Ebele 8 - N’KANGULU WUMOONË

Yeesu n'kulutwiitu ngangë-Nzaambi

¹ Talaanu lyaambu linjiinji linë beeso tufwenikini kutubë : mati liboti beenë mu beeso mu kubakë n'kuluutu ngangë-Nzaambi, wuvwaandë ku mëyilu ku mëbakëlë më ntaanji yi Nzaambi, n'kwa-luleendo.

² Naandi wulë mu kusalë bisalu byaandi mu civingë ci saantu, cin'leesi ti nguliku cinzwananë ci cyelikë civangunu ke Fumu, yaaku ti ke muutu.

³ Wosuku n'kuluutu ngangë-Nzaambi wubyaalë mu kwindulë mëkabu i bivakuli. Bufwenikini yivaandi wiitu kubakë cin'viipë kun'kwindulë.

⁴ Ningë, naandi wabë fë n'toto, nkanë wulë ba ngangë-Nzaambi ko, cibilë yike banë bën'kwindulaangë mëkabu bo bën'vangëninë n'kaakë Sizwiifë.

⁵ Cisalu cin'salë singangë-Nzaambi be syooso dedë mweekë cifwaani, ciduundu mu manë mëke cyelikë ku mëyilu. Maawu mëfwanëkenë mu manë mëvangënë mu Moyiizë, ntaangu yo kufitë tulikilë cinzwananë ci saantu, Nzaambi wusë n'vaanë lutumu be loolo: «Njeeyi wufwenikini kuzungululë bwiinji cisalu cyaaku ciba deku-dekoo yi cifwaani cinë miinu yikuleesi fë yilu moongo.»

⁶ Kasi buyifanwabu, Yeesu bën'vandikë cisalu civyokilili kuzanjiku, cibilë naandi lilingisi mu N'kangulu wumboti, wuvangunu mu tukanyu tuvyokilili.

⁷ Ningë ti, N'kangulu wun'tetë wusye ba yi mëseembu ko, nkanë bësye viinji wumwaali ko.

⁸ Kasi mati mu mëseembu Nzaambi wusë kambilë mboongwaandi: « Bilumbu bin'kwiisë, bun'tubilë Fumu, miinu yin'vaangë N'kangulu wumoonë yimunë likaandë li Islayeelë i likaandë li Zuda.

⁹ Waawu, wusë m'ba ko dedë mweekë yi wo yivaangë yimunë sinkaakë syaawu bunë yibëboongë mu kooko mu kubëbaasi ku Zipiitë. Baawu bësye zitikë N'kangulu ko, i mu bwaawu, yisë be bëfwilyooso cyaali ko, bun'tubilë Fumu.

¹⁰ Talaanu, bunë bën'kwendilë N'kangulu wunë yin'vaangë yimunë likaandë li Islayeelë. Fë mbusë bilumbu be byoobyo, butubilë Fumu: Miinu yin'sonikë mëkomini maami mu biluunzi byaawu. Yin'dadikë yivaandi maawu mu mitimaawu: yim'ba Nzaambyaawu, i baawu bëm'ba mboongwaami.

¹¹ Wun'viipë ve mu baawu wun'vwa n'ciinzë kukaambë wayaandi kaambofo mwaanë yaandi nguli mu kusinë mu kun'zaabë, cibilë bakë booso bëkun'zaabë, kutoonë ke bibabanë yi tee ke bëkuluutu.

¹² Licyelikë, yin'lenvukilë tudiifë twaawu, yisë be tebukë moonyi ko mu mësumu maawu. »

¹³ Mu linë lin'talë N'kangulu wumoonë, Nzaambi wusë vangisi wun'tetë kuba wunkulu. Kosuku, linë lyeekë likulu i lyanunë lyabelëmë mu kunyambëkënë.