2 Timotee 1 - N’KANGULU WUMOONË

Sibweekë

¹ Poolë, m'bunzi wu Kliistu Yeesu mu n'vwiilu Nzaambi, wufilu mu kutendulë lukanyu lu luziingu luke mu Kliistu Yeesu.

² Timotee mwanaami wu n'timë, njeeyi yin'sonikinë. Muulë, n'leenvu i n'sikë Taatë Nzaambi i Fumwiitu Yeesu Kliistu bikuveewu.

Mputululu mëtoondo i kuciindë mu n'sulumunu

³ Miinu yin'toondë Nzaambi, wunë yike mu kusalilë yi simbalulu silyoomë dedë mweekë sinkaakë syaami bëvangilë. Miinu yilë mu kun'toondë bunë ntaangu syooso, bwiilu ku bwiilu muni ku muni, njeeyi yimbalaangë mu tusaambu twaami.

⁴ Miinu yatebukë moonyi mu mësweelë maaku i yin'vwa n'ciinzë beenë mu kube kumonë bwiinji yiba mu liyaanji.

⁵ Miinu yilë mu kutebukë moonyi mu ciminu ci cyelikë cyo cyaaku, ciminu cyabë ntetë mu nkakaaku yi n'cyeetu Loyiisë i mamaaku Eniisë, bunimbalë cike mu njeeyi.

⁶ Mati bwaawu, yilë mu kukutebulë moonyi, salilë mu luziingu lwaaku likabu linë Nzaambi wukuvandikë fanë yikutendikë myooko.

⁷ Cibilë Ciluunzi cyo Nzaambi wutuvandikë cisë tuvaanë budeci ko tilyooko, Ciluunzi be cyoocyo, Ciluunzi ci n'viingu, ci luzolo i ci kukebë nyitu.

⁸ Keelë wulë ba yi sonyi mu kuta cimbaanji mu Fumwiitu i mu miinu yike mu peleeso mu cibilë cyaandi. Tiilyoko, cikunë kumonë simpasi yimunë miinu, mu cibilë ci Mpolu Mboti, mu mëngolo mo Nzaambi wun'vanaangë.

⁹ Mati naandi na wutuvuuci i wututelë mbilë busaantu yaaku ti mu cibilë ci mëvaangë miitu mëboti, kasi mu cibilë cin'vwiilwaandi i muulaandi. Naandi wutuvandikë muulë mu Kliistu Yeesu, faanë yi faanë ntetë buloongo kuvangënë,

¹⁰ kasi naandi watuleesi muulë beenë buyifanwabu mu lumonukunu lu N'vuuciitu Kliistu Yeesu. Mati naandi wavangisi kusiitë lutumu lu lufwa i wunë, mu Mpolu Mboti watuvaanë luziingu lum'monikë lukaambu mëmanunu.

¹¹ Nzaambi wum'kumpanë cisalu ci kutendulë Mpolu Mboti dedë mweekë m'bunzi i n'loonji

¹² i mu lyalyooli yilë mu kumonë simpasi asi. Kasi yikeeli yi boomë ko, cibilë yizabisi mu nani ke lufyaatu lwaami i yizabisi ti naandi ke yi n'viingu mu kuluundë tee mu cilumbu ci Lufundusu manë naandi kum'paanë.

¹³ Laandë mëbuungu mëcyelikë mo yikukaambë, ciindë mu ciminu i mu luzolo lunë tukeeli mu bundiku yimunë Kliistu Yeesu.

¹⁴ Sweekë mëlubu mëboti mo bëkuvaanë, yimunë mëkanë mu Ciluunzi ci Saantu cyo cike mu beeso.

¹⁵ Bo njeeyi wulizabisi, baatu booso bë libweeti li Aziiya bëkun'tiinë, mu ntaandaawu mwabë Fizeelë i Elëmozeenë.

¹⁶ Biikë Fumu wuvaangë simboti mu likaandë li Onesifoolë, cibilë naandi wulë kun'ciinzyaangë bitu. Naandi sye monë sonyi ko mu miinu yike mu peleeso.

¹⁷ Tiilyoko, mu ntukulwaandi ku livulë li Loomë, naandi mëlengë-lengë wusë kun'toombë i fanë naandi wukum'mweenë.

¹⁸ Biikë Fumu wun'vaanë mëboti më Nzaambi mu cilumbu ci Lufundusu. Njeeyi wuzabisi yivaandi makë mooso mëboti manë naandi wukum'pangilë ku livulë li Efeesë.