2 Koleentë 3 - N’KANGULU WUMOONË

Biseelu bin'kangulu wumoonë

¹ Beeso, tufwenikini kube yivandikooso besuveekë? Kaambofo kuba yi tesu buke bëmesë mu kululeesi mikaandë yin'tubë ti twalufilë, vo mu kululoombë yaawu.

² Mati benuveekë beeno lukeeli n'kaandiitu, wusonëmë mu mitimiitu i baatu bakë booso kupodi kuwuzaabë i kuwutaangë.

³ Cyelikë ti, beeno lukeeli n'kaandë bësonikë ke Kliistu i wutambiku ke beeso. Waawu wusye soniminë ko mu ndiimbë, kasi mu Ciluunzi ci Nzaambi moonyi. Waawu wusye soniminë ko fë yilu meesë më mëmanyi, kasi mu mitimë baatu.

⁴ Beeso tun'tubilë kati obo, cibilë ci civuufu cyo cike yiitu mu Nzaambi, mu Kliistu.

⁵ Licyelikë, yaaku beeso tum'podi kusalë cisalu ci mpilë oyo mu likanë liitu besuveekë ko. Linë beeso tuke yi likanë mu kuvaangë lin'fuminë ke Nzaambi.

⁶ Mati naandi watuvaanë mëkanë mu kuba biseelu mu N'kangulu wumoonë, wunë wuvangininë yaaku mu n'kaakë wusonëmë, kasi mu Ciluunzi ci Saantu. N'kaakë wusonëmë wun'nataangë ku lufwa, kasi Ciluunzi cin'nataangë ku luziingu.

⁷ N'kaakë wabë wudadiku cisonë fë mbusë cisonë fë yilu meesë më mëmanyi i bumpumu bu Nzaambi busë monikë mu ntaangu be yooyi. Ciinyi ci Moyiizë cisë manikë n'nyani wo basë Islayeelë bësye podi kuswiingë ntalulwaawu ko mu naandi i mu kumonë, n'nyani be woowo wulëvyookë. Ningë n'kaakë wabë wuvangininë mu kunatë ku lufwa, wusë monikë yi bumpumu bunenë,

⁸ buni bum'podi kubeelë bumpumu mu cisalu ci Ciluunzi!

⁹ Cisalu cilë nataangë lusifu lu baatu cyabë bumpumu. Kasi cisalu cin'vangisi baatu kuba bësulëmë fë ntwaalë Nzaambi civyokilili beenë bumpumu!

¹⁰ Beeso tum'podi kutubë ti bumpumu bo bulë manikaangë ntaangu ntamë bwazimbilë, fë ntwaalë bumpumu bu bubwayi buvyokilili beenë bunenë.

¹¹ Licyelikë, ningë binë bivyookë byabë yi bumpumu, buni bum'beelë binë bin'kalilë!

¹² Mati cibilë beeso tuke mpilë civuufu aci, bwaawu beeso tuwaalë yi lufyaatu.

¹³ Beeso tusë n'vangilë ko buke Moyiizë, wunë wufukë ciinyi mu n'lelë mu kumaangë basë Islayeelë kumonë lumanikunu lun'vyookë.

¹⁴ Kasi lyeelë lyaawu lisë ba citoombi. I tee yi zwaalu, lyaawu lifuku mu n'lelë wo wumweekë bunë baawu bën'taangë mëbuuku mëke mu N'kangulu Wuntamë. N'lelë beenë wum'podi tokë kubotukë mu cyeseesë ci Kliistu.

¹⁵ Cibubwayi aci, kadë vyaasi, baawu bën'taangë mëbuuku më Moyiizë, n'lelë wun'fukë lyeelë lyaawu.

¹⁶ Kasi, bunë bësonikinë : « Mooti tube balukë kuke Fumu, n'lelë wubotukë. »

¹⁷ Kosuku, cikumë cinë Fumu kun'tubë afa, Ciluunzi. Fanë fëke Ciluunzi ci Fumu, faawu fëkeeli lusyalulu.

¹⁸ Beeso booso, ciinyi fë ciyalëlë, beeso tum'monikë bumpumu bu Fumu. Bwaawu, beeso twacitukë mu kuba mpilë mweekë yi Fumu i beeso tun'vyookë bumpumu fë bumpumu bunenë buvyokililyooso. Talaanu cyelikë cinë cin'vaangë Fumu, wunë wuke Ciluunzi.