2 Tesaloniikë 1 - N’KANGULU WUMOONË

Sibweekë

¹ Poolë yimunë Silaasë i Timotee. Ke Cingangë ci Tesaloniikë, ci Nzaambi Tatiitu i Fumu Yeesu Kliistu :

² Nzaambi Tatiitu i Fumu Yeesu Kliistu bëluvaanë muulë i n'sikë.

Lufundusu mu cilumbu ci lwisulu lu Kliistu

³ A baanë bë nguli, beeso tufwenikini ntaangu syooso kutoondë Nzaambi mu cibilë ciinu. Bwaawu n'ciinzë beenë mu beeso mu kulivaangë, cibilë ciminu ciinu i luzolo luke yiinu benuveekë yi benuveekë lulë mu kubweelë kukulë.

⁴ Mati mu bwaawu, beeso tulë mu ku lunyemi mu Bingangë bi Nzaambi, cibilë beeno lube kalilë mu ciminu, bosuku bubeeli simpekaadu i simpasi syooso sinë beeno lulë mu kumonë.

⁵ Foofo fëkeeli ciliimbu cin'leesi lufundusu lusulëmë lu Nzaambi, cibilë simpasi sinë beeno lun'cikunë siluvangisi kukotë ku Lwaangu be loolo lukeeli mu mpasi.

⁶ Licyelikë, Nzaambi wusulëmë: naandi wun'vutulë simpasi ke banë bëluvaangë simpasi,

⁷ i naandi wuluvaanë n'sikë ke beeno lulë mu kumonë simpasi i ke beeso. Lyaawu lin'vangëninë fanë Fumu Yeesu kum'monikinë ku yilu yimunë siyaanzi syaandi si luleendo.

⁸ Naandi wun'kwisilë mu mbaasu yinenë mu kuvaanë kastikë ke banë bëm'maangë kuzaabë Nzaambi i ke banë bën'kaambu kuvitikë Mpolu Mboti yi Fumwiitu Yeesu.

⁹ Kastikë bën'tambulë baawu lunyambukunu lu sakë yi sakë, cinaanu yi Fumu i luleendo bumpumu bwaandi,

¹⁰ bunë naandi wun'kwisë cilumbu be ciina, mu kuba kun'zanjikë i kun'dumisi ke baatu bakë booso kubakisi i bën'ta maanë mu naandi. Beeno lum'ba benuveekë mu lutaangu, cibilë ti beeno lwata maanë mu saangu yinë beeso tuyilutendulilë.

¹¹ Mati bwaawu, beeso tulë mu kusambilë ntaangu syakë syooso mu beeno. Beeso tun'loombë kuke Nzaambiitu wuluvaanë luziingu lufwenikini lunë kulutelilë. Beeso tulë mu kuloombë mu luleendo lwaandi, wuluzudi mu bideenzë biinu mu kuvaangë mëboti i bwiinji lufyaatu lwiinu luciindë.

¹² Oboobo, lizinë li Fumwiitu Yeesu lin'zanjiku mu beeno i beeno lun'zanjiku ke naandi. Bwaawu bum'beelë muulë wu Nzaambiitu i wu Fumu Yeesu Kliistu.