Efeesë 5 - N’KANGULU WUMOONË

Kuzingilë mu cyeseesë

¹ Abu beeno luke baanë bëzolu ke Nzaambi, lwe vaangaanu buumë mu kuba buke naandi.

² Lwe zingilyaanu mu luzolo, mu cifwaani ci Kliistu wunë wutuzolë i wusë vaanë luziingu lwaandi mu beeso, dedë mweekë likabu i civakuli bike nfiimbu yimboti yin'toonzi Nzaambi.

³ Beeno nkoongë yi Nzaambi lukeeli. Abu likelili obo, beeno lusye fwaanë ko kuvaangë busafu, kukaambu kulyoomë, kaambofo mpwiilë yi kuvatiminë. Makë mooso omo mësye fwanëkënë ko kuba fë meeyiinu.

⁴ Busye fwaanë ko yivaandi mu kutubë maambu më busafu, mo mëkaambu nteendu kaambofo më suusi. Kasi lwe vutulaanu mëtoondo ke Nzaambi.

⁵ Wun'viipë ve wun'vaangë busafu, wun'kaambu kulyoomë, wun'vatiminë (cibilë bwiimi, mati kukuundë bintumbë cifu cibi) sasabi, wusë m'bakë cikuuku ko ku Lwaangu lu Kliistu i lu Nzaambi.

⁶ Muutu ve vuluvukumunë mu mëbuungu maandi më lupuutu: mëvaangë be moomo mën'vangisi Nzaambi kuba yi likaanzi mu banë bën'kaambu kun'yuwulu.

⁷ Keelaanu kuba yi cindiku yi baatu bëke katyoobo.

⁸ Beeno lwabë ku citoombi. Kasi bubwayi aci, mu lubundunu lwiinu yi Fumu, lweekë mu cyeseesë. Mu lyaawu, lyatilaanu dedë mweekë baatu bën'zingilë mu cyeseesë,

⁹ Cibilë cyeseesë cin'vandikë cyosuku ciboti, cisulëmë i ci cyelikë.

¹⁰ Vaangaanu buumë mu kubakulë linë lin'toonzi Fumu.

¹¹ Kebaanu lulë bundunë mu mëvaangë mëkaambu lukulë më citoombi. Kasi baasyaanu maawu.

¹² Sisonyi beenë mu kutubilë mu manë baatu bëmesë bën'vaangë mu mësweeci.

¹³ Kosuku, makë mooso manë mamonikë meekë fë ciyalëlë.

¹⁴ Cibilë cyosuku cim'monikë cyeekë cyeseesë. Mu bwaawu bëtubilë abu: « Kotukë njeeyi wulë mu kunuukë, telëmë fë meeyi nkoongë bëfwa, i Kliistu wukuvangisi kuba mu cyeseesë. »

¹⁵ Mu bwaawu lwe kebaanu mu n'zingulwiinu. Keelaanu lulë lyatilyaanu dedë mweekë baatu bëke mu bunzimbu, kasi buke baatu bëke yi bungelë.

¹⁶ Lwe vaangaanu liboti mu ntaangu syooso lum'bakë luvoto, cibilë sintaangu tulë mu kuzingilë beeso syeekë simbi.

¹⁷ Keelaanu lulë ba bivulikini, kasi vaangaanu buumë mu kubakulë manë Fumu wulë mu kuciingë mu beeno.

¹⁸ Keelaanu lulë ba bikolu-mbuungu: kukolu mëlafu më luvangisi kuzingilë mu n'vuusu. Kasi lwe waalyaanu mu Ciluunzi ci Saantu.

¹⁹ Lwe cindisinyaanu benuveekë yi benuveekë mu twiimbu, twiimbu tu lutendulu lu ndumu i sinyuumbu si cimpeefë sin'fulë Ciluunzi. Yolaanu twiimbu mu kudumisi Fumu mu mitimiinu yooso.

²⁰ Toondaanu Taatë Nzaambi mu ntaangu syakë syooso i mu makë mooso, mu lizinë li Fumwiitu Yeesu Kliistu.

Bëkasi i bënuni

²¹ Lwe cinzësënaanu benuveekë yi benuveekë mu luciinzu lunë beeno luke mu Kliistu.

²² Beeno bëcyeetu, lwe cinzikaanu bënuni biinu, dedë mweekë lun'cinzikilaangë Fumu.

²³ Cibilë n'nuni na wun'tumi n'kasi, dedë mweekë Kliistu wun'tumi Cingangë. Kliistu mati N'vuuci Cingangë cinë cikeeli nyitwaandi.

²⁴ Bëcyeetu bëfwenikini kucinzikë bënuni baawu, dedë mweekë Cingangë cin'cinzikaangë Kliistu.

²⁵ Bënuni, zolaanu bëkasi biinu dedë mweekë Kliistu wuzolë Cingangë i wusë vaanë luziingu lwaandi mu cyaawu.

²⁶ Naandi watiisi katiboobo mu kuvangisi Cingangë kusulëmë fëke Nzaambi, bunë kwamani kucilyomisi mu masi i mu Libuungu.

²⁷ Naandi wuzolë kuyileesi naveekë Cingangë cim'manikë, cilyoomë i cikaambu ciliimbu cibi, lidoti ve, i lifyoti ve i cyosuku ve cin'velë cidiifë.

²⁸ Bënuni bëfwenikini kuzolë bëkasi baawu bo bumweekë bën'zolilaangë sinyitu syaawu. Wunë wun'zolë n'kasyaandi, naveekë wuyizolisi.

²⁹ Mu bwaawu, muutu ve wum'bayaangë nyitwaandi, tiilyoko, kuyilikilaangë i kuyivangilaangë bunketë, bo bumweekë Kliistu wun'vangilaangë mu Cingangë,

³⁰ cibilë besubooso tukeeli binamë bi nyitwaandi.

³¹ Dedë mweekë mësonëmë : « Mu bwaawu libakëlë wum'biikë taatë i mamë mu kubundënë yi nkasyaandi i baawu bëm'ba muutu mweekë. »

³² Liviindë be liili litudë. Miinu yin'tubë: liviindë be liili lin'leesi Kliistu i Cingangë.

³³ Kasi lyaawu lin'talë yivaandi benuviinu: bufwenikini kadë n'nunyi kuzolë n'kasyaandi dedë mweekë naveekë i wosuku n'cyeetu kucinzikë n'nunyaandi.