2 Koleentë 9 - N’KANGULU WUMOONË

Luzudi lu baanë bë nguli

¹ Bukeeli n'ciinzë ko ti miinu yilusonikënë mu lyaambu li kuzudilë bitamaanë bi Zudee.

² Licyelikë miinu yizabisi n'vwiilwiinu wumboti i yazabikini mu lunyemu ke basë Masedwaanë mu kutubë : « Baanë bë nguli bë Akaayi bëbeliminë mu kuvaanë kutoonë n'vu wo wuvyookë. » Buvavambë bwiinu bwaciinzi mpaapë baatu mu baawu.

³ Oboobo, yakulufilë baanë bë nguli bwiinji lunyemu lo tuvangilë mu beeno mu lyaambu be lyoolyo luleembu kumonikë ti lisye fwaanë ko: Miinu yin'vwa n'ciinzë ti lubeliminë, bunë yilitubilë.

⁴ Lyabwiili obo, ningë basë Masedwaanë bëbe kwiisë yaami i bësye luzakënë ko ti lubelëminë, beeso tum'bolë sonyi mu civuufu twatuulë mu beeno. Benuviinu, lum'baanu mu sonyi.

⁵ Mu lyaawu, miinu yabalë bufwenikini baanë bë nguli kutwaamë ke beeno mu kubelikilë likabu li liyaanji linë lukanyi. Oboobo, lyaawu lim'beliminë fanë yin'kwisilë i yin'leesi ti beeno lun'vaninaangë mu liyaanji i yaaku ti mu n'timë wum'bi.

⁶ Tebukaanu moonyi mu aliili: wunë wun'kunë fwaati, wun'velë fwaati. Wunë wun'kunë mpaapë, wun'velë yivaandi mpaapë.

⁷ Bufwenikini kadë muutu kuvaanë bunë kwafwikilë, linyoonji ve, kaambofo lukaciku ve. Cibilë Nzaambi wun'zolaangë wo wun'vaninaangë mu nyeenzi.

⁸ Nzaambi ke lutumu mu kuluwaasi mu yosuku mpilë mëboti, bwiinji lubakë mu ntaangu syakë syooso binë bifwenikini i bivyokilili mu kuvaangë makë mooso mëboti.

⁹ Dedë mweekë lisonëmë : « Naandi wun'vaanë mpaapë ke biyeembi, liyaanji lyaandi lin'kalilë tee yi tee. »

¹⁰ Nzaambi wun'vanaangë cikunu ke n'vasi i limpa linë li kun'likilaangë, wuluvaanë cikunu cyooso cinë beeno lun'toombë i wucivangisi kumënë, bwiinji liyaanji liinu libutë mpaapë mëkuundi.

¹¹ Naandi wuluvaanë businë bu mpaapë mu ntaangu syakë syooso, bwiinji beeno luleesi kadë ntaangu liyaanji liinu. Mu boobo mpaapë baatu bën'vutulilë Nzaambi mëtoondo mu mëkabu mo beeso mba tubëtambikë mu cibilë ciinu.

¹² Kasi cisalu cyo beeno lulë mu kuvaangë cisë m'balilë tokë bitamaanë ko, kasi cyaawu cin'vaanë yivaandi mpaapë misaambu yim'putululu mëtoondo ke Nzaambi.

¹³ Mu kumonë bukaalu bu cisalu be cyoocyo, mpaapë bën'vutulilë bumpumu ke Nzaambi mu buleenvo bu bumbaanji bu n'sulumuniinu mu Mpolu Mboti yi Kliistu. Baawu bëkun'vutulë bumpumu yivaandi mu liyaanji liinu mu lukabusunu lu mëboti miinu yimunë baawu i bakë booso bëmesë.

¹⁴ Baawu bën'sambilë mu beeno, mu kululeesi luzolo lwaawu, mu cibilë ci muulë wu kwaatë-yekë wunë Nzaambi wuluvaanë.

¹⁵ Ndumu ke Nzaambi mu likabu lyaandi likaambu mëfwanukunu!