Ebele 7 - N’KANGULU WUMOONË

Melëkisedeekë, n'tinu i ngangë-Nzaambi

¹ Melëkisedeekë, wabë n'tinu wu Saleemë i ngangë-Nzaambi kunë salaangë yilu. Bunë Abalaamë wufuminë ku n'ziingu kunë naandi kulungilë mpakë yi mitinu, Melëkisedeekë wusë ke n'dyengënë i kun'sakumunë.

² Abalaamë wusë n'vaanë cikuuku cimweekë ci kuumi mu byakë byooso kuboongë. Lizinë li Melëkisedeekë lin'leesi ti : « n'tinu wusulëmë », naandi wabë n'tinu wu Saleemë lin'tubë ti « N'tinu wu n'sikë ».

³ Naandi lisya ve, nguli ve, nkaakë yivaandi ve. Lukuungu ve mu lubutulu lwaandi, kaambofo mu lufwa lwaandi. Naandi fwiifu yi Mwaanë Nzaambi: naandi wukalilë ngangë-Nzaambi tee yi tee.

⁴ Monanoobo bunenë bwaandi! Abalaamë nkaakë wusë n'vaanë cikuuku cimweekë ci kuumi mu byo kubakë.

⁵ Kosuku, banë bëke sindaandu si Levi bëkeeli singangë-Nzaambi bëke n'swa mu kuloombë cikuuku cimweekë ci kuumi ke mboongo Islayeelë, lyalyooli bëvaangë lyaawu mu baanë yaawu bë nguli, banë bëke yivaandi sindaandu si Abalaamë.

⁶ Naandi wusye butu ko mu ndaandu Levi, kasi wutambulë ke Abalaamë cikuuku cimweekë ci kuumi mu byo kubakë i naandi wusakumunë wo wutambulë tukanyu tu Nzaambi.

⁷ Kosuku, mpakë ve, wo wun'sakumunë mwiinji bunenë yi wo bën'sakumunë.

⁸ Sindaandu si Levi, banë bën'tambulë cikuuku cimweekë ci kuumi mu byakë byooso bëbakë, mati baatu kwaandi bën'fwa cilumbu. Kasi, mu linë lin'talë Melëkisedeekë cikuuku ci mpilë ocyo cisë veewu ke muutu wuke mu kuziingë, dedë mweekë bunë bun'sulikilë Libuungu li Nzaambi.

⁹ Vandi, tum'podi kutubilë abu: bunë Abalaamë wufutë cikuuku cimweekë ci kuumi ci businë bwaandi, Levi yivaandi wuyifutë cyaawu, naandi wunë sindaandu sitambulë cikuuku cimweekë ci kuumi mu byakë byooso.

¹⁰ Mu kumonë kwaandi, Levi wabë yibuunu kubutu, naandi wulëmonikë mu nkakaandi Abalaamë bunë Melëkisedeekë wuyisë mu ludyengënunu lwaandi.

¹¹ Cisalu ci bungangë-Nzaambi bu Sileviitë cyabë mbaandu n'kaakë bëvaanë ke mboongu Islayeelë. Kosuku, ningë singangë-Nzaambi Sileviitë bëvaangë cisalu ciboti, nkanë busye ba n'ciinzë ko mu kube basikë ngangë-Nzaambi yivyakënë mu bunkulu bu Melëkisedeekë yaaku ti mu bunkulu bu Aloonë.

¹² Cibilë, mooti n'salulu bungangë-Nzaambi bayiviinji, bufwenikini yivaandi kuviinji n'kaakë.

¹³ Fumwiitu, wunë bëtubilë mëbuungu be moomo, naandi musë cifuumbë cin'ka, muutu ve mu cifuumbë be cyooci wabë wusalë vyaasi bungangë-Nzaambi fë civakululu.

¹⁴ Lyaawu lizabukunu ti Fumwiitu wubutu mu cifuumbë ci Zuda, wunë Moyiizë wukaambu kutubë lin'viipë bunë kutubilë mu singangë-Nzaambi.

Ngangë-Nzaambi yin'ka yifwanëkënë yi Melëkisedeekë

¹⁵ Talaanu lyaambu livangisi kucyeesi makë mooso omo. ngangë-Nzaambi yin'ka yiyimonikë yifwanëkënë yi Melëkisedeekë.

¹⁶ Naandi wusye ba ngangë-Nzaambi ko mu mikaakë yin'talë sindaandu si n'sunyi. Kasi naandi weekë ngangë-Nzaambi mu luleendo lu luziingu lukaambu mësitukulu.

¹⁷ Licyelikë, Libuungu li Nzaambi lin'sisiminë: « Njeeyi wum'ba ngangë-Nzaambi yi tee yi tee mu cinkulu ci Melëkisedeekë. »

¹⁸ Bwaawu, n'kaakë wunkulu bëwuvenjikë, cibilë waawu wabë wudekë i wukaambu n'ciinzë.

¹⁹ Licyelikë, n'kaakë Moyiizë wusye natë cin'velë ko cike deku-dekoo. Kasi civuufu ciboti cisë tuveewu i mu cyaawu beeso tum'podi kubelëmë ke Nzaambi.

²⁰ Vandi, lukanyu luvangënë ke Nzaambi. Bëmesë beekë singangë-Nzaambi yaaku mu lukanyu be loolo.

²¹ Kasi Yeesu, bëm'byaasi ngangë-Nzaambi bunë bën'kwendilë lukanyu, bunë butubilë Nzaambi : «Fumu wulefë mpesë, i naandi kusë n'nyoongë ko: “Njeeyi ngangë-Nzaambi yi tee yi tee.”»

²² Vandi kasi, Yeesu na ciifi mu N'kangulu wumboti.

²³ Mu bwaawu, singangë-Nzaambi sintamë syabë mpaapë, cibilë lufwa lubëvangisi nkakini mu kulandilë cisalu cyaawu.

²⁴ Kasi Yeesu ke mu kuziingë tee yi tee i cisalu cyaandi ci bungangë-Nzaambi cin'kalilë.

²⁵ Mu lyaawu, naandi kupodi kuvuuci ci mëkulu banë bëm'belëmë Nzaambi mu naandi, cibilë naandi mu ntaangu syooso wuke moonyi mu kusambilë Nzaambi mu baawu.

²⁶ Yeesu n'kuluutu ngangë-Nzaambi wufwenikini mu beeso. Naandi saantu, wukaambu libi, lisumu ve. Naandi bën'kabulë yi bisumuci i wuzanjiku kunë salaangë mëyilu.

²⁷ Naandi wukeeli ko dedë mweekë bëkuluutu bë singangë-Nzaambi sin'ka : Naandi wukeeli ko yi n'ciinzë mu kuvaanë kadë cilumbu bivakuli, n'tetë mu mësumu maandi naveekë i vandi obo më mboongu yooso. Naandi wuyindulë civakuli vyaasi mweekë cimëkulu, bunë kwayivakuli naveekë.

²⁸ Licyelikë, n'kaakë Moyiizë wubyaasi dedë mweekë bëkuluutu bë singangë-Nzaambi baatu bëkaambu kulyoomë. Kasi Libuungu li mpesë Nzaambi, litubu fë mbusë n'kaakë lim'byaasi dedë mweekë n'kuluutu ngangë-Nzaambi Mwaanë wabë wuzanjiku deku-dekoo, sakë yi sakë.