2 Tesaloniikë 3 - N’KANGULU WUMOONË

Sambililaanu mu beeso

¹ Oboobo, a baanë bë nguli, sambililaanu mu beeso, bwiinji libuungu li Fumu lilengë nyambë i bëlizanjikë fosuku faamë, bunë lyaawu livangininë fë meeyiinu.

² Sambilaanu yivaandi Nzaambi kutuvuuci mu myooko baatu bëbi i bangë bubaalu. Cibilë yaaku ti bakë booso kuve bën'vitikaangë mu kuta maanë.

³ Kasi Fumu wusulëmë. Naandi wuluciinzi i wulukebë fëke M'bi.

⁴ Fumu wutusiilë civuufu mu cibilë ciinu: beeso twasiinji ti beeno lun'salilaangë i lulë mu kulandilë kusalilë manë beeso tulukaambë.

⁵ Biikë Fumu wuzibulë mitimiinu mu luzolo mu Nzaambi i mu mpungë-moonyi yin'vaanë Kliistu.

N'ciinzë wukusalilë

⁶ Baanë bë nguli, beeso tulë mu kululoombë mu lizinë li Fumu Yeesu Kliistu : yakënaanu yi baanë bë nguli bën'zingilë mu boolu i bëm'maangë nsinunu yinë beeso tu bëzabikini.

⁷ Benuveekë luzabisi buboti buni beeno lufwenikini kulandilë cifwaani ciitu. Cibilë ti tusye zingilë ko mu boolu kuke beeno.

⁸ Beeso tusye loombë ke wosuku muutu ko mu kutulikilë buunë. Tiilyoko, tuvitikë simpasi i mpokoongo, beeso tusalë bwiilu ku bwiilu muunyi ku muunyi, mu kumaangë kuvaanë n'funë ke wosuku muutu mu beeno.

⁹ Beeso tusë vaangë lyaawu, yaaku ti bo beeso tusë kaambu n'swa mu kutambulë luzudi lwiinu, vandi kasi beeso twatoombë kululeesi cifwaani mu ndyatulu yinë lufwenikini kulandilë.

¹⁰ Licyelikë, bunë twabë ke beeno, beeso tululubulë : « Wunë wum'maangë kusalë, wusye fwanëkënë ko yivaandi kulya. »

¹¹ Kosuku beeso tulë mu kuwu ti mu kati kwiinu ke baatu bëlë mu kuzingilë mu boolu, kusalë ve, baawu ke laandaangë tokë maambu më baatu bën'ka.

¹² Mu baatu be boobo, beeso tun'loombë, tun'kwindulë lyaliili mu lizinë li Fumu Yeesu Kliistu : bësalë ntaangu syakë syooso bwiinji bëbakë mu baveekë ndiiwu yi kulya.

¹³ Mu beeno baanë bë nguli, luvolyaanu bitu ko mu kuvaangë maambu mëboti.

¹⁴ Ningë ti wun'viipë wusë n'lenvukë ko mu maambu mo beeso tulusonikinë mu n'kaandë awu, siimbaanu lyaawu i leembwaanu kubundënë yimunë naandi, bwiinji kufwa sonyi.

¹⁵ Kasi, lun'citulaanu mbeeniinu ko, n'kuminyaanu dedë mweekë mwaniinu nguli.

Lusakumunu i sibweekë

¹⁶ Biikë Fumu, cizibë ci n'sikë, naveekë we luvaanë n'sikë mu ntaangu syakë syooso i mu yosuku mpilë. Fumu kwe bayiinu beeno booso.

¹⁷ Mati mu kooko kwaami miveekë yilë mu kusonikë bikumë abi : Sibweekë si Poolë. Tala buni yin'sitikilaangë mikaandaami yakë yooso. Boobo bwaawu yin'sonikinaangë.

¹⁸ Biikë muulë wu Fumwiitu Yeesu Kliistu we bayiinu benubooso.