2 Pyeelë 2 - N’KANGULU WUMOONË

Miloonji yi lupuutu

¹ Ntaangu sinaani, mibici yi lupuutu yisë kumonikë mu mboongu Islayeelë, mpilë mweekë yivaandi miloonji yi lupuutu bëm'monikë ke beeno. Baawu bën'kosi mëloonji mëbi i mën'vangisi baatu kunyambëkënë i bën'nyakunë Fumu wo wabëvuuci. Baawu bën'vangisi lusifu kulengë kwiisë.

² Mpaapë be bëlaandë mu luziingu lwaawu lu busafu i mu cibilë cyaawu, bën'safulë nzilë yi cyelikë.

³ Mu luzolo lu lubaku, miloonji be yooyo yi lupuutu, mba bëlutafë mu sinsinunu syaawu si lupuutu. Kasi faanë yi faanë, lufundusu lwaawu lwabelëmë i lunyambëkunu lun'lengë bwa mu baawu!

⁴ Ningë licyelikë, Nzaambi wusye vengulë ko siyaanzi sisumukë, kasi naandi wubëlakë ku buluunji bu mbaasu kunë baawu bëkangëminë mu simpaangë ku cintoombi mu cilumbu ci Lufundusu.

⁵ Naandi sye vengulë ko buloongo bu ntamë, kasi wuvangisi kusiinzi baatu bë buloongo be boobo mu nkukë-masi. Naandi wuvuuci tokë Nowee, wulëtendulaangë maambu mësulëmë, yimunë saambwali lin'ka li baatu.

⁶ Nzaambi wusë fundisi mëvulë më Sodoomë i Ngomoolë i naandi wumëtyamunë mu mbaasu, mu kuleesi ofo cimbaanji cifitë kwisilë mu bisumuci byooso.

⁷ Kasi, wuvuuci Lootë, muutu wusulëmë, wunë wabë mu linyoonji mu banë babë yaandi mu ntaangu yinë bëlëvangilaangë busafu.

⁸ Cibilë civaangë mëboti, wulëzingilaangë mu nkoongaawu, wulëmonaangë i kuwaangë makë mooso manë baawu bëlëvaangaangë kadë cilumbu. Luziingu lwaawu lu busafu lulën'vangisyaangë n'timë kubaabë.

⁹ Mu lyaawu, Fumu wuzabisi buni bukobulilë mu simpasi banë bëfyaatë mu naandi i buni kun'siilë mu kuluundë banë bën'vaangë libi mu kubëvaanë kastikë cilumbu ci Lufundusu,

¹⁰ yiveko, banë bën'laandë bideenzë byaawu bibi, mu syaawu mweeno i bën'kwengulë lutumu lu Nzaambi. Miloonji beenë yi lupuutu, bëke yi lunaangu i lukwaayi, baawu luciinzu ve mu bivaanji bi mpumu bike ku yilu, kasi baawu bëbëfiingaangë.

¹¹ N'lembuko siyaanzi, sivyokisi mëngolo i luleendo, baawu bë kusë n'fiingaangë ko bivaanji bi mpumu fë meeso më Fumu.

¹² Kasi baatu be boobo bën'silaangë dedë mweekë baatu bëkaambu buutu bo buke bibulu bi n'situ bibutu mu kubwiilu i kuvoondu. Kasi baatu aba bëlë mu kufiingë binë baawu bëkaambusu kuzaabë. Baawu bën'voondu buke bibulu.

¹³ Baawu bën'tambulë n'vutu mu mëbi maawu mo bën'salilë. Baawu bëzolisi kuvaangë busafu fë ciyalëlë. Lumonukunu lwaawu, lun'vaangë sonyi i bulalawu bunë baawu bën'takësënë mu misaangwiinu yi kulya, nyeenzi bëm'monë mu lupuutu lwaawu.

¹⁴ Meeso maawu mëwaalë cideenzë ci kuvaalë. Baawu bisë n'kukutu ko mu kuvaangë lisumu. Baawu ke butikaangë mu mitaambwaawu banë bëke ciminu cicyeeci. Mitimaawu yi waalë nzalë lubaku. Lusifu lu Nzaambi luke yaawu!

¹⁵ Abu babotukë mu nzilë yisulëmë, baawu bëzimbilë i bëlaandë nzilë mweekë yi Balaamë, mwaanë Bosoolë. Naandyaawu wusë zolë luboongo lunë bëlun'vanaangë mu kuvaangë mëbi.

¹⁶ Kasi naandi wutambulë mëseembu më bumaangu bwaandi. Mu lyaawu, mwaanë buulu wukaambu mbali wusë bulë mbeembu, dedë mweekë muutu lu moonyi i wusë siisi mpangulu m'bi yi m'bici.

¹⁷ Baatu be boobo bëke buke sinto-masi siyuumë i buke mëvweeti mën'vekumukë mu mpeemo-ngudi. Nzaambi wubëlundilë ciikë ku citoombi cike pipitii.

¹⁸ Baawu bën'tubilë mu lunaangu i mu mëbuungu mëkaambu nteendu, bën'salilë mu bideenzë byaawu bibi bivyokili sonyi, mu kubutikë mu n'taambu banë bakobukë buyifanwabu mu nkoongë bivadë-mbi.

¹⁹ Baawu bëbëvaanë lukanyu mu lusyalulu, kosuku baveekë bëndongo mu bifu byaawu bibi, cibilë kadë muutu n'doongo mu manë man'vwaatë.

²⁰ Baatu bën'ka mu nkoongaawu, bakobukë mu mëvaangë mëbi më buloongo mu cibilë ci luzaabu lu Fumwiitu i N'vuuci Yeesu Kliistu. Kasi ningë baawu bëbe yilekulooso mu kube vutukilë sinsalulu be syooso, baawu bëm'ba mu simpasi kuvyokilë sinë syabë ntetë.

²¹ Mëyoolë baawu bëleembu kuzaabë nzilë yisulëmë yi kuyizaabë i kube balukilooso lutumu lu saantu lunë bëbëvaanë.

²² Lisë bëyisilooso linë cinganë cin'tubë : « Mbwa wake belya byo kwalukë », kaambofo : « Ngulu, yikun'kobilyaangë abu, wabë votëkënooso mu ngabu. »