2 Koleentë 8 - N’KANGULU WUMOONË

Kuvaanë yi liyaanji lyooso

¹ Baanë bë nguli, beeso tun'vwa n'ciinzë ti luzaabë buni muulë Nzaambi wuyimonikënë mu bingangë bi Masedwaanë.

² Bitamaanë bëmonë binkuungë mu mpaapë lunyokulu. Kasi liyaanji lyaawu lyabë liinji i baawu bisë leesi mëboti maawu mëkaambu mëzongulu, keti bulë ba biyeembi.

³ Miinu mbaanji yikeeli, baawu bavaanë bo bukelili mëkanë maawu i mo mëvyokililë i mu n'vwiilwaawu.

⁴ Baawu bisë tuloombë yimunë lusisumunu lu mpaapë muulë mu kufilë luzudi ke bitamaanë bi Zudee.

⁵ Baawu bëvaangë kusombukë bo tulëbalilaangë. Bëyivandikë ntetë baveekë mu Fumu i mu n'vwiilu Nzaambi, yivaandi mu beeso.

⁶ Mu lyaawu, beeso tusë loombë Tiitë mu kunatë buboti cisalu be cyooci ku siitu, bunë naandi kucitoninë.

⁷ Beeno luke yi businë mu makë mooso: ciminu, likabu li libuungu, luzaabu, buvavambë bukaambu situkulu i luzolë lunë twaleesi mu beeno. Vandi kasi, beeso tuzolisi ti luleesi yivaandi businë bwiinu mu cisalu aci mu liyaanji.

⁸ Yaaku ti lutumu yiluvaanë: kasi mu lukaambu lu buvavambë lu bëmesë: miinu yaluvaanë luvoto mu kululeesi cyelikë ci luzolo lwiinu.

⁹ Cibilë, beeno luzabisi muulë wu Fumwiitu Yeesu Kliistu : wunë wabë cisinë i wusë kuba ciyeembi mu cibilë ciinu, bwiinji luba bisinë mu buyeembi bwaandi.

¹⁰ Mu bwaawu, yakuluvaanë yaamë mbalulu mu lyaambu be liili: liboti beeno mu kutatëminë cibilë, n'vu wuvyookë owo beeno lwabë baatu bën'tetë yaaku tokë mu kusalë, kasi yivaandi mu kuboongë lukanyu mu kusalë.

¹¹ Buyifanwabu, vaangaanu buumë mu kumanisi cisalu aci. Tuulaanu n'vwiilu wumboti mu kucimanisi bunë lukaninë kulivaangë i bunë bukelili mëkanë miinu.

¹² Ningë licyelikë muutu ke yin'vwiilu wumboti, Nzaambi wacikunë likabu linë wukun'yiindulilë, mu linë like yaandi kaambofo linë likambusu yaandi.

¹³ Yaaku ti mu kulucitulë biyeembi mu kuzudi bëmesë, kasi lubaanu dedë mweekë.

¹⁴ Mu ntaangu ayi, beeno luke mu mbodë, i beeno podi kuvatulë bo bëke mu n'ciinzë. Cilumbu lum'ba mu n'ciinzë i baawu bëm'ba mu mbodë, baawu bëm'podi kwiisë mu kuluvatulë. Bwa boobo bwaawu lum'beelë dedë mweekë.

¹⁵ Busonëmë : « Wunë wabë wunoongë mpaapë, wusye bakë bifunë ko, i wunë wabë wunoongë fwaati, wusye kaambwaangë ko. »

Tiitë i sindiku syaandi

¹⁶ Ndumu ke Nzaambi wunë wamonikinë Tiitë mu kuba buvavambë mu beeno, ya yooyi ya yike yiitu!

¹⁷ Tiitë wucikunë lulombulu lwiitu. Yivaandi, wabë beenë buvavambë i wulengë boongë lukanyu mu kwiisë ke beeno.

¹⁸ Yimunë naandi, tusë filë mwaanë nguli wunë bingangë byakë byooso bën'tubilë simboti mu cisalu cyaandi mu Mpolu Mboti.

¹⁹ Yaaku tokë, vandi kasi wusoolu mu bingangë mu kuba mwaniitu nguli mu mweendo, mu cisalu ci liyaanji cinë beeso tukelili mu bumpumu bu Fumu naveekë i mu kuleesi n'vwiilwiitu wu m'boti.

²⁰ Beeso tusë n'zolë ko baatu kudyeengë ntekwiitu yikusalilë civweetu ci mboongo cinenë aci.

²¹ Beeso tun'toombë kuvaangë liboti yaaku tokë fë nduunzi Fumu, kasi yivaandi fë meeso më baatu.

²² Beeso tulë mu kufilë mwaniitu nguli yimunë baawu. Beeso tubakë tuvoto mu kun'seengë mu mpaapë maambu i naandi wuyileesi kadë vyaasi buvavambë bwaandi. Kasi buyifanwabu, naandi wuke n'vwiilu mu kuvaangooso lufyaatu lunenë lukeeli yaandi mu beeno.

²³ Mu linë lin'talë Tiitë, naandi wayaami mu mweendo yivaandi ndikwaami ke beeno. Mu baanë bëmesë bë nguli bëlë mu kulyaatë yaandi, baawu obo biluumbi bi bingangë i bën'salilë mu bumpumu bu Kliistu.

²⁴ Bëleesyaanu ti, cyelikë beeno lube bëzolë, bwiinji bingangë biba yi lusisumunu i bëzaabë ti beeso tun'luungë mu kulutubilë simboti.