Ebele 12 - N’KANGULU WUMOONË

Nzaambi Tatiitu

¹ Mu bwaawu, besuviitu tuzuku ke nkoongë yinenë yi simbaanji. Twe botulyaanu cyosuku cin'vangisi nyendulwiitu kuzitë, yiveko lisumu linë lin'kobëmë mu beeso i twe kumbelilyaanu mu cisalu cyo bëtukambilë.

² Twe sitikaanu ntalwiitu mu Yeesu, wunë ciminu ciitu cilengililë fë ntonunu i ku siitu. Naandi wucikunë kufwa fë kuluusu, kukaambu kumonë sonyi mu mpilë lufwa be loolo, mu cibilë ci liyaanji linë bën'swekilë. Buyifanwabu, naandi wuvwaandë ku mëbakëlë më ntaanzi Nzaambi.

³ Balaanu mu naandi mu mpilë lutunzukunu lunë kuvitikë mu cibilë ci bisumuci. Mu boobo, leembwaanu kuba mu mpokoongu i kuvolë biitu.

⁴ Cibilë, mu n'zingwiinu yimunë lisumu, beeno lubuunë vyaasi kunwaanë tee yi kunë lufwa.

⁵ Beeno lwazimbëkënë ndoonji yinë Nzaambi wulë mu kuluvaanë dedë mweekë baanë baandi? « A mwanaami, keelë wulë maangë liseembo li Fumu, i wuvoli bitu ko bunë naandi wukuseembë!

⁶ Kasi Fumu wun'vanaangë liseembo ke wunë kuzolisi, naandi wun'limëtaangë siswaali ke wunë kuzabisi ti mwanaandi. »

⁷ Vitikaanu simpasi sinë Nzaambi wulë mu kulusembilë : naandi wulumonë buke baanë baandi. Mwaanë mbici wun'kaambwaangë kuseembu ke tataandi?

⁸ Ningë bësye luvaanë liseembu ko bo bukeeli baanë baandi booso, oboobo beeno lukeeli ko cyelikë baanë baandi kasi lubutu mu ndaayi.

⁹ Twe tebukaanu moonyi mëtaatë miitu më cinsunyi : bëlë tuseembaangë i tulë bëcinzikaangë. Beeso tufwenikini kulenvukë ke Tatiitu ke ku mëyilu i mu kutambulë luziingu.

¹⁰ Mëtaatë miitu mëlëtuseembaangë fë mwa ntaangu kwaandi, bëlëmonaangë ti liboti. Kasi Nzaambi wutuvanaangë ndoonji mu liboti liitu, bwiinji tuba mu busaantu bwaandi.

¹¹ Mooti batuseembë, tum'balë mu ntaangu mweekë, lyaawu lituvangisi kuba mu cyuundë yaaku ti liyaanji. Ku ntwaalë yikwendë, banë batambulë mpilë ndongulu oyo, bëm'byalilë : n'sikë wubundënë mu luziingu lusulëmë.

Mëkomini i tubikinyi

¹² Lwe cinzyaanu myookwiinu yivolë, lucinzyaanu mëkungulu miinu mëdekë!

¹³ Lwe landilaanu tobulu tusulëmë, bwiinji kuulu kutolëkënë kuleembu kubolëkënë, kasi kulengë belukë.

¹⁴ Vaangaanu buumë mu kuba mu n'sikë yimunë baatu bakë booso i kuba yi luziingu lu busaantu. Kasi kukaambu lyalyooli, wun'viipë ve wum'monë Fumu.

¹⁵ Keelë wun'viipë wulë maangë muulë Nzaambi. Muutu ve wum'ba dedë mweekë n'ti wun'vaangë lusweenu, myangëlë, wum'menë i wun'vangisi mbungë-ntwaali mu mpaapë baatu.

¹⁶ Wun'viipë ve mu beeno wum'ba yi busafu, wun'viipë ve wun'kwengulë biimë bi saantu, dedë mweekë Ezawu, wunë mu ndiiwu mweekë, wusumbisi bukuluutu bwaandi.

¹⁷ Ku ntwaalë yikwendë, beeno lulizabisi, naandi wuzolë kubyalilë lusakumunu, bisë n'nyakunë. Wusye bakë luvoto ko mu kuliviinji, keti wulitombilë mu kulilë.

¹⁸ Nusye belëmë ko fëke cinë lum'podi kusiimbë, moongo Sinaayi, yimunë mbaaswaandi yilëvulë, citoombi cike pipitii i mpeemu-ngudi,

¹⁹ ncyeembi mbudi i lutendulu lu mbeembu. Bunë basë Islayeelë bisë kuwu mbeembu be yooyi, baawu bisë maangooso kuwu lin'viipë.

²⁰ Licyelikë, baawu bisye podi ko kuvitikë lutumu alu : « Wosuku muutu wun'siimbë moongo, keti wulë ba cibulu, wun'voondu mu mëmanyi. »

²¹ Linë bëlëmonë lyabë kwaatë-yekë : Moyiizë wusë tubë : « Yilë mu kutekë bitu, bunë boomë bwakun'kotilë! »

²² Kasi beeno lwabelëmë fë moongo Siyoonë i mu livulë li Nzaambi moonyi, Yelusaleemë lu yilu, yimunë lilaangu lyaandi li siyaanzi.

²³ Beeno lwabelëmë fë libuundu like mu n'saangu, li baanë bëbakëlë bëbutu ntetë, bo mëzinë mësonëmë ku mëyilu. Beeno lwabelëmë yi Nzaambi, nzoonzi yi baatu lu moonyi i biluunzi bi baatu bësulëmë, beekë bëlyoomë.

²⁴ Beeno lwabelëmë yi Yeesu, lilingisi li n'kangulu wumoonë i mu meengë maandi mësekuku mën'tubë mu nteku yivyokilili yi më Abeelë.

²⁵ Kebaanu! Numaanjyaanu ko kuwu wunë wulë mu kulukaambë. Bo bëmaangë kuwu wo wukubëbikinyi fë moongo butoto, bësye tiinë kastikë ko. Kubeelë buni mu beeso mu kutiinë, ningë tube maangë kuwulu wunë wutubikini ku mëyilu.

²⁶ Ntaangu ntamë, mbeembwaandi yinyikunë n'toto. Kasi buyifanwabu, naandi watuvaanë lukanyi be loolo : « Miinu yin'nyikunooso yaaku tokë n'toto, kasi yivaandi li yilu. »

²⁷ Bikumë « Vyaasi yin'kooso » bin'leesi ti biimë bivangunu mba bin'tyamukë i bin'zimbilë bwiinji ti binë binziingë byo bin'kaambu kutyamukë.

²⁸ Twe baanu yi luzaabu cibilë beeso tun'tambulë lwaangu lun'kaambu kutyamukë. Twe baanu yi luzaabu be loolo mu kusalilë Nzaambi mu nteku yifwenikini kun'toonzi, yimunë luciinzu i boomë.

²⁹ Licyelikë, Nzaambiitu mbaasu yin'kookaangë.