Ebele 1 - N’KANGULU WUMOONË

Nzaambi wutubilë mu Mwanaandi

¹ Ntaangu sinaani, Nzaambi wutubilë mpaapë vyaasi ke sinkaakë siitu i mu mpilë ku mpilë yaandi mu mibici.

² Kasi buyifanwabu mu ntaangu si siitu, naandi watukambilë mu Mwanaandi. Mati mu naandi mwaawu Nzaambi kuvangilë buloongo i kutuunvi cibyalili ci byakë byooso.

³ Mwaanë wun'lesikë bumpumu bu Taatë, naandi cyelikë cifwaani ci Nzaambi, wun'siimbë buloongo mu libuungu lyaandi li luleendo. Abu kwamani kulyomisi baatu lu moonyi mu mësumu maawu, naandi wusë vwaandë ku mëyilu ku mëbakëlë më Nzaambi, kunë salaangë mëyilu.

Mwaanë mwiinji kuzangëmë yi siyaanzi

⁴ Mwaanë mwiinji kuzangëmë yi siyaanzi. Nzaambi wun'vaanë lutumu luvyokilili bunenë mu lwaawu baawu.

⁵ Licyelikë, Nzaambi wusye kaambë vyaasi ko ke wun'viipë mu siyaanzi : « Njeeyi wuli Mwanaami, yakubutë Cibubwayi, miinu yim'ba Tataaku. » Naandi wusye kaambë lyalyooli ko ke yaanzi : « Miinu yim'ba Taatë mu naandi, i naandi wum'ba Mwaanë mu miinu. »

⁶ Kasi mu ntaangu yo Nzaambi kufitë filë Mwanaandi wubutu ntetë mu buloongo, naandi wutubë : « Siyaanzi syakë syooso si Nzaambi bëfwenikini kun'kuundë. »

⁷ Mu siyaanzi, naandi wutubë : « Nzaambi wun'vaangë mu siyaanzi syaandi simpeemo i biseelu byaandi milaku-mbaasu. »

⁸ Kasi mu cibilë ci Mwaanë, naandi wutubë : « Ntaanzyaaku, a Nzaambi yin'kalilë. Mati mu n'sulumunu mwaawu wun'tuminë lwaangu lwaaku.

⁹ Njeeyi wuzolisi binë bisulëmë, wuleendë libi, mu lyaliili Nzaambi, Nzaambyaaku wukubyasilë, wudukulë fë yilu n'twaaku mëfutë më liyaanji, i wakusoolë njeeyi mwiinji yi bayaaku. »

¹⁰ Naandi wutubë yivaandi : « Mati njeeyi, Fumu fë ntonunu wuvaangë n'toto, li yilu, bivaangu bi myookwaaku.

¹¹ Byakë byooso obyo bin'zimbilë, kasi njeeyi wun'kalilë. N'toto i li yilu bin'diifë dedë mweekë binkutu bikulu.

¹² Njeeyi wubiziingë dedë mweekë ciyuungë, i byaawu bin'citukë bo buke binkutu. Kasi njeeyi wun'kalilë bo bumweekë i luziingu lwaaku lusë n'siitë ko. »

¹³ Nzaambi sye kaambë ke wun'viipë ko mu siyaanzi syaandi : « Yisë kalë ku mëbakëlë maami, miinu yin'citulë simbeenyi syaaku cilyatulu cyaaku ci maalu. »

¹⁴ Siyaanzi baawu biluunzi bin'salilaangë Nzaambi : naandi wubëfilaangë mu kuzudi banë bëfwenikini kutambulë luvukulu.