Ebele 6 - N’KANGULU WUMOONË

¹ Mati mu bwaawu, twe balukaanu fo fëke liloonji li bëkuluutu, mu kubiikë maambu mën'tetë mën'talë saangu yi Kliistu. Beeso tusë bësimikooso ko maambu mën'tetë mu saangu be yiiyi: linjiinji mu kubalukë mu mëvaangë mëbi i kuta maanë mu Nzaambi,

² liloonji mu manë mën'talë lubatizyaalu i lutendukulu lu myooko, lutendulu lu luvulumuku lu bo bëfwa i lufundusu lu sakë yi sakë.

³ Twe yendyaanu! Mati lyalyooli lyaawu tufwenikini kuvaangë, ningë Nzaambi wulizolisi.

^4-6 Mu bwaawu, buni lim'beelë mu banë bën'vutukilë luziingu lwaawu lu n'tamë? Baawu bëtambulë vyaasi mweekë cyeseesë ci Nzaambi. Baawu bëtootë likabu li Nzaambi i bëbakë cikuuku ci Ciluunzi ci Saantu. Baawu bëyangëlëlë mu Libuungu li Nzaambi i bëyelikë kuzingilë mu luleendo tu buloongo buke mu kwiisë. Mu kumonë, baawu bëvutukilë luziingu lwaawu lu n'tamë! Kupodi ve mu kubënatë vyaasi yin'ka mu kubalulë luziingu, cibilë mu baawu, bëlë mu kuvutulë Mwaanë Nzaambi fë kuluusu i kun'lekulë fë ciyalëlë mu bifiingu.

⁷ Bunë n'toto wum'bwiilaangë masi më n'vulë kadë ntaangu, wun'vanaangë miti yike luvalu ke banë bëyikunaangë, Nzaambi wun'sakumunaangë n'toto be woowo.

⁸ Kasi ningë waawu wun'vaanë bisoso bi bisumbi i mëkayi mëke siseendë, waawu wukeeli yi luvalu ko. Byaawu bin'fuukë ke Nzaambi i bin'lakëtë ku mbaasu.

⁹ Oboobo, mooti tulë mu kutubilë obo, beeno sindiku syaami, beeso tun'sisimini ti luke mu nzilë mboti yi luvukulu.

¹⁰ Nzaambi wukeeli yi n'soci ko. Naandi wusë n'zimbëkënë ko cisalu ciinu, kaambofo, luzolo luleesi mu naandi, mu bisalu binë luvangisi i lucilë n'vaangooso ke bitamaanë bimesi.

¹¹ Kasi beeso tun'vwa n'ciinzë mu kadë muutu mu nkoongiinu kuleesi tee yi fanë siitu buvavambë bo bumweekë mu kukalilë mu civuufu ciinu cinenë.

¹² Keelaanu lulë ba yi boolo, kasi kukulilaanu cifwaani ci banë mu ciminu i luciimbu lumoonyi bën'tambulë manë Nzaambi kubëkanyi.

Lukanyi lu njiinji lu Nzaambi

¹³ Bunë Nzaambi kukanyi Abalaamë, naandi wulaanzi lukanyi mu mpesë kulefë mu lizinë lyaandi naveekë, cibilë fësye ba muutu ko wuvyokililë bukuluutu yi naandi mu kulivaangë.

¹⁴ Naandi wusë tubë : « Miinu yalefë mpesë mu kukusakumunë yinë lunduu i kukuvaanë mboongu yi sindaandu yi funë. »

¹⁵ Abalaamë wuviingë yimunë mpungë-moonyi i naandi wusë bakë byo Nzaambi kukanyi.

¹⁶ Bunë baatu bën'lefë mpesë, baawu bëlivangilë mu lizinë li muutu wubëvyokililë bukuluutu i mpesë ciifi cin'siisi yosuku mpakë.

¹⁷ Kosuku, Nzaambi wuzolisi kuleesyooso buboti ke banë bëfwenikini kutambulë lukanyi ti linë kufwiikë muutu ve wun'viinji lyaawu. Mati bwaawu, wusë bweelë kulefë mpesë fë lukanyu.

¹⁸ Maambu mwaali baatu kupodi ve kuviinji, mu maawu Nzaambi kupodi ve kupuutë. Mu bwaawu beeso twabakë ciswamunu mu naandi, beeso twaciinzi biitu mu kutatëminë mu civuufu cinë kutuzabikini.

¹⁹ Civuufu be cyoocyo cike dedë mweekë mbwa-puntu yi luziingu lwiitu. Cyaawu cisikëmë i ciciindë i cin'kotë fë n'lelë wu n'zo-Nzaambi tee kunë civingë ci saantu.

²⁰ Mati kwaawu Yeesu wukotë cin'tetë yi beeso i mu beeso cibilë naandi weekë n'kuluutu ngangë-Nzaambi wuke tee yi tee mu bunkulu bu Melëkisedeekë.