Ebele 9 - N’KANGULU WUMOONË

Lusambulu fë moongo butoto i ku yilu

¹ N'kangulu wun'tetë wabë yi mikaakë mu lusambulu i mu n'zo-Nzaambi fë moongo butoto.

² Licyelikë, cinzwananë cin'tetë cituungu ku civingë, bën'teelë faamë fë saantu, faawu fabë cicyetukulu ci miindë i meesë yimunë mëmpa bën'kwindulaangë ke Nzaambi.

³ Fë mbusë n'lelë wumwaali fabë lweeku lun'ka bëlëteelaangë faamë fë vyokilili busaantu,

⁴ yimunë civakulili ci woolë, fanë bëlëkokilaangë n'liinji i kasu yi n'kangulu wunë wabë wufuku wawooso mu woolë. Munë kasu, mwabë liboolë livangunu mu woolë muunë mwabë livwe-vwetë, luveengu lu Aloonë ludeeci biteekë i mëmanyi bësonikë n'kaakë yimunë tutumu tu n'kangulu.

⁵ Fë yilu kasu, fabë sisyelibeenë babë bëwaalë bumpumu i bëlëtandaangë mëvafi maawu fë yilu fanë bëlëkwindulilaangë meengë mu lobukulu lu mësumu. Kasi ntaangu yiiyi ko bëfwenikini kutubilë mamooso omo.

⁶ Makë mooso bunë mëvangëninë, singangë-Nzaambi bëlëkotaangë kadë cilumbu ku civingë cin'tetë ci cinzwananë mu kusalë cisalu cyaawu.

⁷ Kasi tokë n'kuluutu ngangë-Nzaambi wulëkotaangë ku civingë cimwaali i naandi wulivaangë vyaasi mweekë mu n'vu. Naandi fwenikini kunatë meengë mu cibulu kulëkwiindulë ke Nzaambi mu cibilë ci mësumu maandi naveekë i mu mësumu më mboongu baatu.

⁸ Oboobo, Ciluunzi ci Saantu cin'leesi nzilë yi civingë ci saantu cibuunu kuzibukë mooti cinzwananë cin'tetë cicini.

⁹ Cyaawu cinganë ci ntaangu be yiiyi cin'leesi ti, mëkabu i bivakuli bi bibulu bën'kwindulë ke Nzaambi, byaawu kupodi ve kuvangisi n'timë wu wosuku muutu wun'kuundë kuba deku-dekoo.

¹⁰ Like tokë lyaambu lin'talë bilya, mëlafu i misaangu yi mpilë ku mpilë yi bulyomisi. Yaawu yabë mikaakë më cimuutu tee fanë Nzaambi kubalulë makë mooso.

¹¹ Kasi Kliistu wuyisë, dedë mweekë n'kuluutu ngangë-Nzaambi mu mëboti mo mamonikë. Naandi wukotë ku cinzwananë civyokili n'ciinzë i cike deku-dekoo, cinë cikaambu kutuungu ke baatu, dedë ti cyaawu cikeeli ko ci buloongo be buubu.

¹² Bunë Kliistu kwakoti vyaasi mweekë ci mëkulu ku civingë civyokilili busaantu, wusye kwindulë ko meengë më mëndombë i mibeenzë-ngoombi. Kasi naandi wuyindulë meengë maandi naveekë i wutuvuuci ci mëkulu mu mësumu miitu.

¹³ Meengë më mëndombë i më singoombi i mëbuufu më ngoombi bëyokë, bëm'wamunë mu baatu bëkaambu kulyoomë mu kulaandë byengulu, mu kubëlyoomisi mu tudiifë tooso tu nyitu.

¹⁴ Ningë lyekilë obo, meengë më Kliistu miinji n'ciinzë! Mu Ciluunzi ci sakë yi sakë, naveekë wuyiyindulë ke Nzaambi dedë mweekë civakuli cilyoomë. Meengë maandi mën'lyomisi mbalulwiitu mu mëvaangë mëbi, bwiinji tusalilë Nzaambi moonyi.

¹⁵ Mu bwaawu Kliistu lilingisi li n'kangulu wumoonë, bwiinji bo bëtelu ke Nzaambi bëtambulë mëboti më sakë yi sakë manë kukanyi ke baandi. Baawu bëlipodi cibilë mu lufwa be loolo, mwaawu baatu lumoonyi bëyobukilë mu tudiifë bëvaangë mu n'kangulu wun'tetë.

¹⁶ Fanë fëke n'kaandu, n'ciinzë ke faawu mu kuleesi ti wo wubiikë waawu wufwa.

¹⁷ Licyelikë, n'kaandu wukeeli n'ciinzë ko ningë wo wusonikë waawu wucili moonyi. Waawu wuke yi n'ciinzë tokë fë mbusë lufwa lwaandi.

¹⁸ Mu lyaawu, n'kangulu wun'tetë yivaandi wutoninë mu meengë.

¹⁹ Moyiizë wutendulë ntetë fëke bakë booso tutumu tooso bunë bun'kwendilë n'kaakë. Naandi wuboongë meengë më mibeenzë-ngoombi i mëndombë yimunë masi i kumwamunë mu libuuku li n'kaakë i mu mboongu yooso mu citafi cin'kwiisë i mwa citeendë ci n'lelë ci beengë.

²⁰ Naandi wusë tubë : « Lyaliili meengë mëzitikë n'kangulu wunë Nzaambi wuluvaanë mu kucinzikë. »

²¹ Moyiizë yivaandi wumwamunë meengë mu cinzwananë i mu biimë byakë byooso bëlësalilaangë.

²² Mu bunë bën'kwendilë n'kaakë, bëlëlyomisyaangë byakë byooso mu meengë i mësumu mëlëkobukaangë mooti meengë më bëtyamukë.

Civakuli ci Kliistu cin'kobulaangë mësumu

²³ Bifwaani byooso bi simpangulu si mëyilu bifwenikini kulyoomë mpilë mweekë. Kasi simpangulu si mëyilu syaveekë sike n'ciinzë kuvyokilë kunyeefë yi bivakuli.

²⁴ Cibilë Kliistu wusye kotë ko ku civingë ci saantu cituungu ke baatu, cilë ba buke cifwaani cicyelikë. Naandi wukotë tee kunë yilu, kunë wulë mu kuyileesi buyifanwabu fë nduunzi Nzaambi mu beeso.

²⁵ N'kuluutu ngangë-Nzaambi wu mboongo Sizwiifë wun'kotaangë kadë n'vu mu civingë civyokililë busaantu yimunë meengë më cibulu. Kasi Kliistu wusye kotë ko mpaapë vyaasi mu kuyikwindulë naveekë.

²⁶ Nkanë, naandi wulë monë mpaapë vyaasi mëcyeenji-mëndoongë kutoonë fanë ntonunu buloongo. Licyelikë, naandi wumonikë vyaasi mweekë ci mëkulu buyifanwabu, ku situkulu sintaangu, mu kubotulë lisumu i kuyivaanë naveekë dedë mweekë civakuli.

²⁷ Wosuku muutu lumoonyi wuvangunu mu kufwa vyaasi mweekë i wufundusu ke Nzaambi.

²⁸ Mpilë mweekë Kliistu yivaandi, wuyivakulë vyaasi mweekë mu kubotulë mësumu më mpaapë baatu. Naandi wum'monikooso vyaasi yimwaali, yaaku ti mu kubotulë mësumu, kasi mu kuvaanë luvukulu ke banë bëke mu kuciingë yi lufyaatu lwisulu lwaandi.