2 Koleentë 2 - N’KANGULU WUMOONË

¹ Bwaawu, miinu yikanë kuleembu kube vutukënë ke beeno, mu kumaangë kube booso mu cyuundë.

² Ningë yibe luvangisi cyuundë, nanyooso wum'podi kum'pangisi kuba mu liyaanji? Wunë miinu yin'vangisi kuba mu cyuundë naandi wuli podye?

³ Miinu yasonikinë lyaliili bunë yalivangilë: yisë n'zolë ko, mu lwisulu lwaami ke beeno, kuba mu cyuundë ke banë bëfwenikini kum'pangisi kuba mu liyaanji. Miinu yaviisi licyelikë ti ningë yike mu liyaanji, beeno yiviinu lum'ba mu liyaanji.

⁴ Licyelikë, miinu yalusonikinë yi lusweenu looso, yi n'timë wuzitë i mpaapë mësweelë, yaaku mu kuluvangisi kuba mu cyuundë, kasi bwiinji luzaabë buni miinu yibe luzolilë.

Kulenvukilë n'sumuci

⁵ Ningë wun'viipë wun'vangisi wayaandi kuba mu cyuundë, yaaku mu cibilë cyaami, kasi mu cibilë ciinu beeno booso, kaambofo tokë mu mwa likomo mu beeno.

⁶ Muutu be woowo wufwenikini kuseembu ke lukoongu lunenë lu baatu.

⁷ Mu lyalyooli, buyifanwabu, beeno nkanë lufwenikini kun'lenvukilë i kun'ciinzi bitu mu kumaangë naandi kuba mu cyuundë cinenë cikun'vangisi kukaambu lyaanë.

⁸ Mu bwaawu, miinu yiluloombë luleesi luzolo lwiinu mu naandi.

⁹ Mu lyaliili, licyelikë yivaandi yalusonikinë: bwiinji yizaabë ningë beeno lubeliminë ntaangu syooso mu kucinzikë mëkomini maami.

¹⁰ Bunë beeno lun'lenvukilë wun'viipë mu libi, yivaandi miinu yikun'lenvukilë. Ningë yibe lenvukilë muutu – i mooti yabë mu lyaambu li kun'lenvukilë – miinu yin'vangilë lyaawu mu beeno, fë ntwaalë Kliistu mu cibilë ciinu.

¹¹ Bwiinji, mu kumaangë Satënë kutunangiminë, beeso tuzabisi ntamë mësalulu maandi mëbi.

Linyoonji li Poolë ku Tolëwaasë

¹² Bunë yiyetuukë ku Tolëwaasë mu kutendulë Mpolu Mboti yi Kliistu, miinu yibakulë ti Fumu wukum'paanë luvoto luboti mu kulivaangë.

¹³ Mu kumonë, miinu yabë lusweenu lu mpaapë cibilë yikaambu ke zakënë mwaanë yiitu nguli Tiitë. Mu lyaawu, yisë kaninë basë Tolëwaasë i yisë ke yendaangë ku livulë li Masedwaanë.

Kulungilë livitë mu Yeesu Kliistu

¹⁴ Kasi mpumu ke Nzaambi, cibilë naandi wutunataangë kadë vyaasi mu ludumu lu kulungilë livitë mu Kliistu. Mu beeso, naandi wun'zabikini Kliistu mwakë mooso, dedë mweekë yaafë yi nfiimbu yinyambë mwakë mooso.

¹⁵ Beeso tuke dedë mweekë yaafë yi nfiimbu mboti yiveewu ke Kliistu mu Nzaambi. Beeso tuke yivaandi mu banë bëke mu nzilë luvukulu i bëke mu lunyambëkunu.

¹⁶ Mu bën'ka, mati nfiimbu lufwa yin'natë ku lufwa. Mu bëmesë, mati nfiimbu yi luziingu, yin'natë ku luziingu. Mu lyaawu, naanyoowo wum'podi kubakë likanë mu kusalë mpilë cisalu ocyo?

¹⁷ Beeso tukeeli ko buke bëmesë bën'vaangaangë lungooso mu libuungu li Nzaambi. Tiilyoko, mu cibilë ti Nzaambi wutufilë, beeso tun'tubë yimunë cyelikë fë nduunzyaandi, mu lubundunu yimunë Kliistu.