2 Za 1 - N’KANGULU WUMOONË

Sibweekë

¹ Miinu likakëtë, ke N'cyeetu wo Nzaambi kusoolë i ke baanë baandi bo yin'zolaangë mu cyelikë. Yaaku ti wo miinu vwiili yiluzolisi, vandi kasi bakë booso bëzabisi cyelikë,

² cibilë cyelikë cin'kalilë mu beeso i cim'ba mu beeso sakë yi sakë.

³ Muulë, n'leenvo i n'sikë Nzaambi Taatë i Yeesu Kliistu Mwaanë Taatë, bituveewu mu cyelikë i mu luzolo.

Cyelikë i luzolo

⁴ Miinu yabë mu liyaanji mu kumonë ti mpooko baanë baaku bën'zingilaangë mu cyelikë, bunë Taatë Nzaambi kututuminë.

⁵ Buyifanwabu, tala manë yikuloombë, a N'cyeetu : twe zolësënyaanu besuveekë yi besuveekë. Yaaku ti lutumu lumoonë yilë mu kukusonikënë, vandi lo tutambulë fanë ntonunu.

⁶ Luzolë lun'zitiminë mu kuzingilë mu tutumu tu Nzaambi. Lutumu lunë lusinu fanë ntonunu, mati lufwenikini kuzingilë mu luzolo.

⁷ Mpaapë baatu bë lupuutu batyamukë mu buloongo, baawu bëm'maangë kuvitikë ti Yeesu Kliistu wuyisilë mu n'sunyi. Mu lyalyooli mwa mu n'zabukunu mungë lupuutu, mbeeni Kliistu.

⁸ Lwe kebyaanu mu benuveekë, bwiinji luleembu kuzimbisi ndaandu yi cisalu ciitu, kasi lun'tambulë ndobwiinu yakë yooso.

⁹ Wosuku wavitu, wun'kaambu kukalilë mu ndongulu yi Kliistu, naandyoowo wusyeeli ko mu bundiku yimunë Nzaambi. Wunë wun'kalilë mu ndongulwaandi, wukeeli mu bundiku yimunë Taatë i Mwaanë.

¹⁰ Ningë muutu waluyisilë i kulutwalilë ndongulu yin'ka, kebaanu kun'tambulë i maangaanu kum'bilë.

¹¹ Kasi wunë wun'kumbilë, wum'bundënë yaandi mu mëvaangë maandi mëbi.

Tubikunu tu siitu

¹² Miinu yim'bakooso mpaapë maambu mu kulukaambë, kasi yisë n'tiisi ko kumësonikë mu n'kaandë i mu lapi. Miinu yin'tiisi mu kwiisë ke beeno i kutubënë yiinu, bwiinji liyaanji liitu liba deku-dekoo.

¹³ Baanë bë mwanaaku N'cyeetu, wunë wusoolu ke Nzaambi, bakufilë sibweekë.