2 Timotee 3 - N’KANGULU WUMOONË

Bilumbu bi siitu

¹ Tebukë moonyi buboti mu maambu ama, mu bilumbu bi siitu, yim'ba bilumbu bi simpasi.

² Licyelikë, baatu bëm'ba yi bwiimi, nyeenzë-mboongo, lukwaayi i lunaangu. Baawu bën'fiingë Nzaambi i bëm'maangë kucinzikë mëtaatë maawu, baawu bisë n'zaabë ko simboti si bayaawu i bisë n'cinzikë ko byo bi saantu.

³ Baawu bëm'ba mitimë ngolo, bëkaambu cyaali, bën'suungë baatu, bëm'ba bubaalu, bilyaani i simbeeni mu maambu mëboti.

⁴ Baawu bën'sumbisi bayaawu, bën'vaangë mpaapë maambu mëbi, bën'waalë lunaangu, baawu bën'zolë miciinzë kuvyokililë Nzaambi.

⁵ Baawu bën'leesi ti bëke ciminu mu Nzaambi, kasi baawu bëm'maangë luleendo. Yakënë yi baatu be mpilë oyo!

⁶ Bën'viipë mu baawu bën'kotaangë mu sinzo i bëm'puutaangë bëcyeetu bëke ciluunzi cileengë, bëwaalë mësumu, bën'vukumunaangë mu yosuku miciinzë.

⁷ Baawu bën'toombaangë kuzaabë, kasi kubakulë ve cyelikë.

⁸ Bo bumweekë Zaneesë i Zambeesë banë bëmaangë kuwulu Moyiizë, bo bumweekë baatu aba bëlë mu kumaangë kwaakë cyelikë. Baawu baatu bëke ciluunzi cidyemukë, mu baawu ciminu cisë n'ciinzë ko.

⁹ Kasi baawu kusë bën'kwendë mpaapë cinaanu ko, cibilë bakë booso bëm'monë bulawu bwaawu, dedë mweekë bunë bubeelë mu Zaneesë i Zambeesë.

Mëkumini më siitu

¹⁰ Kasi njeeyi wakun'kuwulu mu liloonji lyaami, ndyatulwaami, simbalulu syaami, ciminu cyaami, mpuungë monyaami, luzolo lwaami, lufyaatu lwaami,

¹¹ mësengulu maami i simpasi syaami. Njeeyi wuzabisi makë mooso manë më kun'yisilë, ku livulë li Antyoosë, li Ikoonyoomë, li Lisetëlë i mpilë mbi mësengulu yitambulë. Kasi Fumu wukum'puuci mu maambu makë mooso.

¹² Cyelikë baatu bën'toombë kunatë luziingu luboti mu Nzaambi mu N'kangulu yimunë Kliistu Yeesu bën'tambulë binkuungë.

¹³ Kasi baatu bë bubaalu i bitatë-ngaangu bën'lutilë kuvaangë libi, baawu bëm'puutë bayaawu i baawu bëm'puutu.

¹⁴ Mu njeeyi, ba yi lufyaatu mu manë wusinu i manë wutambulë mu n'timaaku wooso. Njeeyi wuzabisi ke bëkuluutu mbici wusinunu maawu.

¹⁵ Kutatikilë mu bubwabwanë bwaaku, licyelikë, njeeyi wuzabisi Bisonë Bi saantu, byaawu bim'podi kuvaanë mëlyeelë mënatë muutu mu kubakë luvukulu mu ciminu mu Kliistu Yeesu.

¹⁶ Bisonë byooso bisonëmë mu Libuuku li Nzaambi, bifuminë ke Nzaambi. Byaawu bike njiinji mu kuloongë bucyelikë, bivengulë lupuutu, bin'sulikilë maambu mëtolëkënë i bin'vaanë mëlubu mësulëmë,

¹⁷ bwiinji, muutu wu Nzaambi wuba deku-dekoo mu mëvaangë mëboti, yi mëkanë mooso mu kuvaangë lyaambu lyooso liboti.