Ebele 11 - N’KANGULU WUMOONË

Ciminu

¹ Kusiilë ciminu mu Nzaambi, mati kuta lyaanë mu linë bën'siilë civuufu, kusiinji cyelikë mu binë bin'kaambu kumonikë.

² Mati mu ciminu cyaawu, bëkuluutu bë ntamë bisë monë bumbaanji bu Nzaambi.

³ Mu ciminu mwaawu tun'zabilë ti buloongo buvangininë mu libuungu li Nzaambi, bwaawu ti binë bim'monikë bivangununu mu byo bin'kaambu kumonikë.

⁴ Mu ciminu, Abeelë wuyindulë ke Nzaambi civakuli civyokilili kunyeefë yi cyo ci Kayiinë, Mu cyaawu mwa kuteelu wusulëmë ke Nzaambi, cibilë naveekë Nzaambi wusë toondë mëkabu maandi. Mu ciminu cyaandi, bosuku bubeeli ti wufwa, Abeelë wucini n'tubë.

⁵ Mu ciminu, Enookë wusë nanguku ke Nzaambi i wusye fwa ko. Muutu ve wusë be m'monë cibilë Nzaambi wun'nangunë wun'tuulë fë kumë lyaandi. Libuungu lin'tubë ti ntetë na kunangunu, Enookë wutoonzi Nzaambi.

⁶ Kosuku, muutu ve wum'podi kutoonzi Nzaambi kukaambu ciminu. Licyelikë, wunë wum'belëmë fëke Nzaambi wufwenikini kuta lyaanë ti Nzaambi wukeeli i wun'seendaangë banë bëkun'toombaangë.

⁷ Mu ciminu, Nowee wuyuwu tubikunu tu Nzaambi mu manë mëfitë vangënë i bëlëkaambu ntetë kumonë. Naandi wusë cinzikë Nzaambi i wutuungë likuumbi li masi linë kuvukilë yimunë likaandë lyaandi. Mu bwaawu, naandi wutabë buloongo i wutambulë mu ciminu cyaandi ke Nzaambi likanë mu kuba cibyalili mu n'sulumunu.

⁸ Mu ciminu, Abalaamë wuvitikë mbilë Nzaambi: naandi wuyendë ku si yinë Nzaambi wukanyi kun'vaanë mu kubyalilë. Naandi wuyendë, kuzaabë ve kunë kulëkwendë.

⁹ Mu ciminu, naandi wuzingilë dedë mweekë mweeni ku si yo Nzaambi kun'kanyi. Naandi wusë zingilë mu cinzwananë i Isaakë i Zakoobë, banë bëtambulilë yivaandi lukanyu lo lumweekë ke Nzaambi.

¹⁰ Cibilë Abalaamë wulë ciingaangë livulë like sibaandu siciindë, linë Nzaambi wuke ngeelë i ntuunji.

¹¹ Mu ciminu, Abalaamë wusë ba taatë, kosuku bunaani, naandi wuvyokilë mpuungë më kubutë mwaanë i Sala n'kasyaandi wabë cisitë. Naandi wabë yi lufyaatu ti Nzaambi wun'dukisi lukanyu lwaandi.

¹² Mati mu cibilë ci muutu mweekë, wunë wabelëmë kufwa, wusë bakë mpaapë sindaandu dedë mweekë lutaangu lu simbotë si yilu, tembe-tëtee buke singeenzë si cisenginini mu ndaambu m'bu.

¹³ Mati mu ciminu baatu bakë booso bisë fwa. Baawu yibuunu kutambulë biimë biboti binë Nzaambi kubëkanyi, kasi baawu bëbitalilë i bisë bëbililë cinaanu. Baawu bisë kubakulë ti babë beeni i bën'zingilë fë mwa ntaangu fë moongo butoto.

¹⁴ Banë bën'tubilë obo bën'leesi cyelikë ti baawu bëlëtoombaangë si.

¹⁵ Ningë baawu bëlëbalaangë yi linyoonji si yo bëfuminë, nkanë bëbakë luvoto lu kuvutukënë.

¹⁶ Cyelikë, baawu bëlëtoombaangë si yimboti, dedë ti si yi yilu. Mati bwaawu Nzaambi wusë yi sonyi ko mu kuteelu Nzaambyaawu. Licyelikë naandi wubëbelikilë livulë.

¹⁷ Mu ciminu, Abalaamë wuyindulë Isaakë civakuli bunë Nzaambi kwan'seenji. Naandi wubelëminë mu kwindulë mwanaandi viingu, kosuku wutambulë lukanyu.

¹⁸ Nzaambi wun'kaambë : « Mati mu Isaakë mwaawu wum'bakilë sindaandu yikukanyi. »

¹⁹ Kasi Abalaamë wusë biilë ti Nzaambi wabë yi mëngolo mu kuvulumunë Isaakë. Mati bwaawu kun'vutulilë mwanaandi, dedë ti muutu wavulumukë.

