Ebele 5 - N’KANGULU WUMOONË

¹ Wosuku n'kuluutu singangë-Nzaambi, wusoolu mu baatu, cisalu cyaandi kusalilë Nzaambi mu cibilë cyaawu. Naandi wun'kwindulë mëkabu i bivakuli mu mësumu.

² Naveekë wumonikë wudekë. Mu bwaawu, naandi kupodi kuwulu banë bëke mu bunzimbu i bo bën'vitu.

³ Cibilë naveekë wudekë, wufwenikini kwindulë bivakuli yaaku tokë mu mësumu më mboongu baatu, kasi yivaandi mu baandi.

⁴ Muutu ve wum'podi kuyituunvi n'kuluutu ngangë-Nzaambi. Lyaawu lim'podi kuvangënë tokë mu mbilë Nzaambi, bo libeelë mu Aloonë.

⁵ Mpilë mweekë yivaandi, Kliistu wusye yituunvi naveekë ko luciinzu lu kuba n'kuluutu ngangë-Nzaambi. Naandi wulitambulë ke Nzaambi, wunë wutubë : «Njeeyi Mwanaami, kutoonë bubwayi, miinu Tataaku.»

⁶ Naandi wusë tubooso: «Njeeyi wulë ngangë-Nzaambi yi tee yi tee, mu bunkulu bu Melëkisedeekë.»

⁷ Mu bilumbu byooso bi luziingu lwaandi fë moongo butoto, naandi wulësambilaangë i wulëbondilaangë, wulëkaayaangë i mësweelë, ke Nzaambi wunë wabë likanë mu kun'vuuci mu lufwa. Nzaambi wusë n'kuwulu mu cibilë ci buleenvo bwaandi.

⁸ Cyelikë bunë kwabë mwaanë Nzaambi, naandi wabë wusinu buleenvo mu makë mooso kumweenë simpasi.

⁹ Bunë kwadukisi makë mooso omo, naandi wusë kuba cizibë ci luvukulu ci sakë yi sakë mu banë bëkun'lenvukilë.

¹⁰ Nzaambi wusë kun'tuunvi n'kuluutu ngangë-Nzaambi mu bunkulu bu Melëkisedeekë.

Lukumini mu kuleembu kulekulë ciminu

¹¹ Beeso tuke mpaapë maambu më kutubë mu manë mën'talë lyaambu be liili, kasi lyaawu lingusë mu kuluvaanë suundu, cibilë beeno lusë lengë zikulë kuwu ko.

¹² Mpaapë sintaangu syavyookë nkanë beeno lweekë miloonji, kasi mu kumonë beeno lucini yi tesu bëlusinë maambu mën'tetë mën'talë Nzaambi. Beeno lucinyooso nzalë mëdeveenë, yaaku ti bilya biciindë.

¹³ Wunë wun'kalilë mu kutoombë mëdeveenë wucini mwaanë, naandi kupodi ve kubakulë maambu manë mësulëmë.

¹⁴ Vandi kasi, bilya biciindë bivangununu mu bëkuluutu, mu manë bën'vaangë, baawu kupodi kuviisi liboti yi libi.