Ebele 3 - N’KANGULU WUMOONË

Yeesu mwiinji yi Moyiizë

¹ A baanë bë nguli, beeno lubakunu ke Nzaambi wunë wulutelë. Bwa boobo, swiingaanu ntalwiinu ke Yeesu, wunë Nzaambi kufilë i ngangë-Nzaambi wu ciminu wo tuke tendulaangë.

² Licyelikë, Nzaambi wun'soolë mu cisalu ocyo i naandi wabë wusulëmë dedë mweekë Moyiizë bunë bësonikënë : « Naandi wabë wusulëmë mu n'zo yakë yooso yi Nzaambi. »

³ Wunë wun'tuungë n'zo wun'vyokilë beenë luzanjiku yi n'zo yaveekë. Bwaawu, Yeesu mwiinji bumpumu yi Moyiizë.

⁴ Licyelikë, yosuku n'zo, yituungu ke muutu. Kosuku wunë wutuungë byakë byooso mati Nzaambi.

⁵ Moyiizë wabë wusulëmë mu n'zo yakë yooso yi Nzaambi, bo kuke ciseelu mu kutubë cimbaanji mu manë mëlëtubë Nzaambi.

⁶ Kasi Kliistu wusulëmë bunë kuke Mwaanë wutuulu fë ntwaalë n'zo-Nzaambi. Beeso n'zwaandi tukeeli, ningë tube luundë lufyaatu lwiitu i civuufu cinë beeso tuke lunyemu.

Luvundulu bëlundilë mboongo Nzaambi

⁷ Mu lyaawu, bunë bën'tubilë Ciluunzi ci Saantu : « Ningë lube kuwu mbeembu yi Nzaambi bubwayi aci,

⁸ numaanjyaanu kuwu ko, bunë beeno lum'balukilë, cilumbu cyo lun'seengë mu ntaandu ciyumi.

⁹ Fanë sinkaakë siinu si kun'sakilë byaamu i bë kun'sengilë, litubë Nzaambi, n'leembuko ti lumonë makë mooso mo yabë yivaangë

¹⁰ fë mëkumë-na më mivu. Mu bwaawu, miinu yisë ba mu likaanzi mu cibilë ci mboongo be yinina, i miinu yitubë: “Simbalulu syaawu sivyakënë ntaangu syakë syooso, baawu bësye zikulë kuwu ko manë miinu yilëtoombë mu baawu.”

¹¹ Mu likaanzi lyaami, yilefë mpesë: Sasabi, baawu bisë n'kotë ko mu si luvundulu yinë yibëbelikilë! »

¹² A baanë bë nguli, lwe zungululyaanu mu kumaangë wun'viipë mu nkoongiinu kuba n'timë wu m'bi, wukaambu kutukukë, wunë wukuvangisi kubalukilë Nzaambi wu moonyi.

¹³ Lwe cindësinaanu bitu benuveekë yi benuveekë mu kadë cilumbu, keti lilëzingilë bubwayi aci bunë bun'tubilë Libuungu, bwiinji wun'viipë ve mu beeno wum'maangë kuzikulë kuwu, mu kuyilekulë kupuutu mu lisumu.

¹⁴ Licyelikë, beeso sindiku si Kliistu, ningë tube kalilë mu lufyaatu tee ku siitu bunë tubeelë civuufu fanë ntonunu.

¹⁵ Mu bwaawu bëtubilë: « Ningë lube kuwu mbeembu Nzaambi bubwayi aci, numaanjyaanu ko kuzikulë kuwu, dedë mweekë bunë lum'balukilë. »

¹⁶ Kosuku, bënani bëyuwu mbeembu Nzaambi i bisë kum'balukilë? Baawu obo, bakë booso banë Moyiizë wubaasi ku Zipiitë.

¹⁷ Mu cibilë ci bënani Nzaambi wubeelë mu likaanzi fë mëkumë-na më mivu? Mu cibilë ci banë bësumukë i bëfwa mu ntaandu ciyumi.

¹⁸ Bunë Nzaambi kwalefi mpesë : « Baawu bisë n'kotë ko ku si luvundulu yinë yibëbelikilë », mu nani kulëtubilë? Naandi wulëtubilë mu cibilë ci banë bëm'baayi.

¹⁹ Licyelikë, beeso tum'monë ti, baawu bësye podi ko kukotë kuumë beenë ku luvundulu cibilë baawu bëmaangë kun'vitikë.