Efeesë 4 - N’KANGULU WUMOONË

Lyukunë li binamë bi nyitu

¹ Miinu beeno yin'cindisi, abu yikeeli mu buloko mu cibilë ci Fumu, beeno banë Nzaambi kwatelë, zingilaanu mu n'sulumunu mu mbilë be yooyo.

² Lwe baanu yi bubonzulu, luvuundë i mpungë-moonyi. Lwe vitikësënaanu benuveekë yi benuveekë mu luzolo.

³ Lwe vangaanu mëngolo mu kukalilë mu lyukunë lin'veewu ke Ciluunzi ci Saantu mu n'sikë wulubuundë benuveekë yi benuveekë.

⁴ Nyitu mweekë i Ciluunzi ci Saantu cimweekë, bo bumweekë bukelili civuufu cimweekë cinë Nzaambi kwalutelilë.

⁵ Ke Fumu mweekë, ciminu cimweekë, lubatizyaalu lumweekë.

⁶ Ke Nzaambi mweekë, Taatë yi bakë booso, wunë wun'tumi byakë byooso, wun'salë mu bakë booso i wun'kalilë mu bakë booso.

⁷ Mu lyalyooli, kadë muutu mu beeso wutambulë lyaandi likabu, mu cyeelu cizoongë Kliistu.

⁸ Busonëmë : « Bunë kumakë ku mëyilu, naandi wuyobulë banë babë mu buloko. Naandi wuvaanë mëkabu ke baatu. »

⁹ Kosuku, mbici bin'toombë kutubë : « Naandi wumakë » ? Lyaawu lin'tubë yivaandi ti wukulumukë tee yi kunë mëbweeti më mëwiingë më n'toto.

¹⁰ Wunë wukulumukë, mati naandi yivaandi wumakë kunë salaangë mëyilu bwiinji kuwaasi buloongo n'viipë.

¹¹ Mati naandi wuvaanë mëkabu më mpilë yi mpilë yaandi ke baatu: bëmesë mimbunzi, bën'ka mibici, bëmesyooso miloonji, miluunji, kaambofo misinyi.

¹² Bwaawu, naandi wusë fulë n'viingu mu nkoongë Nzaambi mu kusalë cisalu cyaandi, mu kuvangisi kukusi nkoongë be yooyo, nyitu Kliistu.

¹³ Mu bwaawu, beeso booso tum'ba fë cimweekë mu lubundunu lu ciminu mu luzaabu lu Mwaanë Nzaambi. Beeso tum'ba baatu bëyelë, bakundukë mu n'telë wun'fwanëkënë deku-dekoo yi Kliistu.

¹⁴ Boobo, tusë be ba baanë ko, bëm'ba yekësë-yekësë, kaambofo mpeemu yi mëloonji më mpilë yi mpilë, yim'puutu ke baatu i kubëkondulë mu kunatë bëmesë mu buzimbu.

¹⁵ Tiilyoko, mu kutendulë bucyelikë yimunë luzolo, beeso tun'kulë mu makë mooso mu Kliistu, wunë wuke n'tu.

¹⁶ Kanuku mu naandi, mwaawu binamë byooso bi nyitu bibundënë, biciindë mu si silë. Mu lyaawu, mooti cinamë cimweekë cilë mu kusalë bunë bufwenikini, nyitu yooso yilë mu kukulë i kuyitungilë yaveekë mu luzolo.

Nzingulu yimoonë yi bitamaanë

¹⁷ Talaanu linë miinu yiluloombë yilusisumunu mu lizinë li Fumu: nuzingilyaanu ko buke bo bëkaambu kuzaabë Nzaambi, simbalulu syaawu sidiifë.

¹⁸ Baawu bëm'maangë kuviisi kuwu. Baawu cikuuku ve mu luziingu lun'fuminë ke Nzaambi, cibilë baawu bëkangëmë mu buzimbu i mitimaawu yikafëkënë.

¹⁹ Baawu bësyeeli ko yi sonyi. Baawu bëlë mu kuvaangë sinsalulu si busafu, sikaambu buutu yikusalilë mo mëkaambu kulyoomë.

²⁰ Yaaku maawu ko lusinu mu manë mën'talë Kliistu!

²¹ Beeno luyuwu makë mooso më kun'talë i maawu bëlusinë, bo lukeeli sikleentë, sicyelikë buke mu Yeesu.

²² Beeno lufwenikini kubiikë ndyatulwiinu yi ntamë i lubumë cimuutu ciinu ci n'sunyi i bideenzë bi lupuutu bin'nataangë ku lufwa.

²³ Beeno lufwenikini kubalulë n'timiinu i ciluunzi ciinu.

²⁴ Lwe baanu nzingulu yimoonë, yivangunu mu cifwaani ci Nzaambi i cinë cim'monikaangë mu luziingu lusulëmë i lun'leesi cyelikë.

²⁵ Mu lyaawu, biikaanu lupuutu! Kadë muutu we tubi cyelikë ke wayaandi, cibilë besubooso binamë bi nyitu yo yimweekë.

²⁶ Ningë beeno luke yifiti, leembwaanu kusumukë. Fitiinu yifwenikini kumanë ntetë muunyi kusiindë.

²⁷ Nuvaanyaanu ko dyaabu luvoto mu kulunangiminë.

²⁸ Wunë wabë cifu ci kwiibë kwe leembu bwiifi. We salilë mu myookwaandi bwiinji kubakë mu luziingu lwaandi byo bifwenikini i kuzudi biyeembi.

²⁹ Bikumë ve bibi bim'basikë mu minwiinu. Lwe baasyaanu bikumë bifwenikini i bin'ciinzi baatu, mu kuvaangë liboti ke banë bën'kuwu.

³⁰ Keelaanu lulë nyotëkini Ciluunzi ci Saantu cinë Nzaambi kuluvaanë. Cyaawu ciifi mu cilumbu cin'kwisë cinë Nzaambi kulukobulilë mu libi lyooso.

³¹ Nuluundyaanu ko mu n'timë libi, likaanzi, fiti, yi ncyeembi i bifiingu. Kebaanu mu mëvaangë makë mooso mëbi.

³² Baanu baatu bëboti i bëwaalë yi luzolo mu bayiinu. Lwe yilen'vukilyaanu benuveekë yi benuveekë, dedë mweekë Nzaambi wululenvukilë mu Kliistu.