Efeesë 2 - N’KANGULU WUMOONË

Lufwa i luvulumuku

¹ Ntaangu ntamë, beeno lwabë baatu bëfwa mu cimpeefë mu cibilë ci mëbi miinu i mësumu miinu.

² Beeno lulë lyatilaangë obo mu nteku luziingu lu buloongo be buubu. Beeno lulë len'vukilaangë n'kuluutu tuleendo tubi wun'zingilaangë fë yilu n'toto, mpeefu be yooyo yilë mu kusalë buyifanwabu, ke banë bëlë mu kutundukënë Nzaambi.

³ Besiinu booso yivaandi, twabë buke baawu, tulëzingilaangë mu bideenzë biitu binsunyi, tuluvaangaangë manë mëlë zolaangë n'nyitwiitu i ciluunzi ciitu. Bwaawu, mu cibilë ci n'sunyiitu, twabë tusifu mu kutambulë lufundusu lu Nzaambi dedë mweekë bën'ka.

⁴ Kasi cyuundë ci Nzaambi cinenë beenë, luzolo lwaandi mu beeso lum'monikë,

⁵ bunë twabë tufwa mu cibilë ci mëbi miitu, naandi wutuvangisi kube ziingë yimunë Kliistu. Mati mu muulë wu Nzaambi mwaluvukilë.

⁶ Mu lubundunu lwiitu yimunë Kliistu Yeesu, Nzaambi wutuvulumunë ku lufwa yimunë naandi, mu kutuvwaandisi yimunë naandi ku mëyilu.

⁷ Mu buboti kutulesilë mu Kliistu Yeesu, naandi wuzolë kuleesi mu sintaangu sin'kwiisë businë bu kwaatë-yekë bu muulaandi.

⁸ Mati mu cibilë ci muulë wu Nzaambi mwaawu beeno luvukilë, mu mëkanë më ciminu. Luvukulu be loolo lusye fuminë ke beeno ko, kasi lwaawu likabu li Nzaambi.

⁹ Lyaawu lisye luveewu ko mu mëngolo luvangisi i bwaawu muutu ve wum'podi kuyituunvi.

¹⁰ Mu lyaawu, mati Nzaambi na wutuvaangë. Naandi wutuvaangë mu lubundunu lwiitu yimunë Yeesu Kliistu, bwiinji luziingu lwiitu lumonikë mu bisalu bimpaapë biboti, binë kubelikilë faanë yi faanë bwiinji tu mësalilë.

Cintwaali mu Yeesu Kliistu

¹¹ Tebukaanu moonyi buni luyabilë mu ntaangu ntamë! Beeno lukeeli ko Sizwiifë si lubutu. Sizwiifë bën'tubaangë ti beeno lusye buku bubakëlë ko, kosuku, baawu bën'teelu bubuku bubakëlë mu cibilë bë bëbukë bubakëlë.

¹² Mu sintaangu be sinë sinaani, lwabë cinaanu yi Kliistu. Beeno lwabë beeni, lusye bangaangë kuve mboongu Nzaambi. Beeno lwabë lubotukë mu mikangulu yivangëninë mu lukanyu lu Nzaambi. Beeno lulë zingilaangë mu buloongo bukaambu civuufu i bukaambu Nzaambi.

¹³ Beeno lwabë cinaanu, kasi cibubwayi aci mu lubundunu yimunë Yeesu Kliistu, lwabelëmë mu cibilë ci luvakulu lwaandi.

¹⁴ Mati kasi, Kliistu naveekë na wututwalilë n'sikë, mu kuvangisi Sizwiifë i banë bëkaambu Sizwiifë mu kuba mboongu mweekë. Bunë kwavandikë nyitwaandi, naandi wusë tyamunë cibakë cilë bëkabulaangë i cilë bëvangisyaangë kulendësënë.

¹⁵ Naandi wusë botulë n'kaakë Sizwiifë yimunë tutumu twaawu i mëkomini maawu, mu kuvaangë yaawu mboongu yo yimweekë yimoonë mu lubundunu yimunë Kliistu. Bwa boobo, bwakuvangilë n'sikë.

¹⁶ Mu lufwa lwaandi fë kuluusu, Kliistu wubëbuundë bakë booso mu n'nyitu yimweekë i wusë bëvutulilë n'kangulu yimunë Nzaambi. Fë kuluusu, naandi wusë botulë lulendunu.

¹⁷ Kliistu wuyisilë mu kutendulë Mpolu Mboti yi n'sikë ke beeno luke cinaanu i ke bo bëbelëmë.

¹⁸ Mu Kliistu mwaawu beeso booso, Sizwiifë i banë bëkeelë ko Sizwiifë, beeso tum'podi kumonikë fëke Nzaambi, Taatë, mu Ciluunzi cyo cimweekë.

¹⁹ Bunë tum'mweenë, beeno lukeeli Sizwiifë ko, lusyeelyooso kuve beeni, baatu bën'fuminë kun'ka. Kasi bubwayi aci beeno lweekë baatu mu nkoongë likaandë li Nzaambi, beeno beekë mu cifuumbë ci Nzaambi.

²⁰ Beeno lweekë mëmanyi më n'tungulu yiciindë manë mëke mimbunzi i mibici i limanyi linkumë naveekë Kliistu Yeesu.

²¹ Naandi wuvangisi kuciinzi tungulu yooso i wuyitelikë mu kuvaangë n'zo-Nzaambi yi saantu mu Fumu.

²² Mu lubundunu yimunë naandi, benuviinu lweekë mu kati kun'tungulu mu kuba yimunë bakë booso n'zo yin'zingilë Nzaambi mu Ciluunzi cyaandi.