2 Koleentë 7 - N’KANGULU WUMOONË

¹ A sindiku syaami, tukanyu tooso oto tuke n'ciinzë mu beeso. Mu bwaawu, tuyilyomisyaanu mu mamooso mën'safulë nyitu kaambofo mbali i twe vaanjyaanu mëngolo mu kuba sisaantu si cyelikë mu kuzingilë mu sisu yi Nzaambi.

Nyeenzi yi Poolë

² Tutulyaanu mu n'timiinu! Beeso tusye vaangë libi ke muutu ko, tusye boongë cinganë ko, tusye tafë muutu ko, tusye sasi muutu ko wo twakaambu kufutë.

³ Miinu yisye tubilë lyalyooli ko mu kulutabë. Cyelikë, bunë miinu yiliviisi, beeno luke beenë bukaalu ti besiinu tubundënë mu luziingu kaambofo mu lufwa.

⁴ Miinu yike civuufu cinenë mu beeno, nyeenzi beenë mu beeno. Mu sinkwamusu siitu syooso, miinu yiciindë i yi waalë mu nyeenzi.

⁵ Mu kumonë, keti mu lutukulu lwiitu ku Masedwaanë, beeso tusye bakë ntaangu ko yikuvuundilë. Beeso tumonë simpekaadu simpilë mu mpilë. Twambulu mu besuveekë yi besuveekë, boomë mu mitimiitu.

⁶ Kasi Nzaambi wunë wum'bweelë kuvaanë n'viingu ke bo bavolë bitu, watuciinzi bitu mu lwisulu lu Tiitë.

⁷ Yaaku tokë mu lwisulu lwaandi mwa mwavangininë lyalyooli, kasi yivaandi mu n'zisyaandi mu mpilë yo beeno lwacindisi. Naandi wusë tukaambë n'ciinziinu mu kube kum'monë, mu cyuundë ciinu, mu buvavambë bwiinu mu kun'nwaninë. Mu bwaawu, talaanu buni nyeenzyaami yekeeli yinenë.

⁸ Cyelikë, mooti n'kaandë wo miinu yilusonikënë waluvangisi cyuundë, buyifanwabu, yisë n'nyoongë kuve. Miinu yim'podi kunyoongë ningë ti n'kaandë awu waluvangisi cyuundë mu mwa ntaangu.

⁹ Kasi buyifanwabu, yilë mu kwangelëlë, yaaku ti bo yaluvangisi cyuundë, kasi bo cyuundë ciinu cyaluvangisi kubalulë ndyatulu. Cyuundë aci cyabë bo Nzaambi kutiisi, mu bwaawu, beeno lusye tuvaangë libi ko.

¹⁰ Cibilë cyuundë ci dedëkënë mu mpangulu yi Nzaambi, cyaawu cin'vangisyaangë muutu kubalulë ndyatulu yi kun'natë kuluvukulu, yikukaambu kulunyoonginë. Kasi cyuundë cin'fuminë mu tusweenu tubuloongo be buubu bun'vaanaangë lufwa.

¹¹ Monaanu buyifanwabu manë mën'fuminë mu cyuundë ciinu mu mweeno Nzaambi : Mpilë mbici n'vwiilu wumboti mu beeno, mpilë mbici cikabë mu kuleesi cikaangë ciinu! Mpilë mbi lunyokulu, mpilë mbici boomë, mpilë mbici n'ciinzë mu kube kum'monë, mpilë mbi buvavambë, mpilë mbici lunkanvi mu kuvaanë kastikë ke wo wun'vaangë libi! Beeno luleesi mu makë mooso ti lulyoomë.

¹² Ningë yalusonikinë, yaaku ti mu cibilë ci wo wavaangë libi, kaambofo mu cibilë ci wo wum'monë mpasi. Kasi bwiinji beeno luzaabë buboti buni bufwenikini, fë ntwaalë Nzaambi, mu buleenvo buke yiinu mu beeso.

¹³ Mu bwaawu mpangulwiinu yatuciinzi. Beeso tusye bakë tokë ko kuciindë. Beeso tuyabooso mu nyeenzi, bunë twamonë Tiitë kuba mu liyaanji mu nteku yo benubooso lun'visilë.

¹⁴ Ningë yibe yituunvi fwaati mu beeno kuke naandi, lusye kun'fwiisi sonyi ko. Kasi, bo bumweekë beeso tulukambilaangë kadë ntaangu bucyelikë, bo bumweekë lunyemu lo twavaangë mu beeno ke Tiitë lwamonikë nduunji.

¹⁵ Boobo, luzolo lwaandi mu beeno lucilyooso lunenë, mooti kwatandëkënë buni beenë booso lun'cinzikë i buni beeno lun'tambulilë yi bubonzulu booso, yimunë luciinzu.

¹⁶ Miinu yike mu kwangelëlë yikuta lyaanë mu beeno mu makë mooso.