3 Za 1 - N’KANGULU WUMOONË

Sibweekë

¹ Miinu n'kuluutu, ke ndikwaami Ngayuusë yin'zolaangë mu cyelikë cyooso.

² A ndikwaami, yin'tiisi ti makë mooso mëlyaatë buboti mu njeeyi i wuba yi buvinyi mu nyitwaaku i mu mbalyaaku.

³ Baanë bë nguli bakwiisë i ba kun'kaambë cimbaanji cyaaku cisulëmë mu bucyelikë i buni njeeyi wulë mu kuzingilë mu bucyelikë. Miinu yiba beenë mu nyeenzi.

⁴ Cyosuku ve ci kum'pangisi kuba mu nyeenzi mu kuzaabë ti baanë baami bën'zingilaangë bunë bwaawu mu bucyelikë.

Ngayuusë Muutu wusulëmë

⁵ A ndikwaami, njeeyi wuyileesi ti wusulëmë mu makë mooso wun'vaangë mu baanë yaaku bë nguli, beeni yivaandi.

⁶ Baawu bëvaanë cimbaanji ci luzolo lwaaku fë ntwaalë Cingangë ciitu. Nkokolë syaaku, bëzudi, mu kulandilë mweendwaawu bunë bufwenikini fë nduunzi Nzaambi.

⁷ Mu lyalyooli, baawu bisë ba mu mweendo mu cisalu ci Kliistu i kuvitikë cin'velë ve ci banë bëkeeli bitamaanë ko.

⁸ Beeso tufwenikini kuba yi likanë mu kuzudi baatu bë mpilë oyo, bwiinji tubeliminë yiviitu mu kutendulë bucyelikë.

Dyotëleefë i Demetëluusë

⁹ Miinu yasonikë citini ci n'kaandë ku Cingangë ciinu, kasi Dyotëleefë wunë wun'zolaangë kuyileesi bufumu, wusë n'lengilë moonyi ko mu manë yin'tubë.

¹⁰ Mu lyaawu, ntaangu yin'kwisilë, yim'baasi fë ciyalëlë makë mooso mëbi kun'vaangaangë, naandi wum'basyaangë mëbuungu mëbi më lupuutu mu beeso. Yaaku tokë mo maawu ko: naandi wum'mangaangë kwaakë baanë bë nguli bën'vyookë i banë bën'toombë kubëtambulë, wubëfuungë i kubëvaangë simpasi i kubëkulë mu Cingangë.

¹¹ A ndikwaami, keelë wulëlaandë simpangulu simbi, kasi linë like liboti. Wunë wun'vaangë liboti muutu Nzaambi kukeeli. Wunë wun'vaangë libi wusye zaabë ko Nzaambi.

¹² Bakë booso bën'tubë liboti mu Demetëluusë i bucyelikë bën'vaanë cimbaanji mu naandi. Beeso yiviitu, tuvaanë cimbaanji ciboti mu naandi i njeeyi wuzabisi ti cimbaanji be cyooci ci cyelikë.

Sibweekë si siitu

¹³ Miinu yim'bakooso maambu më mpaapë mu kukukaambë, vandi kasi, yisye zolë ko mu kumësonikë mu ndiimbë i mu lapi.

¹⁴ Yim'balë ti mëlookë yikumonë i beeso tun'tubësënë fë cimweekë.

¹⁵ N'sikë we ba yaaku. Sindiku syaaku bakufilë sibweekë syaawu. We bilë sindiku siitu, kadë muutu bunë bufwenikini.