2 Pyeelë 3 - N’KANGULU WUMOONË

Lukanyu lu nyisulu Fumu

¹ A bayaami, yi mwe lusonikinë vyaasi n'kaandë be wuuwu wumwaali. Mu wumweekë i mu wumesi yilë mu kulukwandulë toonzu mu mëlyeelë mu kulutebulë moonyi mu ciluunzi ciinu.

² Miinu yike yi tesu mo lutebukaanu moonyi mu tubiku tutubë mibici yi saantu mu ntaangu ntamë i lutumu lu Fumu i N'vuuci, bituveewu ke mimbunziinu.

³ Lwe zaabyaanu cin'tetë ti, mu bilumbu bi n'siitu, mu m'monikë baatu bën'zingilë mu bideenzë byaawu. Baawu bëludyeengë

⁴ i bën'tubë : « Naandi kwe wukanyi mu kwiisë? Vandi, kuni kukeelye? Mëtaatë miitu bëfwa ntamë, kasi maambu makë mooso makalilë tokë bo bumweekë kutatikilë fanë ntonunu buloongo! »

⁵ Baawu bazimbëkënë ali: m'pooku mitoonë yivyookë, Nzaambi wuvaangë li yilu i n'toto mu libuungu lyaandi. N'toto wabë wukabukë mu masi i wuvangëninë mu masi,

⁶ mati mu masi yivaandi buloongo bu ntamë busiindë i bubungënë.

⁷ Mu lyaambu lin'talë li yilu i n'toto wu bubwayi, libuungu lyo limweekë li Nzaambi libiluundë mu mbaasu yinë yibityamunë. Bo bumweekë bën'luundë banë bën'vaangë mëbi tee mu cilumbu ci Lufundusu i mu lunyambëkunu lu bisumuci.

⁸ Kasi a bayaami, zaabaanu ti lyaambu limweekë lufwenikini kuzimbëkënë ko: mati, mu Fumu, cilumbu cimweekë cikeeli buke civeefi ci n'vu i civeefi ci n'vu buke cilumbu cimweekë.

⁹ Fumu wusë n'vingaangë ko mu kudedikini lukanyu lwaandi, bunë bëm'balilaangë bëmesë. Kasi naandi ke yi mpungë-moonyi mu baawu, cibilë naandi wusye zolë ko wosuku muutu kunyambëkënë. Tiilyoko, naandi wuzolisi ti bakë booso bëbakë luvoto lu kuvilukë mu mëbi maawu.

¹⁰ Oboobo, cilumbu ci Fumu cin'kwisilë buke mwiifi. Mu cilumbu be cyoocyo, li yilu lin'zimbilë yimunë cidumu cinenë, mbaasu yin'sulumunë bicyenisi byooso bi yilu, n'toto yi byakë byooso bike mwaawu bin'lakëtë.

¹¹ Cibilë ti byakë byooso bin'lakëtë, bakulaanu buboti linë beeno lufwenikini kuvaangë! Bufwenikini nyendulwiinu kuba yi busaantu i lufyaatu mu Nzaambi.

¹² Beeno lufwenikini kuviingë cilumbu ci Nzaambi mu kuvaangë mëngolo miinu mooso bwiinji mëlookë wiisë. Wum'ba cilumbu cyo li yilu lin'tyamukë mu mbaasu i bicyenisi bi yilu bin'sutë mu libabëlë li mbaasu.

¹³ Kasi Nzaambi wakanyi li yilu limoonë i n'toto wumoonë fanë lusulumunu lun'kalilë i lyalyooli lyaawu tulë mu kuviingë.

¹⁴ Mu lyaawu, beeno bayaami, lulë mu kucingaangë cilumbu be cyooci, lwe vaanjyaanu mëngolo mu kuba bëlyoomë i kumaangë kuseembu fë meeso më Nzaambi i kukalilë mu n'sikë yimunë naandi.

¹⁵ Zaabaanu ti mpungë-moonyi yi Fumwiitu yiluvaanë luvoto lu kuvukilë, mu lyalyooli mwaniitu nguli Poolë kulusonikinë yi bungelë booso bo Nzaambi kun'vaanë.

¹⁶ Maawu kusonikë mu mikaandë yakë yooso yinë kutubilë mu maambu omo. Mwaawu mu ke maambu mëtudë mu kuzikulë kuwu. Baatu bëke mu buzimbu i bëkaambu kusikëmë ke tolëkinyaangë suundu, bo baawu bën'vangilaangë mu mikukë yin'ka yi Libuungu li Nzaambi. Baawu bëyivangisi baveekë kunyambëkënë.

¹⁷ Mu beeno, bayaami, buyifanwabu bëlubikinyi. Keelaanu kubwa mu lisoko li baatu bo bavitu i bëkaambu sonyi i lubiindwaanu ko bunaangë bu ciikë ciinu.

¹⁸ Kalilaanu mu lutatumunu lu muulë i luzaabu lu Fumwiitu i N'vuuci Yeesu Kliistu. Bumpumu bwe bayaandi buyifanwabu tee sakë yi sakë! Ameenë.