2 Koleentë 4 - N’KANGULU WUMOONË

Businë bu cimpeefë mu biteku bitumë

¹ Nzaambi mu buboti bwaandi watuvaanë cisalu be ciici i mu bwaawu beeso tusë n'volë bitu ko.

² Beeso tuveetë yosuku mpangulu yi mëswamunu kaambofo yi sonyi. Beeso tusë n'salilë ko mu bungunguni i tusë n'tolikini ko Libuungu li Nzaambi. Tiilyoko, beeso tun'zabikini fë ciyalëlë cyelikë i tuyivandikë mu lufundusu lu baatu bakë booso fë nduunzi Nzaambi.

³ Oboobo, ningë Mpolu Mboti yo tulë mu kutendulë yicili yiswaamë, yaawu yike tokë mu banë bëlë mu kunyambëkënë.

⁴ Baawu bisë n'ta maanë ko cibilë ti Satënë, nzaambi buloongo be buubu, wafukë lyeelë lyaawu. Nzaambi buloongo wulë mu kubëkakë kumonë cyeseesë cinyambë mu Mpolu Mboti yi bumpumu bu Kliistu, yinë yikeeli cifwaani ci Nzaambi.

⁵ Licyelikë mu ndongulwiitu, yaaku ti mu besuveekë tulë mu kuyiloongë, kasi Yeesu Kliistu dedë mweekë Fumu. Abu tun'tubë ti beeso biseelu biinu mu cibilë ci Yeesu.

⁶ Mu civi-cikulu, Nzaambi wutubë : « Cyeseesë cye lesikë fë meeyi citoombi! » Mati naandi yivaandi wuvangisi kulesikë cyeseesë mu mitimiitu, mu kutuvaanë luzaabu lun'lesikë mu bumpumu bu yilu bum'manikë fë cinyi ci Kliistu.

⁷ Kasi beeso tun'natë cikokë ci bukaalu ci cimpeefë bo buke biteku bitumë, bwiinji bumonikë buboti ti luleendo lutudë lun'fuminaangë ke Nzaambi i yaaku ti ke beeso.

⁸ Beeso tuke mu lunyokululu lu simpasi simpilë mu mpilë, kasi syaawu sisye tubyesikë ko, mu cyuundë kasi tusye lekulë civuufu ko.

⁹ Tumonë binkuungë, kasi bësye tunyacikë ko. Bëtuvamë fë n'toto, kasi tusye fwa ko.

¹⁰ Kadë ntaangu beeso tun'natë lufwa lu Yeesu mu nyitwiitu, bwiinji luziingu lwaandi lumonikë yivaandi mu nyitwiitu.

¹¹ Bosuku tubeeli moonyi, beeso tulë mu kumonë binkuungë bi lufwa mu kadë ntaangu mu cibilë ci Yeesu. Bwiinji luziingu lwaandi lumonikë yivaandi mu nyitwiitu yifwenikini kufwa.

¹² Bwaawu, lufwa lulë mu kusalë mu beeso, bwiinji luziingu lumonikë mu beeno.

¹³ Busonëmë : « Miinu yike ciminu, bwaawu yabulilë mbeembu. » Besuviitu, mu ciluunzi cyo cimweekë ci ciminu, beeso twata lyaanë i bwaawu twabulilë mbeembu.

¹⁴ Beeso tuzabisi cyelikë ti Nzaambi, wuvulumunë Fumu Yeesu, wutuvulumunë yiviitu yimunë Yeesu mu luziingu i wutuvangisi kumonikë yimunë beeno fë nduunzyaandi.

¹⁵ Makë mooso tulë mu kumonë mati mu beeno. Mu mpilë oyo, muulë wu Nzaambi ke mwamukaangë mu mpaapë baatu, mu bwa boobo, lutaangu lu misaambu yim'putululu mëtoondo ke funaangë mu bumpumu bu Nzaambi.

Kuzingilë mu ciminu

¹⁶ Mu bwaawu beeso kupodi ve kuvolë bitu. Keti cimuutu ciitu cilë ke diifaangë fwati-fwati, cimpeefë ciitu cilë mu ke fusulaangë kadë cilumbu.

¹⁷ Simpasi tulë mu kumonë bubwayi sileengë, mëfwanukunu ve yi bumpumu bunenë bu sakë yi sakë, kulë mu kutubelikilë.

¹⁸ Cibilë tun'tuulaangë ntalwiitu yaaku ti mu binë bim'monikë, kasi mu binë bin'kaambu kumonikë. Binë bim'monikaangë bin'vyookë, kasi bin'kaambu kumonikaangë bin'ziingë beenë.