2 Tesaloniikë 2 - N’KANGULU WUMOONË

Lutunzukunu lu siitu

¹ Mu linë lin'talë lwisulu lu Fumwiitu Yeesu Kliistu i lubundunu lwiitu kuke naandi, baanë bë nguli, beeso tulë mu kululoombë lin'viipë :

² keelaanu kuvangisi ciluunzi ciinu kulengë ba yekësë-yekësë, keti mu boomë ningë muutu bëluzabikini ti cilumbu ci Fumu cyatuukë. Luvitikaanu ko, keti bëlëtubë ti lyaawu lifuminë mu ciluunzi, mu libuungu, keti mu lubiku, kaambofo n'kaandë wun'tubë ti waawu wufuminë ke beeso.

³ Keelaanu lu lupuutu ke wosuku muutu, mu yosuku mpilë. Cibilë cilumbu be cyoocyo cisë n'lengë kwiisë ko, ntetë cincindu ci siitu i fë m'monikënë mungë bubaalu, wunë bëtiisi mu lunyambukunu.

⁴ Naandi wum'maangë byakë byooso binë baatu bën'kuundaangë i bëm'balaangë buke Nzaambi. Mungë bubaalu wum'maangë byakë byooso i wuke kali mu n'zo-Nzaambi i wuyituunvi naveekë Nzaambi.

⁵ Beeno lusë n'tebukë moonyi kwe ti yilukaambilë lyaawu bunë yabë yiinwe?

⁶ Kosuku beeno luzabisi buboti ti cin'viipë cilë mu kusiimbë Mungë bubaalu buyifanwabu, bwiinji kumonikë tokë mu ntaangu yo bëzitikë.

⁷ Luleendo luswaamë lu Mungë bubaalu lweekë mu kusalë, lwaawu tokë mba lumonikë lwakë looso, mooti wunë wulë mu kulusiimbë wukum'bikilë luvwa.

⁸ Boobo, Mungë bubaalu wum'monikë i Fumu Yeesu wukun'voondë mu muufu munwaandi, naandi wukun'lalikini mu bumpumu bu lwisulu lwaandi.

⁹ Mungë bubaalu wun'kwisilë mu luleendo lu Satënë, wuvaangë mpaapë bimakë bi mpilë yi mpilë yaandi i bimaaku bi lupuutu.

¹⁰ Naandi wuvaangë libi mu sinteku syakë syooso mu kudedulë banë bën'kwendë mu lunyambukunu. Baawu bën'nyambëkënë cibilë bisë n'tambulë kuve i bësye zolë ko cyelikë cifitë kubëvuuci.

¹¹ Mu lyalyooli, Nzaambi wafilë ke baawu luleendo lu kuvitu bwiinji bëvitikë maambu më lupuutu.

¹² Mu boobo, bakë booso bën'kaambu kuta maanë mu cyelikë, kasi bëm'ba mu nyeenzi mu kusalilë libi, bëm'bakë lusifu.

Beeno lusoolu mu kuvuukë

¹³ A baanë bë nguli, beeso tusë n'leembu kutoondë Nzaambi ko mu cibilë ciinu, beeno bo Fumu kuzolisi. Cibilë Nzaambi walusoolë cin'tetë, bwiinji beeno luvuukë mu mëkanë më Ciluunzi ci Saantu, cinë ciluvangisi kukalilë mu luziingu lu saantu i mu mëkanë më ciminu ciinu mu bucyelikë.

¹⁴ Mu lyalyooli, Nzaambi wulutelilë mu Mpolu Mboti yinë beeso tulutendulilë. Naandi wutiisi ti beeno lubakë cikuuku mu bumpumu bu Fumwiitu Yeesu Kliistu.

¹⁵ Oboobo, baanë bë nguli, lwe kangiminaanu i simbililaanu sinsinunu syo beeso tuluvaanë mu ntubulu kaambofo mu n'kaandiitu.

¹⁶ Biikë Fumu Yeesu Kliistu naveekë i Nzaambi Tatiitu, wunë wutuzolisi i wutuvaanë mu muulaandi mëngolo më sakë yi sakë i civuufu ciboti,

¹⁷ kuwaasi mitimiinu mu bunkanvi i wulëfulë n'viingu mu kusalilë kadë ntaangu liboti, mu mëvaangë i mu mëbuungu.