2 Timotee 4 - N’KANGULU WUMOONË

¹ Miinu yikuloombë fë nduunzi Nzaambi i fë nduunzi Kliistu Yeesu, wunë wun'fundisi baatu lu moonyi i bëfwa, yikuloombë mu lizinë li lwisulu lu Kliistu i Lwaangu lwaandi:

² Loongë Libuungu li Nzaambi yimunë lusisiminu, mu luvoto luboti kaambofo lubi. Lubulë, seembë i ciinzi bitu, mu kubëloongë mu kuvungë moonyi.

³ Cibilë ntaangu yin'kwisë, baatu bëm'maangë kuwu liloonji licyelikë, kasi bën'laandë bideenzë byaawu i bëyizukë ke nkoongë sifumu banë bëbëkaambë manë baawu bën'zolaangë kuwu.

⁴ Baawu bëm'maangë kuwu cyelikë i mu kuwu bimboli.

⁵ Kasi njeeyi, ba mu lukelulu mu maambu makë mooso, vitikë simpasi, salilë mu buvavambë booso mu kutendulë Mpolu Mboti, salë cisalu cyaaku ci ciseelu ci Nzaambi.

⁶ Kasi miinu, Poolë, yabelëmë mu kuyivakulë ke Nzaambi dedë mweekë likabu. Ntaangwaami yafwaanë mu kubiikë buloongo abu.

⁷ Miinu yanwaanë n'ziingu wumboti, yamanisi waamë n'kukë mu kudumë ntiinu, yaluundë ciminu cyaami.

⁸ Buyifanwabu, n'seendwaami wulundëmë, Fumu n'fuundisi wusulëmë wukum'paanë ntaatë luvukulu munë cilumbu beenë. Yaaku tokë wo miinu, kasi yivaandi ke bakë booso bën'ciingaangë yi luzolo cilumbu cyo kun'kwisilë.

Tubikinyi twaandi

⁹ Vaangë mëngolo, lengë kwiisë kun'zakënë.

¹⁰ Demaasë wakun'dekulë, naandi wazolë miciinzë buloongo be buubu, wakwendë ku Tesaloniikë. Kelësaasë wakwendë ku Ngalati i Tiitë ku Delëmati.

¹¹ Wo Liikë wuke yaami. Yisë yimunë Malëkë, cibilë ti naandi wum'podi kun'zudi mu cisalu.

¹² Miinu yafilë Tisiikë ku Efeesë.

¹³ Ntaangu yo njeeyi wun'kwisilë, natinë ciyuungë cyo yibiikë ku Tolëwaasë kuke Kalëpoosë. Natinë yivaandi mëbuuku, yiveko manë bësonikë mu mikaandë bibulu.

¹⁴ Alekëzandëlë wun'sulumunaangë biseengo, wakum'pangisi beenë mëbi, kasi Fumu wukun'seendë mu makë mooso mo kwavaangë.

¹⁵ Njeeyi yivaaku, keelë mu naandi cibilë wumaangë yi nkasu yooso ndongulwiitu.

¹⁶ Vyaasi yin'tetë bunë miinu yin'waninë cikaangë cyaami, muutu ve wuyisë mu kun'zudi, bakë booso bëkun'dekulë. Keelë Nzaambi wulë bëkaangilë cikodudu!

¹⁷ Kasi Fumu wukun'nwaninë i wum'paanë n'viingu wukutendulë Mpolu Mboti i wukuvangisi banë bëkaambu kuta maanë mu kuwu lyaawu. Wukum'puuci mu munu n'kosi.

¹⁸ Fumu wukum'puucyooso mu maambu makë mooso mëbi i wukun'kosi ku Lwaangu lwaandi lu yilu yi buvinyi. Bumpumu booso bwe ba kuke naandi ntaangu syooso! Ameenë.

Sibweekë si siitu

¹⁹ Bilë Pilisiilë i Akilaasë yimunë likaandë li Onesifoolë.

²⁰ Elaastë wusyaalë ku Koleentë i miinu yibiikë Tolëfiimë ku Milee, cibilë wabë kubeelë.

²¹ Vaangë mëngolo wiisë ntetë cisifu kutuukë. Ebuuliisë, Pudeensë, Liniisë, Kolodya i banë bë nguli booso bën'ka bakubilë.

²² Biikë Fumu we ba yaaku. Muulë wu Nzaambi we bayiinu.