2 Timotee 2 - N’KANGULU WUMOONË

Lisodaadi lisulëmë li Kliistu Yeesu

¹ Njeeyi mwanaami, we ciindë mu muulë wunë wuke mu Kliistu Yeesu.

² Manë njeeyi wakuwu mu mo yatendulë fë meeso më mpaapë simbaanji, tambikë maawu ke baatu bësulëmë, banë bum'bakë baveekë mëkanë mu kube loongooso bën'ka.

³ Boongë cyaaku cikuuku ci simpasi, dedë mweekë lisodaadi lisulëmë li Kliistu Yeesu.

⁴ Lisodaadi linë lin'salaangë cisalu cyaandi, kupodi ve kutuulë cibiindu mu maambu më luziingu lu kadë cilumbu, ningë ti wun'toombë kutoonzi n'kulutwaandi.

⁵ Bo bumweekë yivaandi, muutu wun'dumë ntiinu kupodi ve kubakë ndobu ningë ti naandi wusye cinzikë ko mikaakë.

⁶ Civatë solë yivaandi wun'salë cisalu cingolo wufwenikini kuba muutu wun'tetë mu kubakë cikuuku cim'butë.

⁷ Balë buboti manë miinu yatubë. Mu boobo, Fumu wukuvaanë mëkanë mu kubakulë makë mooso.

⁸ Tebukë moonyi mu Kliistu Yeesu wunë wubutu mu likaandë li Daviidë i wo wuvulumukë mu bo bëfwa bunë bëlongilë Mpolu Mboti yinë miinu yilë mu kutendulë.

⁹ Mati mu cibilë ci Mpolu Mboti, bwa miinu yilë mu kumweenë simpasi i yikangëmë mu mpaangë dedë mweekë cilyaani. Kasi Libuungu li Nzaambi likeeli ko likangëmë!

¹⁰ Mati mu bwaawu, yilë mu kuvitikë makë mooso mu liboti li banë Nzaambi kusoolë, bwiinji baawu n'vu awu bëbakë luvukulu lun'fuminë ke Kliistu Yeesu i bën'tambulë bumpumu bu sakë yi sakë.

¹¹ Mëbuungu ama mëcyelikë : « Ningë beeso tube fwa yaandi, beeso tun'ziingë yi vandi yimunë naandi.

¹² Ningë tube fyaatë, beeso tum'byalilë yimunë naandi. Ningë beeso tube m'bumë, naandi yivaandi wutubumë.

¹³ Ningë beeso tukeeli tusulëmë ko, naandi wun'kalilë wusulëmë, kasi naandi kupodi ve kuyifindënë mpakë naveekë. »

Ciseelu cifwanëkënë

¹⁴ Tebulë lyaawu moonyi ke bakë booso i bëkaambi yi nkasu fë ntwaalë Nzaambi bëleembu kwambilë mu cibilë ci bikumë. Twambulu be tooto tukeeli nkaali ko, mu kumaangë kuzimbisi bakë booso bën'kuwu.

¹⁵ Vaangë mëngolo mu kuba mbaanji yi mboti fë ntwaalë Nzaambi, dedë mweekë cisasi cin'salë cisalu ciboti, mu kutendulë bunë bufwenikini libuungu licyelikë.

¹⁶ Yakënë mu bimboli bikaambu nteendu i bivyakënë yi ciminu, kasi banë bëyivaanë mu byaawu, bën'kwakënë cinaanu yi Nzaambi.

¹⁷ Ndoongulwaawu yike dedë mweekë mbeenzë yibolë yasikë misunyi. Mu n'taandë mu bo bëlë mu kuvaangë mamoomo mu ke Yimenë i Fileetë:

¹⁸ baawu bakwakënë yi cyelikë i baawu bëm'bwiisi ciminu ci mpaampë baatu mu kutubë ti luvulumuku luvangënë ntamë.

¹⁹ Kosuku lubaandu lu sintungulu sinë Nzaambi kutuulë luciindë tala mëbuungu mësonëmë mwaawu : « Fumu wuzabisi baandi » i « Wosuku wun'tubë ti naandi wuke yi Fumu wufwenikini kwakënë yi libi. »

²⁰ Mu n'zo nenë, mu keeli tokë mëtizyeelë mëvangëninë mu woolë i palaatë ko, mëke yivaandi manë mëvangëninë mu n'ti i mu civaandu. Mëtizyeelë më woolë i palaatë bëmën'salilaangë mu bilumbu bi n'saangu, kasi mëtizyeelë më n'ti i më civaandu mu bilumbu kwaandi vwiili.

²¹ Ningë muutu be yilyomisi mu makë mooso mëbi manë yisonikë, wum'ba n'ciinzë mu kusalë bisalu bifwenikini, naandi wuyivandikë nawooso ke Fumu i wubelëminë mu kuvaangë makë mooso mëboti.

²² Tiinë miciinzë yooso yi bubwabwanë, salilë maambu mësulëmë, ba yi ciminu, luzolo, n'sikë, yimunë banë bëke n'timë wulyoomë, bën'sambilë Fumu.

²³ Kasi leembu bimboli bikaambu nteendu, yi sisonyi, njeeyi wuzabisi ti maawu mënataangë twambulu.

²⁴ Kosuku, ciseelu ci Fumu sye fwanëkënë ko mu kwambilë. Naandi wufwenikini kuzolu ke bakë booso, kuba likanë mu kuloongë i kucikunë bifiingu,

²⁵ wufwenikini kuloongë mu mëleembë mooso banë bëke simbalulu sivyakënë. Nzaambi wum'podi kubëvaanë luvoto mu kubalulë simbalulu syaawu i kuzaabë cyelikë.

²⁶ Baawu bën'vutukilë biluunzi byaawu biboti i bën'kwakënë mu mitaambu dyaabu, yinë bëkangëminë i kun'salilë.