'viingwiinu mu lubundunu yimunë Fumu, mu luleendo lwaandi lunenë.

¹¹ Lwe boonjaanu binwanunu byakë byooso bin'vaanë Nzaambi, bwiinji luciindë fë ntwaalë mësalulu më dyaabu.

¹² Cibilë beeso tusë n'nwaanë ko yi baatu lumoonyi, kasi yi luleendo lu biluunzi bibi mu buloongo bu mëyilu, tutumu, sifumu i bëkuluutu bë buloongo be buubu bu citoombi.

¹³ Mu bwaawu, boongaanu binwanunu byooso bi Nzaambi! Bwiinji, bunë bën'kwisilë cilumbu cibi, beeno lum'podi kuciindë fë ntwaalë mbeeni i fanë lun'nwaanë tee fë siitu, kalilaanu bo lukelili luciindë.

¹⁴ Mu lyaawu, lwe belëminaanu : baanu bucyelikë dedë mweekë likaanji mu lucyeto. Vwaataanu n'sulumunu dedë mweekë cinkutu ci kunwaninë.

¹⁵ Vwaataanu buvavambë buke sisapaatu mu kutendulë Mpolu Mboti yi n'sikë.

¹⁶ Boongaanu kadë vyaasi ciminu dedë mweekë cikaku: cyaawu ciluvangisi kuvosi moongë mooso më mbaasu më Civadë-mbi.

¹⁷ Vitikaanu luvukulu dedë mweekë m'pu cinwanunu i libuungu li Nzaambi bo buke cisabë cituveewu ke Ciluunzi ci Saantu.

¹⁸ Makë mooso omo, loombaanu maawu mu n'saambu. Cyelikë sambilaanu yosuku ntaangu yimunë luzudi lu Ciluunzi, mu lya lyoolyo, zungululaanu i kalilaanu lusulëmë. Saambililaanu mu mboongu yooso yi Nzaambi.

¹⁹ Sambilaanu yivaandi mu miinu, bwiinji Nzaambi wun'nyindulilë bikumë bisulëmë fanë miinu yin'tubilë i yin'zimuninë yi lyaanë lyooso mësweeci më Mpolu Mboti.

²⁰ Bosuku yibeeli mu buloko, miinu ciluumbi ci Mpolu Mboti. Sambilaanu bwiinji yitubë yimunë lyaanë, bunë bufwenikini.

Sibweekë si siitu

²¹ Tisiikë, mwaanë yiitu nguli, wusulëmë mu cisalu ci Fumu, mba wuluvaanë simpolu syooso sike mu miinu, bwiinji ti luzaabë buni yikelili.

²² Miinu yakun'filë yiveko mu kulukaambë buni beeso tukelili i mu kuluciinzi bitu.

²³ Biikë Nzaambi Taatë i Fumwiitu Yeesu Kliistu bëvaanë ke baanë yiitu booso bë nguli, n'sikë i luzolo yimunë ciminu.

²⁴ Biikë muulë Nzaambi wuba yimunë bakë booso bën'zolaangë Fumwiitu Yeesu Kliistu mu luzolo lukaambu më manunu.