Ebele 10 - N’KANGULU WUMOONË

¹ N'kaakë Moyiizë wukeeli ko lumonukunu lu cibeeni mu byo bike mu kuziingë. Waawu cifwaani tokë ci mëboti më cilë n'kwiisë. N'kaakë be woowo kupodi ve kulyomisi bo bëm'belëmë Nzaambi : buni waawu wum'podi yimunë bivakuli byo bimweekë binë bën'kwindulë kadë n'vu mu ntaangu syakë syooso?

² Ningë bo bën'kuundaangë Nzaambi bëlyoomë vyaasi mweekë mu mësumu maawu, baawu kusë bëbe seembu ko mu lyosuku lisumu i bën'siitë kwindulë cyosuku civakuli.

³ Cyelikë, mu bivakuli be byoobi, baatu bisë tebukë moonyi mu mësumu maawu mu kadë n'vu.

⁴ Cibilë meengë më singoombi i më mëndombë kupodi ve kobulë mësumu.

⁵ Mu bwaawu, ntaangu bunë ye fwaani mu kukotë mu buloongo, Kliistu wukaambë Nzaambi : « Njeeyi wusye zolë ko civakuli, kaambofo likabu, kasi njeeyi wukum'paangë nyitu.

⁶ Njeeyi wusë m'monë nyeenzi ko mu bibulu biyoku fë civakululu, kaambofo mu bivakuli bi lobukulu lu mësumu.

⁷ Mu lyaawu yitubë : “Miveekë yin'kwisë ke njeeyi, o Nzaambi mu kuvaangë n'vwiilwaaku, mu kulandilë manë bësonikë mu miinu mu libuuku li saantu.” »

⁸ Naandi wutubë ntetë : « Njeeyi wusye zolë bivakuli ko, keti mëkabu, keti bibulu biyoku fë civakululu, keti civakuli ci lobukulu lu mësumu i bisye kun'vaangë nyeenzi ko. » Mu kumonë bivakuli be byoobyo biyindulu bo bën'kwendilë n'kaakë.

⁹ Naandi wutubooso : « Miveekë yin'kwisë mu kuvaangë n'vwiilwaaku. » Mu boobo, naandi wabotulë bivakuli bi ntamë i mu kuviinji mu byaandi.

¹⁰ Yeesu Kliistu wuvaangë n'vwiilu Nzaambi. Naveekë wuyivakulë vyaasi mweekë ci mëkulu likabu li nyitwaandi i mu bwa boobo beeso tulyoomë mu lisumu.

¹¹ Kadë cilumbu ngangë-Nzaambi wun'telëmaangë mu kusalë cisalu cyaandi. Naandi wun'kwindulaangë bivakuli byo bimweekë, bin'kaambu kobulë mësumu.

¹² Kosuku, Kliistu, wo naandi wuyiyindulë civakuli cimweekë mu mësumu i lya lyoolyo cimëkulu i naandi wusë vwaandë ku më bakëlë më Nzaambi.

¹³ Buyifanwabu, mati faawu naandi wulë mu kuciingë ti Nzaambi wucitulë simbeenyi syaandi bilyatulu byaandi bi maalu.

¹⁴ Bwaawu, mu likabu limweekë, naandi walyomisi cimëkulu bo kwalyomisi mu lisumu.

¹⁵ Ciluunzi ci Saantu citusisimini maawu yivaandi. Cibeeni, naandi wusë tubë ntetë:

¹⁶ « Talaanu linë lin'leesi n'kangulu wunë miinu yin'zitikë yimunë baawu, ku mbusë bilumbu be binë binaani, butubilë Fumu: Miinu yin'sonikë tutumu twaami mu n'timaawu, i miinu yin'dadikë twaawu mu ciluunzi cyaawu. »

¹⁷ Naandyooso wusë be tubë : « Miinu yisë n'tebukë moonyi ko mu tudiifu twaawu i mësumu maawu. »

¹⁸ Kosuku, ningë mësumu mëbëkobukë, foofë, fë syeeli likabu ko li kuvaanë.

Twe belëmyaanu ke Nzaambi

¹⁹ Bwaawu, baanë bë nguli, beeso twabakë lusyalulu mu kukotilë ku civingë civyokilili busaantu mu mëkanë më meengë më Yeesu.