²⁰ Mu ciminu, Isaakë wuvaanë Zakoobë i Ezawu lusakumunu lun'dedëkënë kun'twaalë yikwisë.

²¹ Mu ciminu, Zakoobë wabë wusakumunë baanë bë Zozeefë, ntetë naandi kufwa. Naandi wusë cindilë mu luveengu lwaandi i wusë kuundë Nzaambi.

²² Mu ciminu, Zozeefë fë siitu luziingu lwaandi, wutendulë basë Islayeelë bëm'basikë ku Zipiitë i wusë sulikë bunë bëfwenikini kusiilë mivesyaandi.

²³ Mu ciminu taatë i mamë yi Moyiizë bën'sweekë kwaasu ku ngoondi tatu fë mbusë lubutu lwaandi. Baawu bisë monë ti wabë m'boti mwaanë i bisye monë boomë ko mu kutundukënë n'kaakë n'tinu.

²⁴ Mu ciminu, Moyiizë, abu kwe ba n'kuluutu, wumaangë kuteelu mwaanë wubutu ke mwaanë wu n'cyeetu Falawoonë.

²⁵ Naandi wuzolë kumonë binkuungë yimunë mboongu Nzaambi tiilyoko yikumonë sinyeenzi mu bideenzë bi mwa ntaangu bi lisumu.

²⁶ Naandi wumonë ti kwengulu bunë bëyengulilë Kliistu mwiinji businë buvyokililë bunenë i businë bu si Zipiitë. Licyelikë naandi wusitikë ntalwaandi mu n'seendo wun'kwisë ku ntwaalë.

²⁷ Mu ciminu Moyiizë wusë botukë ku Zipiitë, boomë ve mu likaanzi li n'tinu. Naandi wabë wukangiminë, dedë mweekë wulumonaangë Nzaambi wun'kaambu mëmweeno.

²⁸ Mu ciminu, naandi wusë kuvaangë n'saangu Paakë i wusë loombë bëtyamunë meengë mu mëvitu më sinzo, bwiinji yaanzi yi lufwa wuleembu kuvoondë baanë bëbutu ntetë bë Islayeelë.

²⁹ Mu ciminu, basë Islayeelë bësabukë m'bu-mbeenji dedë mweekë n'toto wuyumë. Kasi bunë basë Zipiitë bëyelikë kuvaangë bo bumweekë, bakë booso bisë siindë.

³⁰ Mu ciminu, bibakë bi Yeliko bisë bwa, bunë basë Islayeelë bisë zengililë fë saambwali li bilumbu.

³¹ Mu ciminu, Laabë, n'cyeetu nduumbë sye fwa ko yimunë banë bëmaangë kucinzikë Nzaambi, cibilë naandi wutambulë beeni yimunë bwalëkisi.

³² Miinu mbicyooso yim'podi kutubë? Ntaangu voo mu kutubilë mu Zedoyoonë, Balaakë, Samësoonë, Zefete, Daviidë, Samweelë yimunë mibici.

³³ Mu cibilë ci ciminu, baawu bisë lungilë mpakë twaangu, bësalilë n'sulumunu i bisë tambulë binë Nzaambi wubëkanyi. Baawu bëkaangë minu singo,

³⁴ bëzimë simbaasu sinenë, bëtiinë mu kufwiilë mu cisabë. Baawu babë bëdekë i bëciindë. Baawu babë yi n'viingu mu n'ziingu i bisë kumbisi mësodaadi më beeni.

³⁵ Mu ciminu, bëcyeetu bëmonë sinvuumbi syaawu kuvulumukë. Bëmesë bëmonë mëcyeenji mëdoongë. Baawu bëmaangë bëbëvuuci bwiinji bëbëzanjikë mu luvulumuku lu njiinji.

³⁶ Bën'kooso bëdyeengë i bëviimbu siswaali, bën'ka bëkaangu mu simpaangë i kubëlakë mu buloko.

³⁷ Bëmesë bëfwiilë mu mëmanyi, bën'ka bëcyelu mu bikwaaku mu bitini byooli, kaambofo mu cisabë. Baawu bëlëkwendaangë kadë nkoonzu bëvwaatë mikaandë mëmemë kaambofo yi sinkoombo, babë biyeembi, bëbëkwamisi i bëbënyokulë.

³⁸ Buloongo busye ba sisu mu baatu aba ko! Baawu bëlë ke teembilaangë mu sintaandu siyumë i mu myoongo, baawu bëlëzingilaangë mu miduungutu i mivwiili yi n'toto.

³⁹ Bakë booso bëvitiku ke Nzaambi mu cibilë ci ciminu cyaawu. Mu kumonë, baawu bësye tambulë ko byo Nzaambi kubëkanyi.

⁴⁰ Licyelikë, Nzaambi wubëlikilooso cin'viipë civyokilili mu beeso i naandi sye zolë ko ti baawu bëlyoomë kukaambu beeso.