Efeesë 1 - N’KANGULU WUMOONË

Sibweekë

¹ Poolë, m'bunzi Kliistu Yeesu mu n'vwiilu Nzaambi, ke sisaantu sikeeli ku livulë li Efeesë.

² Biikë Nzaambi Tatiitu i Fumu Yeesu Kliistu, bëluvaanë muulë i n'sikë.

Mëboti manë Nzaambi wutuvaanë mu Kliistu

³ Tudumisyaanu Nzaambi, Taatë Fumwiitu Yeesu Kliistu! Naandi wutusakumunë mu lubundunu lwiitu yimunë Kliistu, wutuvaanë lusakumunu looso lu cimpeefë lu buloongo bu mëyilu.

⁴ Ntetë buloongo kuvangënë, Nzaambi wutusoolë faanë yi faanë mu kuba baandi mu Kliistu, bwiinji tuba sisaantu bëkaambu lifyooti fë meeso maandi. Mu luzolo lwaandi.

⁵ Nzaambi wutiisi faanë yi faanë mu kutuvangisi kuba baanë baandi mu Yeesu Kliistu, mu luzolë lwaandi.

⁶ Tudumisyaanu Nzaambi mu cibilë ci likabu li muulë kutuvaanë mu Mwanaandi wu mëdilë.

⁷ Cibilë, mu civakuli ci Kliistu, twakobukë mu libi i twabakë n'leenvo mu mësumu miitu. Bwaawu Nzaambi wutulesilë bunenë bu muulaandi,

⁸ wunë kutuvaanë yinë lunduu mu bungelë bunenë i mëlyeelë mooso:

⁹ naandi wutuzabikini mpangulwaandi yi mësweeci, mu buboti bwaandi, wutiisi kuvaangë faanë yi faanë mu Kliistu.

¹⁰ Mpangulu be yooyo yinë Nzaambi wukanë kuvaangë mu situkulu sintaangu, yikeeli mu kukucikë byakë byooso binë bike ku mëyilu i fë moongo butoto mu lutumu lu Fumu mweekë, Kliistu.

¹¹ Mu lubundunu lwiitu yimunë Kliistu, beeso tutambulë ciitu cikuuku cinë bëtukanyi, cibilë Nzaambi wutusoolë faanë yi faanë mu yaandi mpangulu. Nzaambi wuvaangë byakë byooso deku-dekoo mu manë kukanë i kutiisi.

¹² Tudumisyaanu bunenë bu Nzaambi, beeso tubeelë ntetë kutuulë civuufu ciitu mu Kliistu!

¹³ Benuviinu, bunë luyuwu saangu yi cyelikë, Mpolu Mboti, yinë yilutwalilë luvukulu, beeno luta maanë mu Kliistu. Bwaawu Nzaambi watuulë cilifë cyaandi naveekë mu beeno, mu kuluvaanë Ciluunzi ci Saantu kukanyi.

¹⁴ Ciluunzi ci Saantu cituvaanë cikuuku ci mëboti mo Nzaambi wulundilë mboongwaandi. Naandi wutuvisilë ti beeso tum'bakë byaawu bunë luvukulu lwiitu lum'ba kongëloo. Tudumisyaanu bunenë bu Nzaambi!

N'saambu Poolë

¹⁵ Miinu yivaamë abu yakuwu, ciminu ciinu mu Fumu Yeesu i luzolë lwiinu mu sisaantu syooso,

¹⁶ yisë n'volë bitu ko mu kutoondë Nzaambi mu cibilë ciinu. Miinu beeno yilë mu kubalë mu misaambwaami

¹⁷ i yin'loombë Nzaambi yi Fumwiitu Yeesu Kliistu, ke Taatë bumpumu, mu kuluvaanë Ciluunzi ci bungelë, wunë wukululeesi i wukuluzabikini cyelikë.

¹⁸ Biikë kulëzibulë meeso mu cyeseesë cyaandi, bwiinji lubakulë mu civuufu mbici naandi wulutelilë, businë mbici i bunenë mu biimë biboti kukanyi ke bo baandi

¹⁹ i mpilë mbici luleendo lu kwaatë-yekë kubëlikilë mu beeso bitamaanë. Luleendo alu, lwaawu Nzaambi kuleesi yi mëngolo makë mooso

²⁰ bunë kwavulumunë Kliistu mu nkoongë bëfwa i wavwaandisi ku mëbakëlë maandi më buloongo bu mëyilu.

²¹ Kliistu wuvwaandë fë cinaangë cyooso, lutumu looso, luleendo looso, lubyalulu looso i cyeenyi cyooso cinë bum'podi kutangunë, yaaku tokë mu buloongo be buubu ko, kasi yivaandi mu buloongo bu ntwaalë yikwisë.

²² Nzaambi watuulë biimë byakë byooso ku si bitaambi bi Kliistu i naandi wan'vandikë ke Cingangë dedë mweekë n'kuluutu bëkuluutu.

²³ Cingangë nyitu Kliistu. Mati mu naandi, Kliistu wum'monikinaangë ntaangu syakë syooso, naandi wun'waasyaangë buloongo bwakë booso.