²⁰ Naandi watuzibulilë nzilë yimoonë i yi moonyi fë livwaasi li n'lelë li civingë civyokilili busaantu, lin'tubë ti nyitwaandi naveekë.

²¹ Beeso tuke yi n'kuluutu ngangë-Nzaambi bëtuulë fë n'tu n'zo-Nzaambi.

²² Twe belëmyaanu ke Nzaambi yimunë n'timë wucyelikë i civuufu cyooso, n'timë wulyoomë mu makë mooso mën'vaanë mbalulu yimbi i nyitu yisukulu mu masi mëlyoomë.

²³ Twe luundyaanu buboti civuufu cyo tun'tendulaangë, cibilë Nzaambi wusulëmë mu tukanyu twaandi.

²⁴ Tukebësënaanu besuveekë yi besuveekë, mu kutufusi n'viingu mu kuzolë buboti i mu kuvaangë maambu mëboti.

²⁵ Tulekulyaanu ko mëbuundu miitu dedë mweekë bën'ka beekë yi ciipë ci kulivaangë. Tiilyoko, twe cindësënyaanu besuveekë yi besuveekë i fanë lum'monë kubelëmë cilumbu ci Fumu.

²⁶ Cibilë, mooti tube tatëminë kuvaangë lisumu mu n'vwiilwiitu, ku mbusë kubakulë cyelikë, fë syeelyooso ko civakuli cin'kobulë mu mësumu.

²⁷ Linë lyasyaalë mu beeso mu kutambulë yimunë likaanzi lyooso lufundusu lu Nzaambi i mbaasu yinenë yin'lakisi simbeenyi syaandi.

²⁸ Wosuku wun'kaambu kulenvukë mu n'kaakë Moyiizë bëkun'voondë, cyuundë ve, ningë libi lyaandi bëbe litubilë cimbaanji ke baatu bwaali kaambofo bëtatu.

²⁹ Buni bëm'beelë mu wunë wun'kwengulë Mwaanë Nzaambi, wunë wum'monë buunë kwaandi meengë më n'kangulu manë mën'lyomisi i wunë wun'dyeengë Ciluunzi ci cizibë ci muule?

³⁰ Licyelikë, beeso tuzabisi, wunë wutubë : « Mati miinu, yin'nwaanë cikaangë, yin'futë kadë muutu ndobwaandi » i wutubë yivaandi : « Fumu wun'fundisi mboongwaandi. »

³¹ Litudë mu kubwiilë mu myooko Nzaambi yi moonyi.

³² Tebukaanu moonyi mu manë lumonë mu ntaangu yivyookë. Mu bilumbu be binë binaani, abu kwayaci cyeseesë ci Nzaambi, beeno lum'monë mpaapë simpasi, lucikë n'ziingu wunenë.

³³ Bën'viipë mu beeno bëfiingu i bën'nyokulu fë ciyalëlë, kosuku bëmesë babë bëbeliminë mu kuzudi bo bëlëviimbu.

³⁴ Licyelikë, beeno lumonë simpasi si banë bëke mu buloko i bunë basiimbë biimë biinu, beeno luvitikë yimunë liyaanji mu kuluvokënë biimë biinu, bo luzabisi ti luke yi businë buvyokilili kunyeefë, bin'ziingë sakë yi sakë.

³⁵ Keelaanu lulëlekulë civuufu ciinu: n'seendo wunenë ban'lundilë.

³⁶ Beeno luke n'ciinzë lutatumunu mu kuvaangë n'vwiilu Nzaambi i kutambulë linë naandi kulukanyi.

³⁷ Licyelikë, bësonikë : « Yivaandi mwa ntaangu, mwa fwaati kwaandi to, i wunë fwenikini kwiisë wun'kwisë, naandi wabelëmë.

³⁸ Kosuku, wunë wusulëmë fë meeso maami, butubë Nzaambi, wun'zingilë mu ciminu, kasi ningë naandi wun'vutukë mbusë, miinu yisë m'monë nyeenzi ko mu naandi. »

³⁹ Beeso tukeeli ko mu bo bëlë mu kuvutukënë mbusë i bën'nyambëkënë. Kasi beeso tuke bo bata maanë i bukeeli mu nzilë luvukulu.