Ebele 4 - N’KANGULU WUMOONË

¹ Nzaambi wutubikilë lukanyu ti beeso tum'podi kukotë mu luvundulu lunë naandi wutubelikilë. Twe kelyaanu buboti mu kumaangë muutu ve mu beeso wuleembu kubakë luvoto mu kukotë.

² Cibilë beeso tutambulë Mpolu Mboti yi Nzaambi dedë mweekë yi banë babë mu ntaandu ciyumi. Kosuku baawu bëyuwu saangu ayi kasi bësye monë nkaali mu yaawu ko, cibilë bunë bëyuwu yaawu, baawu bësye yitambulë ko yimunë ciminu.

³ Beeso aba twata maanë, tun'kotë mu luvundulu beenë lunë Nzaambi wutubë : « Mu likaanzi lyaami, miinu yalefë mpesë : Sasabi, baawu kusë bën'kotë ko ku si luvundulu yinë yibëbelikilë! » Naandi wutubilë lyalyooli fanë fë maninë cisalu cyaandi fë ntonunu buloongo.

⁴ Licyelikë, fë n'viipë mu Libuungu bësonikë lyaliili mu manë mën'talë cilumbu ci saambwali : « Nzaambi wusë vuundë mu bisalu byaandi byooso cilumbu ci saambwali. »

⁵ Butubë yivaandi mu n'kaandë: « Sasabi, baawu kusë bën'kotë ko ku si luvundulu yinë yibëbelikilë. »

⁶ Banë bëyuwu ntetë Mpolu Mboti yi Nzaambi, bësye kotë ko mu luvundulu beenë cibilë baawu bëmaangë kuvitikë. Vandi kasi, lim'podyooso ke bën'ka mu kukotë.

⁷ Mati mu baawu, Nzaambi wuzitikë cilumbu cin'ka bën'teelë : « bubwayi aci ». Naandi wutubilë maawu bilumbu bivyookë mu munu Daviidë, mu libuungu lyo bëtubilë : « Ningë lube kuwu mbeembu Nzaambi bubwayi, numaanjyaanu ko kuzikulë kuwu. »

⁸ Licyelikë, ningë Zoswee wunatë mboongu baatu ku luvundulu, nkanë Nzaambi wusë be tubilooso ko mu cilumbu cin'ka.

⁹ Bwaawu, luvundulu lufwanëkënë yi cilumbu ci saambwali bëyindulë ke mboongo Nzaambi.

¹⁰ Cibilë wunë wun'kotë mu luvundulu lubelikilë Nzaambi, naandyoowo wun'vuundë yivaandi mu cisalu cyaandi dedë mweekë Nzaambi wuvundilë mu cyaandi.

¹¹ Twe vaanjyaanu mëngolo mu kukotë mu luvundulu be loolo. Twe vaanjyaanu bumë ti wun'viipë mu beeso kuleembu kubwa, mu kumaangë kulenvukë dedë mweekë sinkaakë siitu.

¹² Licyelikë, Libuungu li Nzaambi like moonyi i lin'salaangë. Lyaawu liinji kulwaalë yi cisaabë cilwaalë sinkoonzu siwali. Lyaawu lin'kotaangë tee fanë lin'kabulaangë mbali i ciluunzi, binamë i toonzu tu mivesi. Lyaawu lin'fundisyaangë bin'vweenvu i simbalulu si n'timë.

¹³ Cin'velë ve civangunu mu buloongo cim'ba ciswaamë fëke Nzaambi. Fë meeso maandi, makë mooso mëke fë ciyalëlë, mëkaambu mëswamunu i mati ke naandi tufwenikini beeso booso kwalulilë manë tuvangisi.

Yeesu n'kuluutu ngangë-Nzaambi

¹⁴ Twe ciindaanu mu ciminu cinë tulë mu kutendulë. Cyelikë tuke yi n'kuluutu ngangë-Nzaambi yinenë yinë yiyimonikë tee fë nduunzi Nzaambi : mati Yeesu, Mwaanë Nzaambi.

¹⁵ Beeso tukeeli ko yi n'kuluutu ngangë-Nzaambi yinenë yim'podi kucikunë kumonë simpasi yimunë beeso mu tudekë twiitu. Tiilyoko, ngangë-Nzaambiitu bën'seengë dedë mweekë beeso, kasi naandi wusye vaangë lisumu ko.

¹⁶ Twe belëmyaanu yi lufyaatu fë ntaanzi Nzaambi, fanë fëkeeli muulë. Beeso tun'tambulë n'leenvo i tum'bakë muulë, mu kubakë luzudulu mu ntaangu yo yifwenikini.