2 Koleentë 6 - N’KANGULU WUMOONË

¹ Oboobo, tulë mu kusalë yimunë Nzaambi, tulubondililë : nulekulyaanu ko muulë wo beeno lwabë lutambulë ke naandi.

² Cyelikë Nzaambi wun'tubë : « Mu ntaangu luvoto, miinu yikuyuwulu, mu cilumbu ci luvukulu, yiyisë mu kukuzudi. » Mu boobo, talaanu buyifanwabu ntaangu yikuvitikilë muulë wu Nzaambi. Cilumbu ci luvukulu cyaawu aci.

³ Lisye fwaanë ko bëdyeengë cisalu ciitu, mu bwaawu beeso tusë n'zolë ko kubwiisi baatu mu lyosuku lyaambu.

⁴ Tiilyoko, tun'toombë mu mosuku maambu, mu kuyileesi cyelikë beeso biseelu bisulëmë fë meeso më Nzaambi: tuke mpungë-moonyi mu simpasi, mu simpekaadu i tusweenu.

⁵ Batubulë i batutuulë mu buloko, basanji mboongu baatu mu beeso. Mu lizitë li cisalu, beeso tusye bëbakë tolo ko i ci kulya.

⁶ Beeso tun'leesi biseelu bi Nzaambi, mu bulyoomë bwiitu, mu luzaabu lwiitu, mu mpungë-moonyiitu i mu bwalëkisi bwiitu, mu mëkanë më Ciluunzi ci Saantu, mu luzolo lwiitu lu cyelikë,

⁷ mu lutendulu lwiitu lu bucyelikë i muulë wu luleendo lu Nzaambi. Mëta miitu mëkunwaninë i më kuyikakulilë, mati kuvaangë linë lisulëmë fë nduunzi Nzaambi.

⁸ Bëlë mu kutuzanjikë, kaambofo bëlë mu kutufwiisi sonyi. Bëlë mu kutufiingë, kaambofo bëlë mu kutucinzikë. Bëlë mu kutumonë dedë mweekë bibutë-maambu, kosuku beeso tun'tubë cyelikë,

⁹ dedë mweekë baatu bëkaambu kuzabukunu kosuku tuzabëkënë beenë, dedë mweekë bibayi kosuku beeso baatu lumoonyi tukeeli. Bëlë mu kutuvaanë kastikë i kukaambu kutuvoondë.

¹⁰ Bëlë mu kutuvangisi cyuundë, kasi beeso tukalilë mu liyaanji. Beeso biyeembi tukeeli, kasi beeso tun'vanaangë businë ke mpaapë baatu. Beeso tum'monikë baatu bëkaambu cyosuku, kasi mu cyelikë tuke yi byakë byooso.

¹¹ Beeso twalukaambë cyelikë cyooso, a sindiku sikoleentë, twaluzibulilë n'timiitu wooso.

¹² Beeso tusye lumanginë luzolo lwiitu ko, kasi lukafëkini lu n'timiinu.

¹³ Mu lyaawu, yilë mu kulukaambë buke baanë baami : cikunaanu luzolo lwiitu, tuzibulilaanu n'timiinu wooso!

Lubikini mu sinsalulë si banë bëkaambu kuta maanë

¹⁴ Nubuundyaanu nkoongë ko yi bo bëke mu civikë cimweekë yibëkaambu kuta maanë bo buke mëlawu. Buni, licyelikë linë lisulëmë podi kubundënë yi lyo lidiife? Buni cyeseesë kum'podi kubundënë yimunë citoombi?

¹⁵ Buni Kliistu wum'podi kuwusënë yimunë dyaabu? Kaambofo, cibilë-mbici cita maanë wum'podi kubundënë yimunë wukaambu kuta maanë?

¹⁶ Lukubu mbici lum'podi kuba yi n'zo-Nzaambi i sinzaambi si bintumbë? Cibilë beeso n'zo-Nzaambi yi moonyi tukeeli, bo Nzaambi wulitubilë naveekë: « Miinu yin'zingilë yaawu i yin'lyaatë yaawu, miinu yim'ba Nzaambyaawu i baawu bëm'ba likaandë lyaami. »

¹⁷ Mu bwaawu, « Beeno lufwenikini kwakënë i kubotukë yaawu. Nusiimbyaanu ko cinë cisumukë i miinu yilutambulë.

¹⁸ Miinu yim'ba Taatë mu beeno i beeno lum'ba baanë baami bë bëbakëlë i bë bëcyeetu, Nzaambi luleendo bwaawu kutubilë. »