2 Pyeelë 1 - N’KANGULU WUMOONË

Sibweekë

¹ Miinu Simu Pyeelë, ciseelu i m'bunzi wu Yeesu Kliistu. Ke banë, mu cisalu ci luvukulu lu Nzaambiitu i N'vuuci Yeesu Kliistu, bëtambulë ciminu ci njiinji bo buke ciitu.

² Muulë i n'sikë biluveewu yinë lunduu, mu luzaabu lu cyelikë lu Nzaambi i lu Yeesu Fumwiitu.

M'bilë i n'solulu yi Nzaambi

³ Mu luleendo lu Nzaambi, Fumu watuvaanë byakë byooso bike n'ciinzë mu kuzingilë mu kukangëmë mu Nzaambi. Naandi watuvangisi kuzaabë wunë wututelë mu lubundunu lu cintwaali mu bumpumu bwaandi i mu cisalu cyaandi ci kwaatë-yekë.

⁴ Mati mu bwaawu naandi wutuvaanë biimë bimpaapë bike bukaalu i bi njiinji byo kutukanyi, bwiinji bunë lubitambulë, beeno lum'podi kwakënë mu bideenzë bibi bi nyambikini baatu, byo bilë mu kutumi buloongo i kukalilë yivaandi mu n'vwiilu Nzaambi.

⁵ Mu lyalyooli, vangaanu mëngolo mooso mu kubweelë mu ciminu ciinu ndyatulu yi mboti i mu ndyatulu yi mboti kubweelë nguliku luzaabu lu Nzaambi.

⁶ Mu luzaabu, bweelaanu lukelulu lu nyitu, mu lukelulu lu nyitu lutatumunu i mu lutatumunu lukangumunu mu Nzaambi.

⁷ Vandi mu lukangumunu mu Nzaambi, bweelaanu lyukunë yimunë bayiinu i mu lyukunë luzolo.

⁸ Licyelikë mooti beeno luke mpilë mpangulu oyo i ningë lube salilë bwaawu, biluvaanë n'viingu mu kuluvangisi kukulë mu luzaabu lu Fumwiitu Yeesu Kliistu.

⁹ Kasi wunë wun'kaambu byaawu, mweenwaandi yi n'kufi dedë mweekë muutu wufwa meeso. Naandi wazimbëkënë ti bën'lyomisi mu mësumu maandi më ntamë.

¹⁰ Mu bwaawu, baanë bë nguli, vaangaanooso mëngolo mu kucinzikë mbilë yo Nzaambi kulutelilë i mu n'solulu kuvaangë mu beeno, cibilë mu kusiilë katyoobo, sasabi, beeno lusë m'bwa ko mu libi.

¹¹ Mati bwaawu, beeno lum'bakilë n'swa wukukotilë ku Lwaangu lu sakë yi sakë lu Fumwiitu i N'vuuciitu Yeesu Kliistu.

¹² Mu lyalyooli, mba yilutebulaangë moonyi ntaangu syakë syooso maambu be moomë, keti lulë zaabë maawu ntamë i bunë lukangiminë mu cyelikë cyo lutambulë.

¹³ Kasi miinu yim'balë ti beeno lufwenikini kuzungululë mu manë yilë mu kulutebulë moonyi abu yicili n'ziingë.

¹⁴ Cibilë yizabisi ti, bilumbu bya ntaangu mu kubiikë nyitu be yiiyi, dedë mweekë Fumu Yeesu Kliistu wukun'lubulilë.

¹⁵ Miinu yin'vaangë ti beeno lutëbukaangë moonyi mu mamoomë, keti ku mbusë lufwa lwaami.

Banë bëmonë bumpumu bu Kliistu

¹⁶ Licyelikë, yaaku ti mu mizisi bëfwiikë mwaawu tuluzabikini lwisulu lu luleendo lu Fumwiitu Yeesu Kliistu, kasi mu meeso miitu tumonë bunenë bwaandi.

¹⁷ Cyelikë, naandi wutambulë ndumu i bumpumu bu Nzaambi Taatë i Nzaambi, bumpumu bunenë, wusë vangisi kuwu mbeembu yifuminë ku yilu yisë tubë : « Naandyaawu na Mwanaami wu mëdilë, mu naandi mwa yatuulë liyaanji lyaami lyakë lyooso. »

¹⁸ Besuveekë tuyuwu mbeembu be yooyo yifuminë ku yilu, fanë twabë yaandi ku yilu moongo wu saantu.

¹⁹ Mu lyaawu, beeso tun'fyaatë beenë mu saangu yi mibici. Beeno lun'viisi kuwu lyaawu : naandi wulë dedë mweekë mwiindë wun'lesikë ku cintoombi, tee fanë mëselukulu më ntaangu i mbotë yin'lesikaangë yimenë-ngwaali yivaanë cyeseesë mu mitimiinu.

²⁰ Ntetë ketë ntetë, zaabaanu buboti lyaliili: muutu voo wum'podi kubangulë mu naveekë lubiku lu Libuungu li Nzaambi.

²¹ Cibilë, losuku lubiku ve lum'podi kwisilë mu n'vwiilu muutu, kasi mati, mu likanë li Ciluunzi ci Saantu lyaawu baatu bëtubilë mu Nzaambi.